[الغريبه شوق]

0
0
صباح الورد


عـندما نشرت قصيدتي ( تعال جاوب ولاعبني ** خذ بالمشاعر هجينيه )



شـرّفـني اخواني الشعراء المبدعين بردود اقل ما يقال عـنها أنها في منتهى الروعه والابداع


وتوثيقا ً لهذه الروعه احببت ان اجمعها في هذا المتصفح

ارجو ان تنال رضاكم


وصحت قلوب كل من رد او ســ يرد على الموضوع


===================

قصيدتي :




أقرا قصيـدك ! ويعجبنـي=
يرسم لي أحـلام ورديـه
0
ولعيونك القـاف يكتبنـي=
أرسلـت خطـي علانيـه
0
تعـال جـاوب ولا عبنـي=
خـذ بالمشاعـر هجينيـه
0
الهـم بالقلـب صايبـنـي=
والحزن ميـه علـى ميـه
0
الى متـى وانـت متعبنـي=
الحـب محتـاج حنـيـه
0
لك الغـلا .. دوم غالبنـي=
شف بُعدكم.. وش عمل فيه
0
يا هوووووه إشره وعاتبني=
إرفـع قضيـه جنائـيـه
0
لكـن حرامـات سايبنـي=
في وسط الاوهـام مرميـه
0
هيجن بالأشعار واطربنـي=
كسّـر حـروف الهجائيـه
0
سؤال واحـد .. معذبنـي=
هجرك !! بصوره فجائيـه

.




=========================

ردود المبدعين :




.

افـرح بقـاف ٍ يداعبنـي=
تلويـه لشعيـل . ريميَّـه

هي بالكويـت وتودبنـي=
وانـا بـدار . السعوديَّـه

تشره عليَّـه . وتحسبنـي=
لعَّـاب واقولـب . النيَّـه

يا بنت ما جاك . ضاربني=
بالصدر خنجـر وجنبيَّـه

رمشك من العام . معطبني=
ليش القسـى . يالسنافيَّـه

همي من العام . يشعبنـي=
تاطى على الجمر . رجليَّه

والقلب يا بنت . منشبنـي=
يفـز لاشـاف . طرقيَّـه

يا ناعس الطرف جاوبني=
خل الدعاوي . سموحيَّـه

تعال يالترف . جاذبنـي=
سـوالـف . ٍللهـواويَّـه

واشكي لك اللي . مغرّبني=
غرو ٍ وسومه . صباحيَّـه

بغيت اصيبه . وصوَّبنـي=
حسناي جابت لي السيَّـه

يحرقني الوجد . والغبنـي=
لاهبَّت الريـح . شرقيَّـه

وابيِّح السد يـوم . ابنـي=
قاف ٍ على قاف . نشميَّـه

.

محمد بن صقيران

شعيل

.



======================
0

لاهـنــت يـلـلـي تعاتـبـنـي
=مـالـي بـروحـة ولا جـيِّــه
شِعرالهجـيـنـي يلاعـبـنـي
=لا صِرت بأرضٍ خلا ويِّه
وشعـر الغريـبـه يناسبـنـي
=أبـيــات بـالـجـود مـبـنـيِّـه
تـبـدِع بشـعـره وتعجبـنـي
=غطَّـت علـى كــلْ نشمـيِّـه
مِـثْـلـه حبـيـبـي إمعـذبـنـي
=مـافـيــه لـلـقـلـب مــاويِّــه
مـن دون سبِّـه إمْحاربـنـي
=مـاجــاه ظِـلْــمٍ ولا ســيِّــه
لبْـعـدت عـنـهـا إتقـربـنِـي
=وإن جيت تقلـبْ تقِـل حيِّـه
ويالـعـاذل الـلـي إمْكذبـنـي
=ناظِر أوْ شُومِي على إيْديِّه
أتعـبـت خـلِّــي ومِتعـبـنِـي
=والـحُُــبْ حِـكْـمـه إلـهـيِّــه
وإن قِلـت أباتُـوب تسلبنِـي
=عقلِـي وأعـوِّد علـى غـيِّـه
بالعـيـن والـخـدْ تجـذبـنِـي
= والمـوْت بعْـيـون سِحْـريِّـه


فهد الطويان




00
=======================



0

قـريـت أنـا الـقــاف واطـربـنــي
=لا شـــك صـاغــتــه جـنــيّــه

بـنـت ٍ بـهـا الـطـيـب يـجـذبـنـي
=لـــلـــه در الـقـبــيــلــيّــة

أثــر الــغــلا دوم يـغـلـبــنــي
=والـشـعــر بــيّــن خـوافــيّــه

والـشـعــر مـايــوم خـيـبــنــي
=ولا يـــوم خــيّــب هـقــاويّــه

وشـعـر الـغـريـبــة يـغـربـنــي
=وابـعــد عــن الـلــي حـوالـيّــه

مـع نـشـوة الـشـعـر يـكـسـبـنـي
=در ٍ عــن الـفـكــر مـخـفــيّــه

يـابـنـت أنـا الـحـب سـحـبـنــي
=ومـنــه تــرى حـالـتــي سـيّــه

حـتـى الـفـرح مـنــه جـنـبـنــي
=ولا الــحــزن ســاكــن ٍ فــيــه

وكـثـر الـعـتـب مـا يـنـاسـبـنـي
=يـجـلـب لـي هـمــوم مـنـسـيّــه

والـلــي بـعـشـقــي يـأنـبـنــي
=أمــر ٍ تــرى مــا وجـــد زيّـــه

الـلـي لـه سـنـيــن سـالـبـنــي
=مــا يــدري بـشـعــري وغـيّــه

0
عـــلـــي الــتــويــجـــري



0000
==================



0

بالحيـل.. بالحيـل.. يعجبنـي
=الحـرف مـن صـادق النيـه
****
فنـه يطابـق عـلـى فـنـي
=يبـغـي عـلـومٍ سنافـيـه
****
قـريـت قـافـه وعذبـنـي
=ذكرنـي اللـي مضـى لـيـه
****
مـن قبلـه الشـوق صايبنـي
=العـيـن مـنـه شـقـاويـه
****
يـا درةٍ جــت.. تداعبـنـي
=بالصـوت شالـت هجينـيـة
****
جاريتهـا ..وإنثنـى ..متنـي
=أحـلـى فـتـاة خليـجـيـة

****
يافتنـة الإنـس ..والجـنـي
=خوفـي.. إلـه البشـر فيـه
****
اشـوف مافـات لـي حـنّـي
=يبغـي السنيـن الخلاويـة!!؟
****
كيفي علـى مشربـه.. عنّـي
=والحـب.. مافـيـه مـاويـه
****
العيـن ..والسـن بالسـنـي
=والعمر ..( يابنت) ..عاريـه!
****
ولـولا عيـونٍ.. تطالعـنـي
=لارسم لـك قلـوب.. ورديـة
****
وإن كان بوحي.. قصر.. عني؟
=لاحـرق.. حروفـي الهجائيـة
****
وأكسـر.. يـراعٍ.. متعبنـي
=وأعلن جنونـي.. علانيـة!!؟
****
راعــي مــرات / عبد الرحمن السبيعي



======================


0

قريت أنا الشعر . وأرهبني
مـن شاعــرتنا . السـنافـــيه


مجنون أبو الشعر . عاجبني
ياشاعـــره غــير . عاديــــه



مثلك . حياااتي . تعـــذبنـــي
وتهيجـن . أبــيات . شعـريه


تبعـدني . بعـييد . تقــــربني
ولهـا محـــبه . أســـاســـــيه


نادت على الشعـــر . يكتبني
ورقصت حروفه على . أيديه


قلت العـفــــو هـيه . ياأبـني
صبرك على صبري . أشويه


تجمع . وتطرح . وتحسبني
من عشــرة سنين . ياعـنـيه



وأضحك . وتزعل . وتغضبني
وأزعـل . وتضحـك . أنانـــيه


مغـلـوب . غالبك . غالبـــني
مع عـــالـم .. الدبلــوماسـيه


اٍن طرت بك فوق . تجذبني
في جــاااذبيتك . الأرضــيه



باأصدق معــك . لاتكـذبني
أنـك معـــك عايـش ٍ فيـــه


ممكن تبعــثرت . رتبنــي
وحـدك . ملكــت . الأحقيه


واٍن كان فكرت . تشطبني
تبقــى . ولا شـي . موليـه


محمد اللهيبي



=======================
0
0


يـا الله يـارب يازبنـي
=ياعالـم النفـس والنيـه

هذي الغريبـه تلاعبنـي
=والحرب صارت علانيـه

القاف يا بنـت يجذبنـي
=والنفس خضرا هواويـه

والقلـب لجلـك يأنبنـي
=ريميه يـاويّ ريـميـه

تلعي على الغصن تسحبني
=مثـل الحمـام اليمانيـه

وانا على ماقال في غبني
=أدرى جروح(ن)غراميـه

أعفي واسامح بلا جبني
=وجيتـي هـذي أماريـه

هزي قوامك مـع الردنـي
=وفلّي جعود الذهـب ليـه

ثم اقربي يمي واستدنـي
=وافترّي يسـرى ويمنيَّـه

والقوس بيدي يساندنـي
=لجل الهنـوف السنافيـه



دايم الحر




======================

0


لبيه ياللي تعاتبني
=ببيات شعرٍ هجينية

قصيدك اليوم يتعبني
=ذكرني اشياء منسيه

من قبل لا انت تحاسبني
=تعال ونصفي النية

آمر تدلل وأطلبني
=انت لك الروح مهديه

الشوق لك حيل يلهبني
=والحال ما هيب عاديه

صوت الغلا منك يجذبني
=واجيك انا بكل حنيه

ترى العتب ما يناسبني
=اقولها لك علانية

حتىالزعل منك يغضبني
=فلا تجيني بطاريه

من قلبك اليوم قربني
=ابسمع الآه ناريه

ابيك بالحب تكتبني
=بكل الحروف الهجائية

عبد الرحمن الربيع




=======================

0

صوت الغريبة يغربني
=كنه صهيل الصويتية

ذكرني اللي مصوبني
=بين الترايب بجنبية

في مامضى مايغايبني
=يزورني كل صيفية

اشرب قراحه ويشربني
=من خافق صافي النية

والي انتحى الليل وارهبني
=سكونه وقل والية

ناديت له ثم جاوبني
=ياحي ذا الصوت ياحية

وجاني مجي(ن) يطربني
=لين الضحى ينكسر فية

والي بغى المزح يرعبني
=طرى الخطوط السعودية

واليوم كنه محاربني
=من يومها اخلت محارية

وانهد صرح الهوى المبني
=وروح مراويح كدرية


فيصل الطخيس


00000000


0


سلام ياللي تعاتبني
=تبي دلالٍ وحنية

المستحيل أنت تطلبني
=تطلب أمور(ن) خياليّة

الحب ياللي معذبني
=يبي قلوب هواوية

وانا قليبي مجانبني
=مع "الغريبة" وداعية

طول غيابه.. وتعّبني
=مدري وش القصد والنية

لياه ناويه ينهبني
=ويسلك دروب الحرامية

عطني فوادي وطالبني
=ردي لي القلب يابنية

ولا جا فوادي وناسبني
=خذي دلالٍ وحنية


الداهيه



=======================

0

يا بنت شعرك يذكرني
=غـرو ٍ فقدنـاه يابنيـه

في مهمه الحزن هملني
=واقفا ولا قد سال فيـه

من عقبه الهم لازمنـي
=وانوار الافراح مطفيـه

ظميان شوفه وتاركنـي
=كني انا ذابح وخيـه!!!

ياكيف يسطي ويطعني؟
=وانا معه صادق النيـه!

مااخطيت يومه يفارقني
=من حبه اشهق بطاريـه

طوعت له شعري وفني
=كل (الغزل) فيه معنيـه

وش صاب خلٍ مجنني
=تنكّـر اليـوم ماضيـه

ياما على النفس قدمني
=ويقول ياكل مـن ليـه

واليوم ماكنـه وكنـي
=احباب عشنا رومنسيـه

اقفى وانا الحظ جنبنـي
=

واعمى عيون السنافيه!!



برق / فيصل التويجري




====================


0

من جد والا بتتعبنى

=لبيه ياطارى الجـــيه.


حظى واعرفه مغلبنـى

=ما يوم صفا لي النيــه.


يا حظ وش عاد تطلبنى

=طالبك ترفق بى اشويـه.


اصدق معى يوم جربنى

=وعقبه فلا ابيــك موليــه.


توعد وتخلف وتنكبنــى

-تشبــه خطــوط الكويتيه.


مانع المتعب

=============


قريت انا الشعر واعجبني = قافٍ بدته السنافيه

وغنيت باللحن واطربني = وسريت اجر الهجينيه

حاولت اجاريه واتعبني = الحان حلوه وسحريه

ذكرني اللي معذبني = والقلب كثرة طواريه

كلمت طيفه وجاوبني = ودخلت بأحلام ورديه

ياهووووه لاتهدم المبني = وش فيك ماتلتفت ليه

يازين لالا تحاسبني = اسمح لي بربع حريه

اطلبك والاتطالبني = كل المواضيع سريه

باللين واللطف تكسبني = الحب دعواسماويه

وضميت طيفه وذوبني = ثم عادة الذاكره ليه

وصحيت والنار تلهبني = اصيح بارضٍ خلاويه

اثر الهواجيس تجذبني = للي خذ القلب عاريه

ليت الليالي تقربني = حتى اقضب الحبل بيديه

وافارق الهم والغبني =وانسا الحياه الشقاويه



زهير

==================


0
هاتوا طبيبٍ يطببني
ياخذ على القلب كشفيّة

*
بعض التلاحين ترهبني
ترمي على الخيّة الخيّة

*

لاقلت يالشعر جنبني
قالت انت لاتنزل بحيّه

*

قلت البلا الشعر يجذبني
جذب المهاجير للفيّة

*

ياطير ياللي على المبني
يزعج بالالحان عصرية

*

اقربك ولّاك تقربني
على سلامٍ وردّية

*

وش حاجة اللي يقطّبني
يقول شوفك على النيّة

*

خبرت مثله وجربني
قبله على الدرب خبريّة

*

لحن الغريبة يغربني
امسي وقلبي جلاويّة

*

شمّيت عوده وطيّبني
ياجعل واديه وسميّة




الرحال


=======================


0

يا شايل الطرق جاوبني

=كم للمكاتيب مقريه

والحظ لو هو مجانبني

=جيتك على الفال والنيه

والبعد ما عاد يرهبني

=مادام للوصل ماريه

كم للحزن عنك قاضبني

=لين امست العين مفريه

والغيم لو طاع يصحبني

=حدره لقا القاع مطويه

من قاف للبوح يجذبني

=مجناه مجنى البختريه

حرف ٍ من الشرق غربني

=على النقا شوق عفريه

ويا شايل الطرق شقلبني

=بس اترك النار مطفيه


العاشق / عبد المحسن بن سعيد




==========

00

[خالد الزومان]

يعطيك العافية يالغريبة

فكرة الموضوع الاصلي رائعة

ولولا روعة القصيدة لما تهافتت عليها الردود

وهذا المتصفح الجميل ايضا يصور لنا فسيفساء رائعة من تنسيق اناملك


دمتي لنا شاعرة

[سالم بن جلعان]

[c]
الله الله عليك اختي الغريبه وعلى من جاراك


اطلعت من قبل على العديد من الردود ولكن


هنا تصفحتها كامله وبصراحه ان كل نص يقول


الزود عندي ابتداءا من هجينية الغريبه وانتهاءا


برد العاشق .....


سلمتي على هذا الجمال واتحافنا به


لك كل الود


الورد


واكثر


اخيك



سالم بن جلعان



[/c]

[نواف الشمري]

صح لسانك يالغريبه ..


وصح لسان كل من تفضل بالرد ..


متصفح مذهل ..



كل الشكر

[الغريبه شوق]

الداهيه

الله يعافيك

وما قصرت

وشكرا لقلبك

[ابونوت]

الغريبة وابداع متواصل وفي كل الاتجاهات

لم يحالفني الحظ حين طرحتيها للمجاراة

ولكن يبقى الاصل لامعا وتبقى الردود اصداء جميلة ورائعة تستمد روعتها من حروفك البهية

تحياتي وتقديري واعجابي بما تكتبين

[سطام العوني]

اختي الشاعرة الكبيرة \الغريبة


كلكم شموس


حقيقة رائعة رائعة وقد لا افيها حقها

اتمنى لك التوفيق

أخيك

[الغريبه شوق]

سالم بن جلعان

شكرا لمرورك

وشكرا لقلبك



وما زال الموضوع مفتوح للمجاراه


تحياتي

[الغريبه شوق]

نواف الشمري

صح بدنك

وشكرا لقلبك

[الغريبه شوق]

ابو نوت

هلا بك

وشكرا لمرورك يا الغالي

وما قصرت


وما زال الموضوع مفتوح



تحياتي

[الغريبه شوق]

سطام العوني

لا هنت يا الغالي

وما عليك زود

وشكرا لقلبك ولذوقك

[فوزي المطرفي]

الاحتفاء / وطن ..!!



يؤلف القلوب حتى النفس ..!!




الغريبه ..



فكرة تحرّض على التكرار





1حتر111111111111ما111111111111111تي

[عبدالرحمن الربيّع]

	الغريبة .. مساء الخير .. حقيقة الجمال يأتي بالجمال .. وكان لي شرف ان ارد على رائعتك بابياتي المتواضعة .. صح لسان كل من شارك باستثنائي فأنا لا امدح نفسي .. والشكر كل الشكر لكل من اطرى على هذا المتصفح الجميل .. لك اطيب التحايا وصادق الود سيدتي .

[عبدالله البكر]

.














شجيرات مثمرة ..
وأثمــــار متدليــــة من كل مكان ..



متصفح لا يقاوم ..








صح لسان : كـــل الرائعين .. وعلى رأسهم انت ِ ..




تحية طيبــة ..





.

[زهير]

الغريبه



مساء الخير


يشرفني ان اشارك في الرد على رائعتك بهذه الأبيات المتواضعه واتمنى ان تحوز على رضاكم




قريت انا الشعر واعجبني = قافٍ بدته السنافيه

وغنيت باللحن واطربني = وسريت اجر الهجينيه

حاولت اجاريه واتعبني = الحان حلوه وسحريه

ذكرني اللي معذبني = والقلب كثرة طواريه

كلمت طيفه وجاوبني = ودخلت بأحلام ورديه

ياهووووه لاتهدم المبني = وش فيك ماتلتفت ليه

يازين لالا تحاسبني = اسمح لي بربع حريه

اطلبك والاتطالبني = كل المواضيع سريه

باللين واللطف تكسبني = الحب دعواسماويه

وضميت طيفه وذوبني = ثم عادة الذاكره ليه

وصحيت والنار تلهبني = اصيح بارضٍ خلاويه

اثر الهواجيس تجذبني = للي خذ القلب عاريه

ليت الليالي تقربني = حتى اقضب الحبل بيديه

وافارق الهم والغبني =وانسا الحياه الشقاويه