|
ذبول ..!
ألمّ أوراق بستانك ، وأضوّي للخريف النور ذبل صوت اعتذار الوقت ، ( من بَيْدلّ خطواتي ؟) أحس إن انتظاري لاَمْسْ ، بكرة فاتني بشهورْ كأني بعدك الساعة وصوتك رجْع دقّاتي أبيع إحساسي بقلبكْ عشان أشري عبث وغرورْ أكرر كل ماقلته .. بلهفاتي وهقواتي وإذا كثر الخطا مني ، وغيّم قلبك المقهور جبرته باتهامي له ، واغتَرّتْ خطيّاتي أحس إن اعتذار القلب ، مايقدر يقِِلّ شعور إذا قلتي كذبت أصدق ، وينكر موقفي ذاتي معك وقتي يداهنّي ، أجيك وكل وقتي زور تجيني غير عن حظّي ، وما تهنابك أوقاتي ذنوب العاشقين جروح ، لكن ذنبك المغفورْ جرحته يوم غفرانه بــ. شكي و اتهاماتي .. !! مرايا مدخل الذكرى ، زجاج إحساسك المكسور وصوت اليأس ضحّكني ، عشان أبكي لمأساتي ثلاث سنين وأنتي قلبْ وآنا الشاعر المغرور أحبك لاكتبتك صدق ، وأكذب في كتاباتي كتابكْ صفحته بيضا ، وآخر ماكتبتْ حضورْ يجي وأعطّر شفاهي بذكرك في مداراتي خلاص أعجز أجيب اعذار ، لوكان الصبر معذورْ إذا سامحتي أيامي ، تحاكمني خرافاتي إذا بعض الخطا يذبح ومعتاد الخطا مسرور أبحيا باعتذارك لي ، وأهلك في قناعاتي وحشتيني وياخوفي وحشني حزنك المنثور على سجادة أيامي ، وما تلمّه مواساتي شبيهي غير لو ظلي نسيته فوق حد السور سألتك من سألني عنك وأبكتني إجاباتي بلاي أعرف محد غيرك يبات افليلتي مهدور إذا سرت ( أتحراهنْ )، وأشهّر في كراماتي أنا الشيطان والكاهن ، وأنا دمعة عيون الحورْ أضمك في ضلوعي جرح وأبعد عن معاناتي أحبك (إيه) لكن (لا)! وشلون أوجعك وأثور قصايد حبك الخالد تناساها سواياتي أحبك لاتغيّر حال ، وأنكر صبرك المشكورْ عشان أزوّر إحساسي ، وأغَيّرْ فيك حالاتي أبجمع آخر أوراقي ووادع وقتك المغدور تكفّي حسرتك ذكرى ، وتَكْفَي عنكْ حسراتي مريض بعثرة أيامي ، وميراث التعب موفور تعبتي من تعب فجري وتعبتْ بكْ مساءاتي سماك تغيبْ ، كيف أبقى نجوم الشاعر المشهور وفي رجلي مدى العتمة ، ظلام يشل خطواتي أكذّبْ كل ماقلتي ، وأصدّق فالأخير سطور : ( ورق كل الشتا يرجف وريح الفقد مدفاتي ) |
| الوقت المعتمد في المنتدى بتوقيت جرينتش +4.
الوقت الان » 19:43. |
Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع ما يكتب في الموقع يعتبر حقوق محفوظة لموقع شعبيات- شبكة الاقلاع