[فراع]

الا يالمنفهق فراع صار العاشق الولهان
............................... بعد ذاك الغزال اللي رماني سهم من عينه

سجني مادريت أنه سجني وأنشد السجان
.....................................عساه يقول لك حب العذارى له قوانينه

سجني في العيون اللي هدبها ناعس وفتان
.................................... وانا مجنون في ذاك الغزال ومن مجانينه

أخبرك فارس وسيفك معاك وتدخل الميدان
.................................... وانا قد خذت رمح ذياب بيميني من يمينه

تريد الرمح خلك سمح واسمك فارس الفرسان
....................................... نبا نغزي على ذاك الغزال وربي يعينه

الا يالمنفهق تكفى عسى الله يلعن الشيطان
.......................................ترى فراع عقبه ضاع وأختلت موازينه

[المنفهق]

يالله حيّه

اعذرني على القصور



الا يا صاحبي وش بك علّي تفتّح البيبان
________________ تشكّى لي وانا مديون .. لي ديان في دينه


تدينت الهوى مالي رصيد وهاشني الديان
__________________ واثر قانون ديان الهوى لا برت فـ /يدينه


توصف !! لا توصف لي عيون موحَّش الغزلان
__________________يقال العاشق الموله يشوف صحيبته زينه


انا فارس ولي سيفي ولكن ان بغيت تعان
____________________ تخيّر في مياديني ولا تقرب ميادينه


ومالي بالرماح اللي وراها يضحك الفسقان
___________________وانا مانيب لاغازي ولا غاوي خلاقينه


وكنّي.. من بعد تكفا !! نويت آعدل الميزان
______________ ابفزع .. لِعن ابو من لا فزع لك بآخر سنينه

[أحمد الديهان]

.


الا يالمنفهق تكفى عسى الله يلعن الشيطان
.......................................ترى فراع عقبه ضاع وأختلت موازينه


الله يعينك يا فراع ..

تكفى ترى تكفى تهز الرياجيل ...



وكنّي.. من بعد تكفا !! نويت آعدل الميزان
______________ ابفزع .. لِعن ابو من لا فزع لك بآخر سنينه



كفووووو والله يالمنفهق ..


لاهنتوا على هذي الرديه ..

وبيض الله وجيهكم ..


وسلمت قلوبكم ..


تحياتي لجميع ..


احمد بن ديهان .

[الشبيبى]

فراع و المنفهق انا اشهد انكم كفيتو وفيتو

[ابونوت]

كم نحن بحاجة لمثل هذه النقائض

اعجابي وتحياتي