[منتهى القريش]

رتب أوجاع الغياب
ولا تمر
ما ابي تخطر ببالي
طيف ذكرى في خيالي
وفرحتي بجيتك ..
حتى لو كانت كذب
ما أبيها تحتضر

التفاتاتك وصوتك
حتى حكيك أو سكوتك
والدفا .. الـ كنت أدوره في يدينك
ضي عينك ..
انطفى بي ..
من عذابي ..
صار يشعلني جمر ..

[منتهى القريش]

شوف عيني .. من كدرها
لو تمرها
ينتحب شوق اللي بيها
وتحتريها ..
غيمه مليانه قهر

الغدر!
تعرف اشمعنى الغدر؟
لما إحساسك يخونك
لما تلعب بك ظنونك
لما ترسم لك عيونك
لوحه أحلى م الحقيقه
وتكتشف كذبة خيالك
وش بقى لك
غير أحزان وشجن
تلونك عتمه وسهر ..

[منتهى القريش]

تعال
خذ باقي حنيني
روح عني ما أبيك
وحتى آنا ما أبيني
هو مني ولا منك ..
اختلط شكي ابـ يقيني
قولها وبكل صراحه
ما تبيني؟
ولا إنك .. تبغى تملاني كدر ..

[منتهى القريش]

وش أقول
والكلام الي اشتهيته..
ما لقيته
وما عرفت اشلون اقوله ..

[منتهى القريش]

الغياب ..
مو عذاب ..
شي أكبر ..
غصن يابس ..
كان في يوم أخضر ..
وانكسر ..

الجراح
مو ألم ونقول راح ..
شي أخطر ..
ذكريات .. ناس ..
رحلة من مواجع ..
بيوت .. أرصفة ..
زحمة شوارع ..
أفراح كانت ..
ثم صارت ..
أحزان فينا تنتحر ..

[منتهى القريش]

ما تعلمت اكره ولكن ..
اليوم أكره كل شي ..
يمكن..
لأن الأشياء عندي ..
اليوم صارت ..
ما تعني لي شي ..

[منتهى القريش]

رحت
أخذت الضي بيدينك
لجل عينك
بقت روحي مع العتمه
تعال وسدده دينك ..

عطني ما بقى مني
حنين الوقت بعثرني
أنام أتوسد ادموعي
ويلحفني .. صدى وينك؟

يموت الصمت بـ اشفافي
وجفني لو يكون غافي
يصحيني
واسألني .. أنا ويني؟
ألاقيني .. بنص الهم
مسافه بيني وبينك ..

على رمشي
تعبت أمشي
مشاوير القهر وحدي
تعال ولو تكون ضدي
خذ ادموعي قرابينك ..

[منتهى القريش]

(وترحل)
وانا أذبل
وثوب الفرح يتبدل
وتاخذني مشاويري ..
تلبسني مقاديري
ثياب الهم
وأتبسم
واغني لك ..
(مقادير يا قلب العنا) وينك ..

على صوتي.. يموت اسمك
ولا همك
وجع يسكن بتفكيري
يهز النوم في جفني
ويحضني ..
سهر محموم
وكلما غمضت عيني
يفز النوم ..
ياخذني الـ عناوينك ..
عنا .. وينك؟

[سرحان الزهراني]

صباحك شعر ، يا منتهى الشعر

[منتهى القريش]

إقتباس »

الرسالة الأصلية كتبت بواسطة سرحان الزهراني
صباحك شعر ، يا منتهى الشعر

سرحان

وبحضورك الصباحات والمساءات تصبح أجمل ..

[منتهى القريش]

المشاعر
كذبه يمكن!
ولا لوحه ..
ملونه بـ احساس شاعر

الدفاتر
أوراق .. ماضي .. ذكريات
اسم حي .. وإسم مات
الي سافر .. والي أقفى ..
والي بيته صار منفى
والـ حمل حزنه على كتفه وهاجر

النواظر
عيون كانت ..
حتى في الظلمه تشوف..
ولما رمش الليل مات ..
صارت الدنيا كئيبه ..
فيها خوف وفيها ريبه ..
وأيقنت .. هـ الليل كافر

[منتهى القريش]

ما أبيك
عزة النفس الي فيني ما تبيك
بس جيت أسأل .. كيف حالك؟
تكفى طمني عليك ..

[منتهى القريش]

غبت ..
وما تركت إلا الحنين
وحلم مكسور الجناح
إنت قاسي؟ ولا ناسي؟
ما أظن .. يسعدك نزف الجراح ..

وين وعدك
(لا تخافي .. دللي كل الأماني)
وهذا صدك ..
في لهيب الإنتظار ..
كم بكيته .. كم شكيته .. كم رماني

تعال
والله مشتاقة اشوفك ..
مرني لحظه ..
رجع الوقت الي راح
مرة وحدة لو تمر ..
يشتعل شوقي جمر ..
ومن كثر ما كنت اعاني ..
يمكن أفرح بك ثواني ..

[منتهى القريش]

(لسه فاكر)
ولا إنك بعد هجرك قد نسيت ..

[منتهى القريش]

حبست آهاتي
في قفص صدري عصافير
من كثر ما ضاق بيها
تبغى لو لحظه تطير ..