27-09-2003, 11:47
|
#1 |
|
شــاعــر
|
قصه جرت قديمابموقق بحايل<<-----طويله ومؤثره لاتفوتكم
قصتنا هذي حدثت بالغوطه بمدينه موقق بحائل يوجد بنت تحب شخص وكان محيّره ولد عمّه (من العادات القديمه كانت البنت اذا حيره ولد عمه مايتزوجه الا هو والا يتنازل عنّه) وهي ماتبيه وقالت لابوها ما ابيه قال ابوها هذا ولد عمتس ولا اقدر وهو محيرتس وفي احد الايام راحت لولد عمه واسمه هبّاس وقالت يابن عمي ابيك تعفينن (يوقع على التنازل) وابي لاذكرتها لك بعدين القاك ارحم من ابوي والجا منه, وانت والله مافيك شي بس ان قلبي مهوب ميالٍ لك ويصب لها فنجال وقالت والله منيب متقهويه عيب المره تقهوى بمجالس الرجال مار هاته اركّده لين اخذ منك العلم ويوم كملت قال قضيتي قالت ايه قال والله ياها القرن اللي يتدودل مايلمسه الا انا قالت يمين يسار قال لو تصبق السما على الارض قالت والله ماتلمس قرني هذا لو عشت ماعشت وترجع عليه الفنجال وقالت هذا فنجالك لاني شاربته ولاني ناثرته وطلعت من بيته المهم ان معه له نياق تسرح بهن ثلاث ايام بالنفود ويومين بالحمض واليومين اللي بالحمض تلاقا هي والرجال اللي يحبه وتحبه ويسولفون على شرف ونضافه وعفه واذا جاء تالي النهار رجعلت لاهله وهو رجع لاهله بالغوطه ولا يقدر يجي اهلها لان بينه وبينهم سوء تفاهم ويحترون الوقت المناسب واحد الايام رجعت لقت خيمه بجمب خيمتهم قالت وكاد ان هذي خيمه جار لان العرس ماله طاري وهي رافضته نهائيا وهي تنشد له ولد قال هذي خيمةٍ بناه هباس اليوم قالت ياعل ماهي مبروووكه وهي تدخل للبيت وتولم سم وتغيبه عن ابوها وقالت يايبه انتم معزمين تزوجنن هباس قال مافيه واقلبي وجهتس لا والله بهالمحماسه قالت لا ان اختصر عليك الطريق وهي تشرب السم وتمووت ويحفرون له بجنب البيوت ويوم جو يدفونه دورو كفن ولا لقوا ولهلموَه (لفوها) بهدومه ويوم جو يصلّونه والا قرنه يجيله متر ونصف وهو يدني يده اللي محيره وياخذ القرن ويحطه باللحد ويقول هذا ديني واوفيته انتهت ويوم جاء من باتسر ويشحذون قصيرٍ لهم يقولون نبي ولدك يسرح بالنياق لم الحمض والا النفود صعب عليه ولا يعرفلهن بالنفود ويسرح بهن ويوم جاء يوم ثالث على حروة سرحة البنت والا الرجال اللي يحبه يتصردهم بالدربيل وهو يعرف نياقهم ويجي ويلقى هالولد ويسلم عليه وقال وين اهلك قال اهلي بالنفود قال ولا عيّنت لي نياق مذكورات لي بهالارض معهن لهن بكره ويقولون فيه انثى طاردتن قال الولد انا لي ثالث يوم اسرح واما الانثى صيحيح كانت تسرح بس قدر الله عليه وماتت قال الرجال اكيد اننا مكشوفين بلنا دربيل ومسرح الولد عنه ومقيولٍ له ان نشد احدٍ عنه قل ماتت الولد صغير ولا يعرف شي ولا بغى يسأله سؤال يوضح له شي كان بينه وبين البنت قال الرجال انت تعرف منير قصيركم(منير هذا بعرب البنت وكان خوي هالرجال) قال الولد ايه قال اجل ابعطيك ورقه له ابذكر له النياق غديه ان عرف عنهن شي قال [poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=2 line=200% align=center use=ex length=0 char="" num="0,black" filter=""] يامنير ماجاكم عن الترف ذكار= صحيح وان سخيف الروح غادي صحيح والا طنطنه علم قمار=القا عنه راع العلوم الوكادي تقل ضربت الكبد نطح بمسمار=من يوم جيل الموت للترف صادي ودك لو الدنيا تسمع للاشوار=والموت ياشينه نذيرٍ ينادي اوجس على كبدي تقل حر فوار= شي جرا جان البلى من فوادي [/poet] وهو يلف الورقه ويعطيه الولد قال عطه منير وان لقا النيا خله يشرط عليهن ويرسلهن لاهلنا وهو يرجع الولد لاهله ويروح لمنير ويقول يامنير قال نعم قال هذي ورقة من بناخيٍ لك يقول انه مضيع نياق وان لقيتهن يقول اشرط عليهن وارسلهن لاهلي وياخذ الورقه ويوم قراه يامنير ما ماجاكم عن الترف ذكار يمار مافيه الا البنت اللي ماتت قال اخس ياهالمليعين ليش ماعلمن ان بينه وبينها هدف معين حتى اني ابذل له مساعده ورد عليه يقول [poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=2 line=200% align=center use=ex length=0 char="" num="0,black" filter=""] صحيح ماهي طنطنه علم قمار=وانا عنه راعي العلوم الوكادي دنياك هذي ماتسمع للاشوار=تضرب على مشهاة نفسه عنادي لو شاورتنا ان كان حق ماصار=نهدي بلاشٍ عقب ضي الحمادي ونهديه للشلقان عفنين الاشوار=ونهديه من دون الرجال النوادي دنياك قبلك غربلت كل الاقسار=وقبلك تراها لبّدت للمهادي ودنياك ماضربه بالادنا والاوبار=وكم جمعةٍ شنت عليهم جهادي دنياك ماترحم كبيرين وصغار=جهيلهم واللي بسن الولادي ياحيف ياعضودٍ تقل وصف جمار=يودعهن القبر المهبا سمادي ونهود حدر الجيب غضات الاثمار=والدود ياكل مبطرات الفرادي تزاك ميتٍ فارشٍ ضيعة ابصار=والترف كنه صفقتن جوف وادي ياجيف ياهباس للترف قبار=لمت قرونه عقب ماهن بعادي [/poet] ويوم جاء من باتسر وهو يعطي الورقه للولد ويقول له اما يجيك هكا الرجال عطه هالورقه وقل له نياقه لقيناهن وارسلناهن لاهلك اما البكره دور العوض وقابل الرجال وقال له والرجال بين مكذب ومصدق ولا بغا الرجال يكشف الورقه قدام الولد يخاف انه يحس بشي وورجع لاهله وشب النار وفتح الورقه وقراه ويمار الحتسي صدق يوم يقول صحيح ماهي طنطنه علم قمار ..............وانا عنه راعي العلوم الوكادي وهو يجدع الورقه بالنار ويطيح وياخذ له ثلاثه اشهر كل يغاب عن الوعي يومين ولا وعا قالوا وش بك قال ظهري ... يكووه مع ظهره ويرجع يغمى عليه ولا وعا قالوا اهله وش يوجعك قال كبدي ويكوونه مع بطنه وعلى هالحال ولا علّم احد بالسالفه طبعا مادري وش كماله السالفه <<<<-----ياشينك تكفى كمل  طيب ولا يهمكم ابختم السيناريو من عندي وبعدها الرجال مات وسلامتكم ارجو اني ما اكون استبثرت زياده عن اللزوم وانشالله الاسبوع القادم قصه اخرى انتظرونا نواف-خالد |
|
|
|
27-09-2003, 19:16
|
#2 |
|
عضو شعبيات
|
خالد الشايع يامال العافيه على هالقصة . ملاحظه :- ويوم جاء من باتسر يعني بلغتنا يا شمر ( يوم جاء باكر ) . بس الشايع جابها على لهجتنا صقر الطنايا |
|
|
|
|
28-09-2003, 14:55
|
#3 |
|
شــاعــر
|
هلا بصقر الطنايا شرفت الموضوع يابعدي وباتسر جبته بلهجتي لهجه اهل حايل عموم وتحياتي لك |
|
|
|
|
29-09-2003, 09:21
|
#4 |
|
عضو شعبيات
|
ياسلأم ياسلأم شكرا لك ياخالد الشايع على القصه الجميله رائع دائمااااا تقبل تحياتي الخويطري |
|
|
|
|
01-10-2003, 08:53
|
#5 |
|
الـحـــرّاب
|
قصه رائعه يا خالد و اسلوب روائي شيق يعني الواحد ما يدري يقرا قصه و الا نكته هههههههههه سلمت يدياتك و بالنسبه ل باتسر فقلب القاف تزا و الكاف تسا هي مشهوره و متداوله في نجد عموما سواء في سدير و الوشم بحكم ان اقاربي من هالمنطقتين و شيبانا ما يحكون الا كذا يعني مجرد تنويه و تعقيب لكم التحيه يا شباب |
|
|
|
|
10-10-2003, 15:14
|
#6 |
|
شــاعــر
|
الخويطري اهم شي تكون جازت لك تحياتي لمرورك الكريم خالد |
|
|
|
|
18-10-2003, 17:24
|
#7 |
|
شــاعــر
|
محمد الحراب والله انك صادز وكان اسلوبي مثل ماقلت احتر الطبع الجديده من كتابي ابطبع على حساب نواف كم نسخه تحياتي لك يابعدهم اخوك |
|
|
|
|
20-10-2003, 07:51
|
#8 |
|
شـاعـر
|
الله لايهينك يابو وليد .. مؤثرة بالفعل .. أجمل تحية |
|
|
|
|
26-10-2003, 09:13
|
#9 |
|
شــاعــر
|
ابو صالح اسعدني اطّلاعك تحياتي لك اخوك |
|
|
|
|
30-10-2003, 16:42
|
#10 |
|
عضو شعبيات
|
السلام عليكم كيف الحال ياخالد وش اخبارك الله يعطيك العافيه على القصه الطيبه والقصايد اللي اطيب . وماقصرت . اخوك : ابو بندر |
|
|
|
|
12-11-2003, 11:01
|
#11 |
|
شــاعــر
|
ابو بندر وعليكم السلام وهلابك ومرحبا اسعدني اطلاعك |
|
|
|
|
15-01-2004, 19:09
|
#12 |
|
شــاعــر
|
up |
|
|
|
 |
| عدد المتواجدون في هذا الموضوع » 1 , عدد الأعضاء » 0 , عدد الزوار » 1 | |
|
|
|
|
