السلام عليكم ورحمة الله وبركاته
مساكم الله بالخير ...... او صبحكم الله بالخير(عاد اختاروا)
بصراحه ياخوان الموضوع محرج شوي لكن انا متاكد ان الكثير يبون يوافقوني على رايي ..... لكن مثل ماقلت الموضوع محرج
بصراحه يالربع ترددت كثير قبل لااكتب الموضوع
لكن اي شي فيه خدمة الموقع او الشعر النبطي عامة .... مستعد اخربها واقوله
الموضوع باختصار هو
فيه عندنا منتدى اسمه (ميزان القصيد)
وهذا المنتدى طبعا الهدف منه بصراحه .... القصيد الي مهوب موزون او فيه اغلاط يتحول على المنتدى ذا(الي هو ميزان القصيد)
اخواني بدون زعل
احد منكم يقدر يقول وش تصير القصيده الي مهيب موزونه ؟
اكيد تصير مهيب قصيده
وطبعا الاخوان في اغلب المنتديات والمواقع يعتبرون الفائده من المنتدى ذا هو انهم يعلمون الاعضاء الشعر ..... صح؟
اقول يالربع ...... صار رياضيات ماصار شعر
والله يااخوان كذا مره انحرج بمواقف زي كذا
في احدى المواقع كان فيه عضوا
والعضوا ذا من يوم يشوف له قصيده قافيتها سهله .... يجي ويرد على القصيده
طبعا ياليت يرد بقصيده
لا والله يرد بسواليف
وكانوا اغلب الاعضاء والشعار (معطينه طنش) يعني مايعتبرون ان فيه احد رد
ومره من المرات نزل موضوع وطبعا كالعاده يحسبه قصيده وهو سواليف بالعكس السواليف تقول لك تراني سواليف لكن هذا الضعيف يحسب انه كتب معلقه .
القصيده الي كان منزلها الاخ ..... كان يتشره فيها على الاعضاء بانهم مايردون عليه ولا يعبرونه
طبعا محد رد عليه
ورفع الموضوع
ولاحد رد
واخر مره كتب
(ياناس سبوني لو تبون بس ردوا علي طمنوني)
المهم انا بصراحه بالمواضيع ذي احب الصراحه
جيت ورديت عليه وقلت له
(اخوي اخاف انك تزعل اذا رديت عليك بصراحه)
قال خذ راحتك .... قلت هذا الي ابيه
قلت له وش تعرف عن الشعر
قال قافيه
قلت هذا الشي انت ماطبقته ..... ولاوزن ..... والمصيبه العظيمه هي
المعنى مدري وش يبي
؟
وقلت للعضوا ياخوي ترى الشعر موهبه .. ولايجي بالقوه او بالحاله الي تمر بها
مثل انه يتوفى لك قريب لاسمح الله ..... تقول خلاص انا اقدر اقول مرثيه
وانت رجال ربي وربك الله ...... الكلام الي انت تقوله يضيق الصدر
وانا اتكلم صادق ..... والله بعض القصيد (التالي) انه يضيق صدرك اذا قريته
ابن الحلال سمع كلامي واقتنع ....
المشكله يااخوان انه يكون العضوا(الي يعتبر نفسه شاعر) يرد على مواضيع وقصايد الشعار ...... فبعض الشعار يقول هذا رد علي وتكلف ماودي اكسر بخاطره
ويرد عليه والضعيف مايصدق خبر ..... وبعدها لايمكن انه يصدق احد يقول له انت منتب شاعر
وبعدين يااخوان امانه ... ابي جواب صريح
فيه ازين من شعر الشاعر سعدون العواجي؟
او
شالح ابن هدلان
او
دغيم الظلماوي
هذولا مثل ماتعرفون يعتبرون من اكبر شعار النبط
مع العلم انه ماكان عندهم منتدى اسمه (ميزان القصيد)
فالشي الي انا اقوله
منتدى ميزان القصيد انا اعتبره ظلم للمساكين ذولااااا (الي انحذفت قصايدهم)
لان المشرف لازم يجامل ويقول
(والله المعنى حلو وقوي وبصراحه الوزن يبي له تعديل)
بالله اذا سمع المسكين هالكلام وش يبي يصير عليه؟
يبي ينهبل ويقول مابقى لي شي واصير شاعر
وقد سمعت مقابله لمراقب عام لاحد اكبر المواقع الادبيه ويتكلم عن منتدى بالعربي لتعليم الشعر
ويقول
(ناس كثير تحسنوا ... ولو تقرى قصيده اول ماجانا وتقراه الحين تشوف الفرق )
الصراحه المراقب ذا شاعر كبير ..... وانسان على خلق
لكن استغربت منه الكلام ذا
فااقول يااخوان ليتكم تراجعون زين فكرة منتدى(ميزان القصيد)
وصدقوني اريح لكم واريح لبعض المستشعرين انكم تحذفونه
لااااااااا وبعض الاخوان تشوف وزن قصيدته رايح وطي
ويقول ماعلي منكم انا شاعر
مااقول الا الله يعين اخوي عبدالهادي الخليوي عليهم وعلى مناحلهم والله انه يعاني منهم ومن حماقتهم
على لعموم يااخوان
انا ماطرحت الموضوع الا اني متاكد ان فيه حل يبي يكون عندكم
ويجوز اني على صواب ...... ويجوز اني ادربي جمهاتي <==== الظاهر انها التاليه
وارجوا انكم تنتبهون للنقطه ذي
(مانبي مجامله )
شاعر واحد من شعارنا الكبار يكفينا .
وبعدين من الصعب انك تحط موضوع (شاعر كبير) مع احد المستشعرين
احس انه ظلم للشاعر الكبير
والله يستر منكم
<===== يحس انه يبي ينشات
