[سالم بن لجعان]

سلام عليكم

والله انكم غالين .. والله انكم على البال .. والله اني مقصر واطلب العذر على البطا

ليا شفت النوايا البيض ضاعت في القلوب السود
ومفتاح الفرج من دون بيبان البخت ينفا

فشرهاتي على الساعه وممشاها علي بالكود
... ... وصبح مارضى يلفي وليلا مانوى يغفا

خذيت من الدقايق سيطره ومن الاماني عود
..وعلقت الدقايق بالاماني من قبل لا اجفا

تبسمت بتفائل في زمان حاجبه معقود
وخذاني الوقت وسنين العمر تجري ولا تحفا

تناسيت الحياه اللي بها من يلحق المطرود
وتذكرني الطموح اللي ركز في قلبي الشلفا

ولقيت اني مكاني اللي سكنته يوم انا مولود
بوقت اللي من الأحلام هذا الفا وذاك اقفا

يشح الغيم بامطاره تكاثر بي شوية جود
وانا اللي في حياتي ماتمنيت السما تصفا

تركتك ياسماي وقلت لايمكن عليك اعود
لو ارضك من كرم ذاتك تقوم بنبتها ترفا

ويم اللارجوع اقفت مراكب حلمي المفقود
.......الا يالله تجعل للحقيقه ساحل ومرفا

يسود الصبر في ذاتي وذاتي مات قبل يسود
...وش اكبر من طموح الدار للي غربته منفا

جروح الناس يشفيها الزمن بالنقص ولا الزود
ولكن لو زماني هو سبب جرحي متى باشفا

ادور للدفا من لفحة الواقع واسوق الذود
ولكن للاسف خاواني الواقع يبى يدفا

احس اني انا الغايب متى احس اني الموجود
....متى احس اني اللي لاطلب حريته يعفا

ثمان سنين فاتتني وانا بك يالصبر موعود
ومصيبه لو بكبرك يالصبر من يوعد ولا اوفا

تصرف يازمن فيني وفيني لاتشوف حدود
الا ياوسعني ياوقت ما اعظم ماهنا يخفا

تبى فرحه تبى ضيقه تبى دمعه تبى جرعود
...تبى غربه تبى ديره تبى روحه تبى ملفا

انا موسوعة استقلال انا قاموس انا تلمود
معي سيره ولي ديره عليها غربتي تضفا

اسولف لي عن الماضي وازف لحاضري منقود
بعد ما كنت انا الوافي ياكيف اصبحت انا المجفا

ولازال البخت مبحر على لوح العمر والنود
...تسوقه لا اتجاه ووجه لا وجهه ولا مرفا

تفضل يازمن هذا انا خذني بدون قيود
سوى اني مستحيل اقول وقف يازمن تكفا

وسلامتكم

[علي الأسمري]

ان غبت وجيتنا بمثل ذي فعذرك مقبول
بيض الله وجهك وصح لسانك ياغالي
كل عام وانت بخير

[سالم بن جلعان]

الله الله يا السمي
صح لسانك مليون ولا يكفون
نص جميل يشفع لغياب نتمنى أن لا يتكرر
حضور باهي في نص ولا اروع
مبدع يا سالم مبدع

اخيك

سالم