[إبراهيم الوافي]

ألمّ أوراق بستانك ، وأضوّي للخريف النور
ذبل صوت اعتذار الوقت ، ( من بَيْدلّ خطواتي ؟)

أحس إن انتظاري لاَمْسْ ، بكرة فاتني بشهورْ
كأني بعدك الساعة وصوتك رجْع دقّاتي

أبيع إحساسي بقلبكْ عشان أشري عبث وغرورْ
أكرر كل ماقلته .. بلهفاتي وهقواتي

وإذا كثر الخطا مني ، وغيّم قلبك المقهور
جبرته باتهامي له ، واغتَرّتْ خطيّاتي

أحس إن اعتذار القلب ، مايقدر يقِِلّ شعور
إذا قلتي كذبت أصدق ، وينكر موقفي ذاتي

معك وقتي يداهنّي ، أجيك وكل وقتي زور
تجيني غير عن حظّي ، وما تهنابك أوقاتي

ذنوب العاشقين جروح ، لكن ذنبك المغفورْ
جرحته يوم غفرانه بــ. شكي و اتهاماتي .. !!

مرايا مدخل الذكرى ، زجاج إحساسك المكسور
وصوت اليأس ضحّكني ، عشان أبكي لمأساتي

ثلاث سنين وأنتي قلبْ وآنا الشاعر المغرور
أحبك لاكتبتك صدق ، وأكذب في كتاباتي

كتابكْ صفحته بيضا ، وآخر ماكتبتْ حضورْ
يجي وأعطّر شفاهي بذكرك في مداراتي

خلاص أعجز أجيب اعذار ، لوكان الصبر معذورْ
إذا سامحتي أيامي ، تحاكمني خرافاتي

إذا بعض الخطا يذبح ومعتاد الخطا مسرور
أبحيا باعتذارك لي ، وأهلك في قناعاتي

وحشتيني وياخوفي وحشني حزنك المنثور
على سجادة أيامي ، وما تلمّه مواساتي

شبيهي غير لو ظلي نسيته فوق حد السور
سألتك من سألني عنك وأبكتني إجاباتي

بلاي أعرف محد غيرك يبات افليلتي مهدور
إذا سرت ( أتحراهنْ )، وأشهّر في كراماتي

أنا الشيطان والكاهن ، وأنا دمعة عيون الحورْ
أضمك في ضلوعي جرح وأبعد عن معاناتي

أحبك (إيه) لكن (لا)! وشلون أوجعك وأثور
قصايد حبك الخالد تناساها سواياتي

أحبك لاتغيّر حال ، وأنكر صبرك المشكورْ
عشان أزوّر إحساسي ، وأغَيّرْ فيك حالاتي

أبجمع آخر أوراقي ووادع وقتك المغدور
تكفّي حسرتك ذكرى ، وتَكْفَي عنكْ حسراتي

مريض بعثرة أيامي ، وميراث التعب موفور
تعبتي من تعب فجري وتعبتْ بكْ مساءاتي

سماك تغيبْ ، كيف أبقى نجوم الشاعر المشهور
وفي رجلي مدى العتمة ، ظلام يشل خطواتي

أكذّبْ كل ماقلتي ، وأصدّق فالأخير سطور :
( ورق كل الشتا يرجف وريح الفقد مدفاتي )