[طرش بحر]

قبل كل شي اشكر الغالية نورة العجمي على دعوتها لي لمنتديات شعبيات والله يستر ماتتحسف على هالدعوة من كثرة خنبدزتي واتشرف بالانضمام لكم وان شاء الله نقدم شي يليق فيكم وفي هالمنتدى << ماظنيته لكن يالله نشوف

**هالموضوع من ارشيفنا وحبينا نتواصل معكم عن القطاعه


حسبي الله على الذي سبب شقاتـي ..... ليسـقاني المر عقب السلسبيل
اللي فرق مجرك عن مجرى حياتي ..... وافرقك عني بعد عمر(ن) طويل

ياحبيب الروح بكتب لك وصاتي ..... ان غديت اليوم فـي حبك قـتيل
اسـألـك بالله لـيطفـت برفاتي ..... لاتخلي دمـعـة في عينك تسيل

لا تذكرني بحبك ياغنــاتــي ..... لاتذكرنــي بماضـيك الجـميل
في صدى ذكراك باقزر حياتـي ..... مستحـيل احـب غـيرك مستحيل

^
^^
^^^

(( اسمع بذكر الاطلال انا وكشرتي المملوحهـ ))

في إحدى الأحقبه (( جمع حقبه بس جمع ترفيس مهوب جمع تكسير )) وتحديداً في الحقبة الغابرة فيما قبل سنة ذكرَني تراني نسيت كانت هناك حارة صغيرة يسكنها ناس اعجز عن وصف اخلاقهم اللي مهناش , تخيلوا الجار فيهم لين طبخ برستد حراق ماهوب يعطي جاره يذوق اللهم ياكافي لا ومن لعانة جاره الثاني لين شم ريحة البرستد راح للبقالة وضف مافيها من كتشب ومايونيز علشان مايتهنا جاره ذاك راعي البرستد ببرستدده الي سواه , وإلا الثاني الي كل ما شرى شاورما له ولعياله وكلوها (( جعلهم الماغص )) قام وذب القراطيس عند باب جاره الثاني علشان يقهره ويعلمه انه بطران وياكل شاورما , وفيهم طبع(ن) شين بالحيل ألا وهو غاريتهم من بعض تقول حريم رجل وإلا ديتسة(ن) صايله ماغير مغاير ومناقر لو يشوف الواحد عند جاره أي شي راح وجاب مثله لدرجة انهم يقلدون بعض في كل شي حتى بطريقة الحتسي وطريقة المشي واللبس اللهم لك الحمد, بس سكن عندهم جيزاني توه متعيين في قسم الشرطه عندهم ونشبوا نشبة(ن) ماعقبها , هالجيزاني عطاه الله حب إكثار الذرية وحالفن مايهجد لين يصرفون له الاحوال ثلاثة دفاتر عايله ومن عقبها وهم بالبلى , يحلف الرواة ان حريمهم هلكن من كثر مايولدن عاد خبركم الحريم هن الي يتعبون في الولادة من سهر وعناء من ليلة يكون فيها مناوبة للجهاد وقتل الكفار ولعب (( عظيم ساري )) ثمن إذا لقحت شف عاد يبدء الشقى من أمور حمل وولادة ورضاعه ومصالا(ن) ماله آخر لهالعيال الله يصلحهم بس << ولو تسني قد مسكت دور حرمة(ن) نفاس .

ماعلينا من هالناس اللي الله يستر عليهم بس حبيت ابين لكم اني اعرف اكتب مقامات محبوكة سوات الهمداني ورفيدزهـ السيوطي .


في مابين الطويلعة شرقاً وسكيرينة غرباً والحبونية شمالاً وعتيقة جنوباً نشأ فقحان ولد ........ (( اسم امه فشيله ولا ينتواجه به صراحه )) وكأي شاب في مثل هالحواري تلقى البزر ( إلا من رحم ربي ) يتعلم اقبح واوصخ الحتسي قبل يتعلم الحتسي السنع وكدليل على الشقاوة والشطانة تلقى ساقه انواع الجروح والزلغات وغالبيتهن من جنزير السيكل وإلا لاعطه شكمان دباب أو طايحن من فوق برنيطة بيتهم وإلا داعسه ابو الجيران وهو مايدري عنه , حتى مره يدوره ابوه ويسأل عنه مالقاهـ , اثره زابن فوق البرنيطه راقي(ن) يزرع بصل (( راجع كتاب العلوم لرابع ابتدائي)).

هالكمخه رفيدزنا فدغان باشا دايماً ينكب عفش أمه المسيكينه مع حريم الحارة , مرة(ن) أرسلته أمه لجيرانهم يجيب من عندهم حبحر وقالت له قل : تسلم عليكم امي وتقول عطونا شوي حبحر الله يكثر خيركم , توه بيروح ثمن قال لأمه طيب وان قالوا ماعندنا << مولم العصابه قبل الفلقه , قالت الله لايكثر خيرهم ان تسانهم لين بغوا شي رحت اركض به لهم , وراح يدربي راسه وطق الباب عليهم وقالهم تسلم عليكم امي وتقول عطونا شوي حبحر الله يكثر خيركم , قالت له ام الجيران والله ماعندي هالحين, وبكل فداغه قالها اجل تسلم عليكم امي وتقول الله لا يكثر خيركم ان تسانكم لين بغيتوا شي جت تركض به لكم , وطبعاً ام هالجيران عومه ولا ينقال لها شي وطقي ذيك الزعله الي مارضت منها إلا بعد حب خشوم وكم جلسة حش وعرطله في خلق الله على مزمزة كراث وملح وفصفص عقب حدى الضحويات في بيت محايد .
من شدة فداغة فقحان انه مايرضى بالخطأ بتاً بتيتا << على وزن فعيل من كلمة البته , وحتى من شدة حرصه وعدم رضاه بالغلط لين سمع الاذان توضأ وراح قبل الاقامة (( لحد هنا شي كويس )) لكن تخيلوا مع حرصه تفوته الصلاة الله يجزاه خير بسبة انه معاهد نفسه ان مافيه أي نعله او جزمه (( تكرمون )) يخليها تكش على الله (( بدت المعتقدات الي مالها سنع ابد )) فلذاك تقام الصلاة وتفوته الصلاة وهو مغير عند باب المسجد واي نعله او شبشب او جزمه تنقلب لازم يعدلها لوضعها ولا يخليها تكش على الله .
مره انظلم من إمام المسجد صحيح انه تفوته الصلاة أحياناً وهذا حسب النعول المقلبه ان صارن واجد فالصلاة الله يخلف عليها وان زبطن فهو بيصلي بعد مايشيك على مداخل المشجد كلهن , مره صار فيه إزعاج وهيصه من بزران بس فقحان خوينا كان مشغول بما هو اهم مشغول بالنعول ومدى استعدالهن فلما سلم الإمام على طول شيك على الي فايتتهم الصلاة << ذيب هالامام , وصاد كم واحد وظلم هالافدغ مهم وهو بريء من هالتهمه وانجلد قدام العالم من ابوه واكل تهزيء ماله مثيل (( محد(ن) قاله مايصلي وخل النعول تنفعه هالحين )) ومن بعدها وهو يبي ينتقم من هالامام وفكر في كذا حيله من ظمنهن تنسيم كفرات موتر الامام بس ماجازت له هالسالفه وفكر انه يفقع لمبات بيت الامام بس برضوه ماش هالحركه مالها سنع ولاهي تستاهل ابد , فنغزته شياطينه وقال مالي إلا اورط الإمام مع الجماعه واضحك عليه مثل ماضحك علي الناس وانا انجلد قدامهم فقال ابحاول اخلي الامام يغلط في الصلاة واحرجه مع الجماعه واحسن وقت لين جت الركعه الاخيره وجاء بيجلس للتشهد الاخير ابقول بس سبحان الله واخليه يغلط وانتهى الموضوع فحاول اول مره ولا زبطة لان الامام متأكد من صلاته ولا شك ابد , ومره ثانيه وثالثه ماش مازبطة الدعوة وانعرف وانجلد مره ثانيه وزاد حقده وركبت في راسه مزبوط إلا يغلط الامام ويشفي غليله منه , وفعلاً جاء في حدى الايام وفي صلاة مغرب (( موقت هالخبيث لحزة تنطط اخوانه الشياطين )) وذاك اليوم الامام ماش مازبط عمره وداخله الماء ويدخل هالفقحان وفي الركعة الاخيرة وهو ماخذن احتياطاته ويقول سبحان الله بس هالمره مخشنن صوته مما زاد خوبرة الامام وفعلاً جاك يامهنا ماتمنى وبدال مايجلس الامام للتشهد الاخير قام بيجيب ركعه زيادة لانه شاك اصلن والجماعة من وراه سبحان الله سبحان الله وفقحان هالخبل كاعها ضحكه وهو يتشمت بهالامام واخيراً طفى غليله منه بس المسألة تطورت لان ابوه يعرف ضحكته النكراء ويوم جاء للبيت وهو الي يباغته ويحوس مريره وياهو طقه طق سنه بيوم هالضعيف بس اهم شي انه انتقم لنفسه واحرج الامام شر إحراج .

اتأكدنا من دشرة هالفقحان بعدما انهى شتائه الثالث والعشرون بعد مابهذلنا لين تأكدنا انه بلغ الحلم وهالشي ما تأكدنا منه إلا لمن فضحه اخوه وقال انه دايمأً يشوف مباريات وهالمباريات اتحداك تلقاهن عند احب لو تروح لفديو النهدي وإلا فديوات شارع الشميسي حتى ان عنده شريط مكتوب عليه مباراة الشعلة 3 X البرازيل 0 << راجع أي قاموس للدشرة عند أي من السرابيت والسمرمد .

شي طبيعي انه مايفلح في دراسته وعن الذمة ماكان ينجح إلا بالطابور والفسحة أما الباقي فيفتح الله يعني على قولة بكر الشدي الله يغفر له (( مامن تعلوم )) , فماكان منه إلا ان حاول ان يبني مستقبله بيده ومن عرق جبينه أما مسالة شهادة وخرابيط فحطها ورى ظهره وشق طريق التجارة من اضيق ابوابه وفتح له مشروع بسيط عبارة عن بيع بلبله وبطاطس مسلوق وببسي ابو نصف ريال ودعم هالمشروع بلعبة شختك بختك ( الاختيارات الي تفقعهن ويطلع لك يامصقال وإلا علك وإلا خاتم بلاستك ) , طبعاً ما كان لهالمشروع ذاك الدخل الي يستاهل بس هالمشروع طيح فقحان في الحب وجابه على وجهه خصوصاً ان اغلب زباينه من بنيات الحارة الي بهذلنه من كثر مايصَبرهن (( يسلفهن )) وخصوصاً البنت زهرة الي زحفته على وجهه تزحيف من كثر مايحبها ويموت في طلتها من ورى باب بيتهم وشاف مفرق راسها ولع المسيكين وانهبل زيادة , وتطورت السالفه إلا وصلت للرسايل الغرامية والبوسات الي توقع بهن هالرسايل وتفحل الامر لين وصلت لمقابلها فوق السطوح وياكثر مايتعذر انه يعطي الدجاج حقهم الرز والجح الي يبقى من غداهم وعشاهم وهو الخبيث يرقى للسطوح علشان حبيبة القلب زهرة .

وفي يوم ماكان بالحسبان طبت عليهم ام زهرة وكفشتهم ورى الخزان بس الحمد لله انهم كانوا في وضع غير مخزي ومحتشم لأبد درجة فماكان من امها إلا ان خرشت ام فقحان بالتلفون وقالت لها عن اللي شافته وانها صادتهم الاثنين ورى الخزان مع بعض ولازم يلمون الموضوع ويسترون على البنت ويتبنون اللي في بطنها << توك تقول في وضع غير مخل ومحتشم , فما كان من ام فقحان إلا ان ردت على ام زهرة بكل برود وقالت لها قولتها الشهيرة :

أمسكوا عنادزكم ونمسك تيسنا

مايستفاد

قال البيز
وقلت البيز
واثر البيز قطعة خردزة

[ذيبان]

:d
وهل يخفى طرش البحر مشرف منتدى العيارين بالاقلاع
حياك يالغالي
متأملين مواضيع ثانيه ومشاركات اكثر لاخلا ولا عدم

[نورة العجمي]

قبل كل شي اشكر الغالية نورة العجمي على دعوتها لي لمنتديات شعبيات والله يستر ماتتحسف على هالدعوة من كثرة خنبدزتي واتشرف بالانضمام لكم وان شاء الله نقدم شي يليق فيكم وفي هالمنتدى << ماظنيته لكن يالله نشوف

هههههههههههههههه
بنشوف ياطرش البحر
صراحه من شفت مواضيعك قلت شعبيات اولى فيك ههههههه<- داخله على طمع هههههههه
حبايبنا الأقلاع وشعبيات لهم حق تثرونها بمواضيعكم المقلعه والغنيه بالعياره
الله يخليكم لنا وللاقلاع وللأمه الاسلاميه جمعاء ههههههههههه

[نجـود]

طرش بحر
حصلنا الشرف
أنا والله كن محلوف علي ماادخل الاقلاع .. [= حست انوه كان فايتها الكثير ]
بس كويس لحقنا على خير ..

اصبر جاز لي كم جزء بقووه [ غاريتهم من بعض تقول حريم رجل ] هههههههههههههههههههههههه الله يرجك

[ يحلف الرواة ان حريمهم هلكن من كثر مايولدن عاد خبركم الحريم هن الي يتعبون في الولادة من سهر وعناء من ليلة يكون فيها مناوبة للجهاد وقتل الكفار ولعب (( عظيم ساري )) ثمن إذا لقحت شف عاد يبدء الشقى من أمور حمل وولادة ورضاعه ومصالا(ن) ماله آخر لهالعيال الله يصلحهم بس << ولو تسني قد مسكت دور حرمة(ن) نفاس . ]

ههههههههههههههههههههههههههههههههههه
ههههههههههههه آآآآآه ياقلبي .. الله ياخذ بليسك
ذا الجزء يصلح اوريه امي وخالاتي ؟


[ في خلق الله على مزمزة كراث وملح وفصفص عقب حدى الضحويات في بيت محايد .]
لو سمحت استفسار ذي الحادثه .. وقعت في الرياض ولاالقصيم [= تتحرش بالقوصمان ]



[ ان مافيه أي نعله او جزمه (( تكرمون )) يخليها تكش على الله (( بدت المعتقدات الي مالها سنع ابد )) فلذاك تقام الصلاة وتفوته الصلاة وهو مغير عند باب المسجد واي نعله او شبشب او جزمه تنقلب لازم يعدلها لوضعها ولا يخليها تكش على الله . ]

هههههههههههههههههههه
هههههههههههههه .. قويه ذي ..

لين هنا وبوقف
وبرجع للباقي في وقت آخر

[زمن]

طرش بحر ههههههههههههههههههههههههههههههههههههههههههههه ه

يا حبي لك بس على هالسالفه اجل امسكوا عنادزكم هههههههههههههههههه

[يزيد بن غشيّان]

طرش بحر وهل يخفى الدب الاكبر ؟؟

مشرف العيارين و زبدتهم اهلا وسهلا في شعبيات وهذي ابرك الساعات و احلاها

الرسالة الأصلية كتبت بواسطة طرش بحر

هالكمخه رفيدزنا فدغان باشا دايماً ينكب عفش أمه المسيكينه مع حريم الحارة , مرة(ن) أرسلته أمه لجيرانهم يجيب من عندهم حبحر وقالت له قل : تسلم عليكم امي وتقول عطونا شوي حبحر الله يكثر خيركم , توه بيروح ثمن قال لأمه طيب وان قالوا ماعندنا << مولم العصابه قبل الفلقه , قالت الله لايكثر خيرهم ان تسانهم لين بغوا شي رحت اركض به لهم , وراح يدربي راسه وطق الباب عليهم وقالهم تسلم عليكم امي وتقول عطونا شوي حبحر الله يكثر خيركم , قالت له ام الجيران والله ماعندي هالحين, وبكل فداغه قالها اجل تسلم عليكم امي وتقول الله لا يكثر خيركم ان تسانكم لين بغيتوا شي جت تركض به لكم , وطبعاً ام هالجيران عومه ولا ينقال لها شي وطقي ذيك الزعله الي مارضت منها إلا بعد حب خشوم وكم جلسة حش وعرطله في خلق الله على مزمزة كراث وملح وفصفص عقب حدى الضحويات في بيت محايد .

[/color][/center]

ههههههههههههههههههههههههههههههههههههههههههههههه ذا السالفه موضوع لحاله

لي عوده وغليص بعد

[واضح]

ماشاء الله ياطرش على هالموضوع المفروض تغير اسمك وتخليه بيت الطين

<< راح يمكمل اجراءات الجنسيه لطرش

ابدعت والله ياخلفهم

[طرف زوليه]

طرش....... اثرك منتب سهل...!!!

go buddy

[بنت الاقلاع]

طرش مشرفنا العزين حركاااااااااااااااااااااااااااات

[# كرزه #]

بارك الله فية (اجل يخلي النعال تكش على الله )

اقول اهله مسمينه فقحان او أنت ما بعد تمكنت من اللهجة
ذكرتني بالسعودي اللي شاف الأهرام وقال ياوقه الله