بسم الله الرحمن الرحيم
اخواني اخواتي رواد منتدي شعبيااات
اول شي اباركلكم بحلول شهر رمضان المبارك والله يعوده علينا وعليكم وعلى الأمه الأسلاميه باليمن والبركااات
اعزائي الهموم لمن تجي الأنسان(الله يجيركم منهااا) يحس بضيقه ويحس انه لازم يشكو على احد قريب منه عشاان تروح الضيقه...والشعاار دايمن يذكروون اسامي ناس في قصايدهم اماا اسم المحبوبه او اسم خوي او حتى اسم الخادم...
اليكم هذه القصيده للشاعر الكبير ابن لعبون يذكر فيهااا اسم خويه
يا علي صحت بالصوت الرفيع*****
يا مره لاتذبين القنـــــــــــاع
يا علي عندكم صفراً صنيــــــــع*****
سنها يا علي وقم الربــــــــاع
نشتري ياعلي كانك كانك تبيــــع*****
با لعمر مير ما ظني تبــــــــــاع
شاقني يا علي قمرا وربيـــــــع*****
يوم انا آمر وكل أمري مطــــــاع
يوم أهلنا وأهل مي ٍ جميـــــــــع*****
نازلين ٍ على جال الرفـــــــــــاع
ضحكتي بينهم و انا رضيـــــــع*****
ما سوت دمعتي يوم الــــــــوداع
هم بروني وانا عودي رفيـــــــع*****
يا علي مثل ماتبرى اليــــــــراع
طوعوني وانا ماكنت اطيـــــــــع*****
و غلبوني وان قرم ٍ شجــــــــــاع
دون مي الظبي و ام الوضيــــــع*****
و الثعالب و تربيع الشــــــــــــراع
راس ريع ٍ دخل في راس ريـــــــع*****
مستطيل ٍ و وديان ٍ وســــــــــاع
رحم الله شاعرهاا ابن لعبون
=====
ننتقل الي قصيده اخرى للشاعره الأميره نوره الرشيد تشكو لعبدهاااصروف الأيااام
ابكي هلي اهل العلوم المليحة
ولالوم عيني لو جرى دمعها دم
اخواني ابكي والقصور الفليحة
اخواني اللي لابغو لازم تم
ياما انتخوا باسمي ليا حل صيحة
اليا انتخو بي كافر الجن يسلم
اسمي كما نجم ضرب قاع بيحة
او الصواقع يوم للضلع ترجم
نورة انا اخت الشيوخ الفليحة
ابوي حاكم واخوتي صفوة الجم
ياحيف حايل فارقن ريح شيحة
بذيك الشفايا تقل ما قيلي سم
لابد من صلف الهوى يزيل ريحة
ومثلي يذوقو لوعة الغبن والغم
يالعبد عقب العز كبدي جريحة
حب الوطن يالعبد من عصر ادم
يلعبد هذي من حكايا الفضيحة
خل السهر لي وانت يالعبد قم نم
من اول نامر تجيب الذبيحة
واليوم ياعصر الندم صرت لي عم
قصيده جميله للشاعره نوره الرشيد
==========
وهذي قصيده للشاعر راكان ابن حثلين يخاطب فيهاا احد حراس السجن (في تركيا)
انا أخيل يا (حمزة) سنا نوض بارق*****
يجلى عن الظلما حناديس سودها
على ديرتي رفرف بها مرهش النشا*****
وتفقاه من دهم السحايب حشودها
فياالله يا المطلوب يا قايد الرجــــــا*****
يا عالم نفسي رداها وجودهـــــا
جعلك توفقها على الحق والهــــــدى*****
ما دامها خضرا ما بعد هاف عودها
لك الحمد يا معبود والشكر والثنـــــا*****
اوجيهن ٍعلى البيدا نواصي سجودها
تفرج العين لا ضوا الليل كنهــــــــا*****
رمدا وذارفها تعدى خدودهـــــــــا
وكبد ٍ من افعال الليالي سقيمــــــــه******
عليها من حامي اللهايب وقودهـــــا
تقطعت لرماس عنا ولا بقــــــــــــا*****
الا وجود باقي في ودودهـــــــــــــــا
فيا حظ من ذعذع على خشمه الهوى*****
وتنشق من ريح الخزامى فنودهــــا
مقف ٍ من الصمان لا نشـّـــف الثرا*****
مع الصلب والا حادر من نفودهــــــا
يبراه شلفات الى ناض بــــــــــارق*****
زهـت له ولو هو نازح ٍ من حدودهــا
رحم الله شاعرهاا راكان بن حثلين
======
بماأ نه بديناها بغزل ودي اني انهيهااا بغزل
وقصيد للشاعر محمد بن فهيد القحطاني.يذكر فيها
يذكر فيهاا اسم محبوبته ساره
هيض ابن حصيص في تالي نهاره****الف قاف من ضميره مدرجات
يا ند يبي فوق منبوز الفقاره****أركي وحبال كوره كالفات
كن في عيني من الفرقا شراره****او مخاليب الطيور الحايمات
قم ندور صاحبي ظبي الزباره****بو عيون يا حمود مدعجات
جعل ضلع طويق ياعارض وداره **** جعل يمحل والوشوم مربعات
حيث ينزل عندنا مضعون ساره****واهتني بصويحبي عشر سنوات
ولعتني بالهوي والحب ساره****ولعتني من غنادير البنات
راس ساره ذيل شقرا وسط غاره****والجدايل بالرشوش مجدلات
والثنايا قحويان في زباره****عله الوسمي على حد النبات
ريق ساره مثل(شكر) في غضاره****او حليب بكار عرب مسمنات
يا وجودي وجد مكسور الجباره****ساهر تسعين ليله ما يبات
حالف ما اسلي ولا انسى حب ساره****كود اهل (شقرا) يخلون الصلاة
لارماني لايمين ولايساره****مير صوبني بحد المرهفات
حطني لأهل الهوى المجمول شاره****مثل نيشان المعاطيب الرماة
==============
اتمنى ان القصايد تعجبكم وسامحوناا على القصور
تقبلو تحيات اختكم
Text