آخر 10 مشاركات |
|
||||||||||
|
أدوات الموضوع |
12-10-2003, 04:47 | #1 |
شــــاعـــر
|
الله يسود وجهكـم يـا هـل الـواد....سود السما كـل الخلايـق تراعيـه
عندما خرج عبيد بن رشيد واخوه عبدالله من حائل اثناء حكم ابناء عمومتهم ال علي للجبل خرج عبدالله للعراق لجمع شمر من حوله..وعبيد زبن الجوف.. بعض شمر نجد لم يقفوا مع ابن رشيد ولم يؤيدوا حربه وخروجه على ال علي.. مااثار غضبه منهم.. فقال قصيده اشتهرت لايزال الكثيرون يرددونها لكن حدثت لخبطه في مناسبتها وخلط بعض الرواه بينها وبين قصبده لشاعر اخر فضاعت بعض الابيات يسرني اني وجدتها كامله مع الابيات التي لام بها من لم يقف معه ومدح من سانده كابن رخيص [poet font="Simplified Arabic,4,orangered,normal,normal" bkcolor="transparent" bkimage="" border="none,4,gray" type=2 line=200% align=center use=ex length=0 char="" num="0,black" filter=""] يا هيه يا اللي لي مـن النـاس وداد=ما ترحمون الحال يا عزوتـي ليـه ما ترحمون اللي غدا دمعـه ابـداد=جاله زمـانٍ حـرق الدمـع خديـه جالـي زمـانٍ مـا تهنيـت برقـاد=وقصر الحشا قامـت تهـدم مبانيـه من يوم شفت الشوق مزبورالانهـاد=ومجلـيٍ عـن دار جـده واهاليـه وقفه يجر الثـوب للضلـع شـراد=أمشلحٍ ياطا علـى اطـراف رجليـه الشوك ماله عن حيـا الرجـل رداد=إلا ولا سـبـتٍ قــويٍ يـوقـيـه يا من يسـوي لـه زرابيـلٍ اجـداد=من المي لو ياطا على القطن يحفيـه بمشمرخات الهيف بالزحف صعـاد=وكم ماعرٍ من خوف الاروام راقيـه اخـذ ثمـانٍ مـع ثمـان لـه اذواد=ولا لقـا مـن عزوتـه مـن يلفيـه وجبه سقاه من أول الوسـم رعـاد=ما حـدرت خشـمٍ مسمـان iiتسقيـه حيـث أنهـا للمنهـزم دار ميعـاد=ومن لاذ به تقل الحـرم لايـذٍ فيـه ومصيخ بن فرحان عريب الاجـداد =كالعساكـر نكسـه تتلـي البيـه نكس بهم عامـر ومحسـن وزيـاد=والكل منهم مـا رجـع يـم اهاليـه وفزنا على شهب الغوارب من غـاد=وكم عيلٍ يبكي من القيـض شاويـه وجينا جليبٍ صايـرٍ وسـط الانفـاد=بالخمس مع نصف الثمانيـن ندليـه ليا بن رخيصٍ نازلٍ هـاك الاجـراد=قال اقبلوا وانتم هل الدار يـاهيـه يا بن رخيص الحضر يبغون ببـلاد=والحيضري بالهـدي يكـره تبدويـه ونبغي نقارب من هل الجوف خـلاد=وندعي عسا ان الوبل يسقي مفاليـه واهـل سكاكـا نعـم بذالـة الـزاد=ونعم النكيف الى لفا السيـر طاويـه اوي والله يا الضويحي مـن اجـواد=ونعم الرفيق الى نصا مـدح اهاليـه والمدح بدوا فيـه لرشيـد وابجـاد=والكل منهـم سيـف يقطـع بحديـه وشلنا على حمرٍ طويـلات الابـداد=يـم الشمـال ونيـة الهـور نبغيـه كـن جيـت بـدوانٍ بـالاذواد وراد=وكـلٍ يزيـن للعشـايـر مـواديـه واحلوا شرشـوح المغاتيـر لنقـاد=لا دوه الراعـي بحلـو التـداويـه ليا الشط لي في يمـة الشـط منقـاد=كن الشفلح فـوق موجـات جاريـه يا ما عليـه مـن مخاليـق وعبـاد=والكل منهم والـي الاقـادر مشقيـه هـذاك فـلاحٍ وهــذاك كــراد=وهـذا مريـح وساهـراتٍ دواليـه وهذا يهب الغزل من فوق الاعـواد=وهـذاك يبـرم لـه وهـذا يساديـه كان جيت لي سوقٍ ورا جسر بغداد=كن الدبـل تكفـان يزهـي لوحيـه قبة الذهب يا كـود حتـى الزمـراد=يروع قلب المصلحي من مشى فيـه لا هو بشلفٍ لي ولا هـو بالأمـراد=ولا هو هوايٍ وطاري النفس يطريه من يوم جانا العلم تحذيـرالاوكـاد=قيل العساكـر غربـوا تتلـي البيـه وحنا بديـرة مـن يعـدون الأجـداد=هـذا ولـد عمـه وهـذا بناخـيـه هب الهوا يـا ذاري الريـح وأنقـاد=ويا من يدور قضا حلالـه وأهاليـه الله يسود وجهكـم يـا هـل الـواد=سود السما كـل الخلايـق تراعيـه من باب خـدامٍ إلـى بـاب عـواد=ومـن ينتخـي بالضيغميـه أنطاليـه يا اللي نسيتوا عمل الاجرب وفهـاد=ومن عقب هذا داخليٍ مـن قهاويـه حتـى الجـراد بالجماعاتنـا سـاد =هـذا مسربـلـه وهــذا مجلـيـه لو تجتمـع كـل الخلايـق بميعـاد=ألا جـرادٍ مـا لـك الله مصافـيـه عيسى يقول الحـرب للمـال نفـاد=والمال مـن هبـت نسايـم ذواريـه يا اللي تقول الحرب ما به لنـا زواد=انشد مسوي السيف هو ليـه حانيـه يا صار ما يرويه مـن دم الأضـداد=يديـه يــم العرفجـيـه تـرويـه ولا صار ما مرٍ يزغـرت بالاكبـاد=ترى الموصي يسفه اللـي موصيـه ولا صار ما ناصل ونضرب بالأحداد=هبيت يا سيفٍ طـوا الهـم راعيـه ولا صار مـا هـمٍ بصنديـد الأولاد=فالعـن شبـابٍ مـا يبهيـه راعيـه والله لوني مـن ورا جسـر بغـداد=أني لكم مثل العمـل عنـد راعيـه [/poet] |
12-10-2003, 13:32 | #2 |
شــاعــر
|
هلا حبيب قلبي ابو حمود وين الغيبات مبطيٍ مانزلت مواضيع الضاهر اني ابوصي ضاري عليك وتسلم يمينك على هالقصيده الرائعه بس عندي ملاحظه على احد الابيات هوه يا صار ما يرويه مـن دم الأضـداد ...................يديـه يــم العرفجـيـه تـرويـه هالبيت قاله عبدالله الرشيد بعد ماحكموا الجبل وتحديدا بعد معركة بقعا اللي انذبح به يحيا بن سليم زوج العرفجيه والبيت كما اعرفه وان كان مانسقيه من دم الاضداد ................كزوه يم العرفجيه تحنيه وتسلم يمينك على هالنقل ولاتبطي علينا تحياتي |
12-10-2003, 15:57 | #3 |
شـــاعــر
|
الأخ العزيز / نواف الشمري تسلم لي على نقل هذهِ القصه وقصيدتها الله يعطيك العافيه يا بو حمود ...... !! تحياتي وتقديري لشخصك الكريم .. !! اخوك احمد بن ديهان . |
13-10-2003, 07:29 | #4 |
الـحـــرّاب
|
اخوي ابو حمود تسلم على النقل اتيت لاسجل اعجابي و حضوري اخوك الحراب |
16-10-2003, 08:20 | #5 |
عضو شعبيات
|
يا صار ما يرويه مـن دم الأضـداد يديـه يــم العرفجـيـه تـرويـه ولا صار ما مرٍ يزغـرت بالاكبـاد ترى الموصي يسفه اللـي موصيـه ولا صار ما ناصل ونضرب بالأحداد هبيت يا سيفٍ طـوا الهـم راعيـه ولا صار مـا هـمٍ بصنديـد الأولاد فالعـن شبـابٍ مـا يبهيـه راعيـه الله الله ياسلأم ياسلأم عليك يانواف انشهد انه قصيده من اعماااااق اعمااااااق القلب قصيده وقصه رائعه جدا جدا تقبل تحياتي الخويطري |
16-10-2003, 09:07 | #6 |
شــــاعـــر
|
اخوي خالد .. كان ماني واهم .. فعبيد هو اللي ذبح رجل العرفجيه مهو عبدالله .. وبمعركة بقعا .. يوم يقول واللي ذبحت بشذرة السيف تسعين .................. منهم ولاني عن طردهم بسايل ذبحت ابوصالح صعوط المجانين ................. واودعت دم الشيخ بالقاع سايل واعتقد ان عبدالله .. مالحق على هالمعركه .. لأن عبيد يقول بقصيدته بمناسبة انتصارهم : يتلون ريف الضيف عيد المساكين ..................... الشيخ ابو متعب جزيل الفعايل الى بغى امر ٍ مايشير المشيرين .................... الحيد شيال الحمول الثقايل وابو متعب هو بندر الطلال اما البيت هذا: يا صار ما يرويه مـن دم الأضـداد ...................ودوه يــم العرفجـيـه تـرويـه الاختلاف الكبير عليه مهو انه لعبيد ولا لعبدالله ... الاغلبيه يقولون انه لعبيد .. لكن الاختلاف في الروايات ..متى قيل ؟؟ وليه؟؟ اما القصيده المذكوره بالموضوع .. فمناسبتها واضحه من خلال الابيات : الله يسود وجهكم ياهل الواد .........سود السما كل الخلايق تراعيه وحنا بديـرة مـن يعـدون الأجـداد ...................هـذا ولـد عمـه وهـذا بناخـيـه لاحظ (( هذا ولد عمه وهذا ابناخيه )) يعني مهو بديرته .. وانا اعتقد تن البيت ان كان مايروريه من دم الاضداد .................. ودوه يم العرفجيه ترويه اختلط على الرواه .. وربما كان الشطر الثاني من قصيده اخرى فاختلط .. الروايات كثيره .. والخلط وارد شكرا لمداخلتك |
16-10-2003, 20:24 | #7 |
شــاعــر
|
هلا ابو حمود حبيب قلبي طبعا الاختلاف وارد باختلاف الرواه بس دام جاء طاري بندر الطلال ابسألك عنه وعن هالبيت هل هو اللي قاله والا لا طاوعت حتسي المقعديه بعمي ........... ياعل عبيد وشيبته باسفل النار وانا سمعت ان بندر الطلال هو اللي ذبح متعب العبدالله عمّك يابندر وكان عندك القصيده كامله او اي اضافات لاتحرمنا تحياتي |
17-10-2003, 04:11 | #8 |
شــــاعـــر
|
هلا خالد .. مثل ماقلت .. بندر الطلال واخوه بدر .. ذبحو عمهم متعب العبدالله العلي سنة 1285 اما بندر فذبحه عمه محمد العبدالله الكبير اللي حكم اطول فتره واكبر مساحه في تاريخ حكم ال رشيد ..وهو اللي عم بفترة حكمه الامن وتطبقت الشريعه ووعت الناس ..ومات موت طبيعي سنة 1315 اما البيت اللي قلته طاوعت حتسي المقعديه بعمي ........... ياعل عبيد وشيبته باسفل النار ما اعتقد بندر اللي قاله .. كان ماني واهم متعب العبدالله يمكن ويمكن بندر .. وفيه قصيده لعبيد يقول بحدى ابياته سرنا ورى اللي جعل مايرهز النور القصيده موجوده اتأكد من هالسالفه وارد لك خبر .. |
26-11-2003, 00:20 | #9 |
عضو شعبيات
|
الاخ نواف والاخ خالد هذه اول مشاركه لي في هذا المنتدى مع اني من المتابعين له منذ مده طويله واعجبني هذا المنتدى وبالذات القصائد القديمه التي تنشر وكنت افضل الاكتفاء بالتصفح لعدم توفر الوقت للمشاركات ولكن رأيت ان اشارك بما استطيع . ذكرالاخ نواف ان عبدالله بن رشيد لم يحضر معركة بقعاء وان ابو متعب هو بندر الطلال والصحيح ان عبدالله بن رشيد حضر بقعاء وهو الذي قتل يحيى بن سليم رغم انه اعطاه الامان وهذه من المآخذ القليله عليه . والمقصود في قصيدة عبيد بقوله : يتلون ريف الضيف عيد المساكين 0000000000000الشيخ ابو متعب جزيل الفعايل هو عبدالله حيث انه في اكثر من قصيده ذكر بابومتعب رغم اشتهاره اكثر بابو طلال ولكن ليستقيم الوزن . كما ان بندر الطلال حينما تولى الاماره كان عبيد كبيرا في السن لا يشارك في الغزوات وهو الذي حرضه على قتل عمه متعب وبعدها ندم بندر على قتل عمه وقال هذا البيت . العرفجيه ليست زوجة يحيى بن سليم وانما هي زوجة محمد العلي العرفج والذي تولى امارة بريده وكان بينه وبين ابناء عمه العليان تنافس على الاماره فقتلوه . وكان يتميز بالشجاعه والشعر وقال قصيده بعد معركة بقعاء والتي يبدو انه لم يحضرها لان امير بريده فيها بن عليان ومطلع قصيدته : آه من هم يكسر بالضلوع 0000000داوي بالقلب يا مشكاي جاش وفيها يلوم بن عليان وابن مجلاد شيخ الدهامشه من عنزه والذين كانو مع اهل القصيم حيث يقول : اف يا بدو يبارون النجوع 00000000رايهم مع بدوهم واصبح علاش خص ابن مجلاد والبو الهموع000000بدلوا ذاك المنافش بانفشاش وفيها يطلب من اهل القصيم اخذ الثأر وعدم الانشغال عنه فيقول : او تحسبون المفاخر فالزروع000000او تصاريف الذهب هو والقماش المفاخر خضبوا حد القطوع00000000لا تحسبونه تبي تصفي بلاش والمقصود بقول عبيد ذبحت ابو صالح صعوط المجانين هو الذايدي أحد فرسان القصيم . والمقصود بقول عبيد سرنا مع اللي جعل ما يرمق النور هو متعب لانه كان بينهما خلاف . اخر تعديل كان بواسطة » فيصل1 في يوم » 26-11-2003 عند الساعة » 23:52. |
26-11-2003, 11:38 | #10 |
شــــاعـــر
|
اشكرك جزيل الشكر اخي فيصل .. . . المعلومات التي قمت بايرادها هنا حول القصص والقصائد صحيحه .. شكرا لك مره اخرى وبانتظار تواصلك |
عدد المتواجدون في هذا الموضوع » 1 , عدد الأعضاء » 0 , عدد الزوار » 1 | |
|
|
|