[كشاف مولع]

الحقيقة مشتاق لشعار الميدان

الشهر عليكم مبارك

واللي منه وحده يتفضل

ما ودي اطلب احد ويقال ما اقدر

سلام والملعبة عند المشاكيل=مطعومها ياجماعة طعم حالي
ادور الشاعر اللي يذبح الحيل=ماله بهرج الخياعة والخمالي

[محمد المهنا]

السلام عليكم ورحمه الله

الشهر عليكم مبارك ياجماعة الخير

وكل عام وانتم بخير

الشاعر كشاف مولع اتشرف وانا اخوك باللعب معك

استلم طال عمرك:

يامرحبابك عدد وبل المخاييل =من شاعرٍ به براعه ما يبالي
ابشر بمن هو يسد النوب حلحيل=والحرِّ عند ارتفاعه ما يطالي

[كشاف مولع]

هلا والله بك يالغالي

اسمك عجب والعجب في سرية الليل=لو طالت السالفة ياهم لالي
عساك ترقى الطويلة مع هل الخيل= ما تنعثر في طويلات الجبالي

[محمد المهنا]

مرحبا فيك ياكشاف مولع

ما ابطى من جا

استلم لاهنت

اسمي برسمه واعز الربع بالحيل=وان طالت او قصرت متان(ن) حبالي
صاحبك له خبرةٍ بالوزن والكيل=منته بحوله ليا جاله مجالي

[كشاف مولع]

لاهنت يا نسل الحرار

استلم يالنشمي :

والله مدري عسى مابه بهاذيل=خلتك تبدي الكلام الارتجالي
اسمك برسمه صحيح وتعدل الميل=لكن لزوم يتميز راس مالي

[محمد المهنا]

كل عام وانتم بخير ...وعيدكم مبارك

ولاتهون ياكشاف مولع الله يحييك

استلم لاهنت:

الحنظله ما حلت لو هي على النيل=وبالشجره ام الورق تلقى الظلالي
ترى ضعيف النظر يحتاج دربيل=ومن دون هيل الحبش سقت الدلالي