[أبو وفا]

بسم الله الرحمن الرحيم






يقول علي القحطاني






ياقرب واشنطن ولندن وباريس..
.......................... حذفة عصا للي رصديه ملايين.!

وأنا اقول وبالله التوفيق وانتم عليكم التدقيق والله يستر لا يغلى الدقيق
ياقـرب بنـده والتميمي مـع عثيـم
0000000حــذفـة عصا للي يريـد السياحـه
فيـها البضايـع نظمـت زين تنظيـم
0000000وفيها التمشي بين الاسياب راحه
الجــو بارد و السـمـا لبـدت غيــم
0000000كنك بوسط الشام جالس بواحــه
ومن راح للخارج يبي يلحقه ضيم
0000000واخص منهم كل من به شفاحـه
وسياحـة الداخـل تحـطمـك تحطيـم
0000000السعر ( ماينطال ) بـ أبها وباحـه







السلام عليكم ورحمة الله وبركاته <<< بدري يابو الشباب !!




الله حيهم كلهم من اول يوزر الى اخر يوزر ياالربع تراني حالف لاحد يقوم انا خابركم مثلي ( ذبحني الحر مايرحم ) الله يعييننا اذا جانا طباخ الاوادم مدري طباخ التمرخاصة الضعوف اللي مثلي مالهم حيله ولا احتيال من الهروب منه ( العين بصيره واليد قصيره ) وش تسوي ؟ خاصة اذا شفت اقاربك و اصدقاك ( اللي خذو من شركات التقسيط علشان يسافرون )..ففي مثل هذه الحالة لابد انك تحاول الإستمتاع وتقول لنفسك وربعك اللي هم مثل حالتك , ترى عندنا اماكن سياحيه ممتازه عندنا بنده واجيان وهيبر بنده والعثيم لعنبو بليسكم اذا رحنا من نخليهن له ؟ هاه علموني بس تبون تمشون ؟ تبون البراد والجو الزين ؟اتحداكم تجيبون لي ديرة مثل جو بنده؟ مالكم الا عقب ماينتصف العصر نتواعد يوم نروح لبنده ويوم للعثيم وكل يوم في سوق مثل ها الاسواق ابد راس مالها عربية تاخذها من عندهم ولا منك بغيت تطلع خلها متسانها وتوكل على الله.. وبعدين يا الربع (وشو له) تسافرون وتقطعون صلة الرحم اللي ومر الله بوصلها ايه لاتستغربون.. حنا ترانا معد نشوف ربعنا مثل منول وش بلاحن ( بلاحن اي وش السبب) .. بلانا والله....أأ >> توهق معد يدري وش يقول..بلانا والله مدري كل واحد يسأل نفسه عن ها السؤال . المهم اقعدوا الناس ماتعرس الا في العطلة فهي احسن فرصه تشوف فيها جماعتك وربعك وبها الطريقه وين يضيق صدرك معه؟




ففي هذه المناسبه احب اعطيكم سوالف صارت لشباب اعرفهم كانوا أربعة أصدقاء طاحوا في(عرض كل حتى الإشباع) ب19ريال اللي يقدمها كنتاكي وبيتزا هت وفي روايه( بيتزا هوت) الخلاف لفظي ولكن بسببه احيانا قد يمتد الى تطاول الأيدي بينهم ماعلينا ، المهم الشباب عزموا الروحة لم بيتزا هت من اجل العرض (كل حتى تشبع ب19 ريال) ويوم وصلوه وكل واحد منهم طاقته النفاضه من الجوع الا وواحد منهم مدري وين جاه ( الورع الديني معه ) مدري من الجوع ؟ وقال يا الربع ترى اللي نبي نسويه فيه غبن ولا يجوز وهذا حرام ! رد عليه القائد المحنك وقال ورى ماتنثبر؟ هذي مطاعم عالمية عارفين حسبتهم وين غبن معه؟المهم وهم عند باب المطعم بغوا يتطاقون هذا يقول حرام وهذا يقول الله واكبر هالحين صرت تعرف الحرام وفعلك ذاك مهوب حرام وفعلتك ذيك مهيب حرام ! ابد هذا حنا( نغص بالما ونجرع البعارين) .. واخيرا اتفقوا يكلمون شيخ يفتي لهم في حكم الأكل من هالمطاعم اللي مسويه عض كل حتى تشبع وخذ جواله هاللي يقول حرام ودق على الشيخ وقام يقول ياشيخ الغبن وعدم معرفه الطرفين ومدري وش بعد؟ وبينما هم على ذا الحاله الا واللي جمبه يخمط الجوال، وقال ياشيخ عفا الله عنك ترا الجوع طقنا الين قال بس وحنا قاطعين لنا دروب مهيب سهلة وحنا هاليحن عند باب المطعم هها ندخل ولا نعود لبيوتنا؟قال الشيخ انتم الآن عند باب المطعم ؟ قالوا كلهم ايـــه ايـــه اجل وين احن فيه؟ قال لهم الشيخ دامكم عند الباب فادخلوا وكلوا وهذه المسأله تبحث فيما بعد >> شوفوا الناس اللي تعرف تسأل ..
وبعدها اقتحموا المطعم وخذ ياطلبات هات بيتزا سوبر سبريم وبيتزاحلومي وخضار وجبن. وكان التركيزعلى البيتزا الرقيقه مع اخذ الحيطه فيما بينهم والتنبيه على عدم أكل ( الحوايف ) ومن يوم ينتصفون في البيتزا يطلبون ( بيتزات نفس الطلب السابق )علشان مايخلصون الا وجايهم الطلب الثاني >>خبره طويله في محافل المأكولات وصاروا على هالوزنيه حتى كان جمبهم ثلاثة مصاريه اصغر واحد منهم مايدخل مع الباب لكنهم ما ابلوا هالمصارية مثل مابلوا اخويانا وبينماهم على هالحاله ومنهمكين في آداء واجبهم ,,مادروا الا وهذا مدير المطعم جايهم ويقول لهم يا اخوان هذي فلوسكم خذوها واللي كلتوه حلال عليكم مانبي منكم شيء بس تكفون تفضلوا برا المطعم ولعد نشوفكم وجيهكم مرة ثانية والظاهر صوروهم وعمموا على جميع الفروع ان العرض لايشمل أصحاب هذه الصور





وبعد هذه الحادثة جلسوا يتناقشون في وضعهم وما الواجب عليهم فعله فقال أحدهم مالكم الا صالات الأفراح تلقون العشيات الزينه والمفاطيح لحم طازج يا الله من فضلك مهوب مثل المجمد الله يرزقنا شكر النعمه >> ابد مهموب يسنتر في تفاحه رد عليه صاحب مقولة الغبن وقال له هذي تعد سرقه وتبينا نصير طفيليين ؟رد عليه الأول وقال انت هالحين اذا مريت حول باب القصر مهمب يقولون لك الله حيه يامرحبا تفضل الله يحييك قال الا بلا قال الاول خلاص اجل وين طفيليين معه ووين سرقة معه؟وانت ماسمعت ب( لك او لأخيك الذئب ) حنا نقول لك او يكب في الزباله فإذا علمت انه بيكب في الزباله وجيت وتعشيت معهم تؤجر على هذا الفعل >>الله لايحرمنا من أهل العلم ..فبعدها اقتنعوا واتفقوا فيما بينهم أنه كل ليلة على واحد يعني يعزمهم في قصر عروس ويعلمهم مكانه ومشت امورهم وصاروا كل يوم في قصر عاد كل واحد ينتقد عزيمة الاخر ويمدح عزيمته >> مصدقين انفسهم فكل واحد يقول اجل بالله عزيمتك ذيك زينه ؟ وحنا ماتعشينا الا الساعه 12 والثاني يرد عليه على الأقل احسن من اللي عازمنا عند ناس جايين للقصر ( بتكاميل ) يرد اخر الصراحة كلش ولا عزيمة فلان اجل مافي القصر احد(ن) ابيض الا حنا ويوم قلطنا الاويجينا المعرس ويقعد معنا الا بيقعد,, نقول يابن الحلال مافيه مكان ويقول طالبكم تفسحون لي,,يحلفون ان ابو العروس يبي يدخلة على العروس وهو يقول طالبك تصبر شوي المهم في حدى الزواجات ويوم دخلوا القصر الا ويلقون ربع واحد من هالشله وصار خويهم معد يدري وش يقول لهم انتم من اهل المعرس والا من اهل العروس؟ماش صارت قديمه ..
واحتاروا وش لون يصرفون رفيقهم من الورطه الا و(المحنك ) منهم قال بس عز الله اللي مهوب لاحقكم ضيم وانا معكم قالوا وش نسوي قال لاتسوون شي خلوا الباقي علي ويروح يمسك سرىمع اللي صافين يبون يسلمون على المعرس ويوم وصله الدور سلم على المعرس وقام يحبب المعرس وصور معه عدة صور ثم رجع وقعد مع ربعه ، وقال هالحين ابن امه يحاتسيك اويقول لك شيء طبعا عقب ماسوى ذا الحركه خلاص صاروا يدخلون القصور (بألب قامد ) وبكل ثقة وكأنهم القائمين على الوليمه بل اصبحوا يأمرون القهوجي بل واحيانا يدخلون المطبخ لإعطاء التعليمات للطباخين الين جت ذيك الليله وكالعادة دق عليهم اللي عليه الدور وقال ترى الوعد الليلة في قصر ليلتي لاتخلونا ويوم دخلوا القصر تفاجأ (المحنك ) منهم ويطالع في العرس ماش تسنهم مهمب غريبين عليه ويناظر زين الا وهذا عرس ولد عمه على اخته ولا هذولي كل جماعته جايين عن بكرة ابيهم وهذا ابوه وعمه واخوانه مرتزين عند الباب




نفس ذا الشباب ايضا ..وبالتحيد في شهر اغسطسط وفي عز الحر اقترح عليهم احدهم ان يذهبو الى الدمام . المهم ذهبوا وسكنوا في الدمام في شقق مفروشه نسيت وش اسمها لكن ان ماخانتني الذاكره فهي( خليجي بلازا ) ماش الشباب انطبخوا حر ورطوبه مع ان كل واحد قاعد قبال المكيف ومابينه وبين المكيف الاشبك المكيف ماش ومع ذلك ماصلح لهم الوضع ياالله استحملوا 3ساعات ثم دقوا سلف ودزوا للخبر وبتحديد شارع الملك خالد وسكنوا شقق برضوه مدري وش اسمها لكن اعتقد ان فيها قولدالحاصل,, ميزة هالشقق ان مكيفها مركزي استانسوا وانبسطوا أيما وناسة وأيما بسطه المهم جا وقت العشاء طبعا بحكم انهم ممنوعين دوليين من وجبات العرض اللي ذكرت انفا فيتطلب الامر ان واحد منهم يجيب العشا والباقين يجلسون شيئ اكيد وكما هي العاده كل واحد يتهرب من الطلعه خصوصا ان الجو مايحتاج >> عزتي لعوايل الرياض كلهم مسنترين على الهاف مون مدري وشوله رايحين,,



واخذوا في مهاترات المهم بعد خمس ساعات بس ولله الحمد والمنه اهتدوا الى حل وهو يطقونها قرعه واللي تطلع عليه يروح يجيب العشا وكماهي العاده حنا كعرب نحب دائما نلف وندور, وندور ونتحايل على القوانين و القرعه يحطها احدهم والموثوق به حط في كل اسابعه الأربع قراطيس.. ثم يخليهم يختارون ثم يفتح على وحده بس لواحد منهم وبكل بساطه يروح يجيب العشا وصارت القرعه دائما تجي عليه طوال المده اللي قضوها في الشقه وهي مايقارب الخمسة أيام>>والضعيف يقول ايه هذا حظي من عرفته والباقين ماغير يصكون المكيف اذا ماتوا برد ثم شوي يشغلونه وماغير ، جرع في هاالوجبات وهالاعسكريمات يحلفون انهم قاعدين خمسة ايام ماطلعوا من الشقه ولا حتى لبسوا ثيابهم ماغير عليهم هالقمصان طبعا الصلاة جمعا وقصرا بفتوى من صاحب القرعه قدس الله سره وديده. المهم يوم جوا يبون يروحون طبعا كل واحد خذ ثوبه يلبسه،
ماش كل واحد عجز يلبس ثوبه وكل واحد يقول من اللي خذ ثوبي؟ هذا مهوب ثوبي! ويوم ناظروا الاهذي ثيابهم نفسها ولافيها مشكله, المشكله في بطونهم اللي انتفخت! وين ماتنتفخ بطونهم وهم داخلين مشروع تسمين ..وصاروا مثل سالفة الحصني ( الثعلب ) اللي دخل المزرعه من جحر صغير ويوم بلع من هالدجاج ويوم شبع معد قدر يطلع

مايستفاد من الموضوع


1- يقولون ان المعرس اللي سلم عليه ابو الشباب وصور معه عدة صور , من بكره وراها اهله واهل مرته وماعرفوه هو يقول هذا من جماعتكم وهم يقولون مانعرفه ثم وراها رمته وقال من هذا ؟قالت ما اعرفه قال الا تعرفينه ونص قالت تشك فيني ؟ قال مهوب مسألة شك.. قالت اجل وشو ؟ وكلمه منه وكلمتين منها وآخرتها اتهم زوجته ان لها علاقه معه وبالاخير طلقها ,,الظاهر ان اللي صور معه كان مزودها حبتين في التبويس

2- تجد الكثير ممن اذا عزمه قريبه ولزم عليه تهرب منه ولم يأتي اليه بحجة انه مرتبط واظن ارتباطه مهوب بعيد عن اللي مادرى عن عرس اخته اللي ذكرته في الموضوع انفا

3- كل واحد يسأل نفسه هل هو ( يصل رحمه )؟ وإذا كان الجواب لا.. فـ يقول لنا ماهي الأسباب في عدم صلته لرحمه؟

وتقبلوا تحيات محدثكم ابووفى

[حسن آل مسفر]

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه

<<<<<< فاطس ضحك على اللي مسكت معه على دين يوم وصلوا للمطعم

ابو وفا ياحبي لك

لي يوتيرن

واكيد ابرجع بموقف

[الجازي]

.

وفي روايه( بيتزا هوت) الخلاف لفظي ولكن بسببه احيانا قد يمتد الى تطاول الأيدي بينهم ماعلينا

فإذا علمت انه بيكب في الزباله وجيت وتعشيت معهم تؤجر على هذا الفعل >>الله لايحرمنا من أهل العلم

ويروح يمسك سرىمع اللي صافين يبون يسلمون على المعرس ويوم وصله الدور سلم على المعرس وقام يحبب المعرس وصور معه عدة صور ثم رجع وقعد مع ربعه ، وقال هالحين ابن امه يحاتسيك اويقول لك شيء

1- يقولون ان المعرس اللي سلم عليه ابو الشباب وصور معه عدة صور , من بكره وراها اهله واهل مرته وماعرفوه هو يقول هذا من جماعتكم وهم يقولون مانعرفه ثم وراها رمته وقال من هذا ؟قالت ما اعرفه قال الا تعرفينه ونص قالت تشك فيني ؟ قال مهوب مسألة شك.. قالت اجل وشو ؟ وكلمه منه وكلمتين منها وآخرتها اتهم زوجته ان لها علاقه معه وبالاخير طلقها ,,الظاهر ان اللي صور معه كان مزودها حبتين في التبويس

الله يوسع صدرك يابوالوفا من زمان محتاجين موضوع مثل هذا وجا في وقته صراحه

كل واحد يسأل نفسه هل هو ( يصل رحمه )؟ وإذا كان الجواب لا.. فـ يقول لنا ماهي الأسباب في عدم صلته لرحمه؟

والله انا بأرد من منظار الشباب
وين بيفضون لصلة الرحم وهم مايفكرون الا ببطونهم
اظن لو اقاربهم عندهم عزايم دايم كان الله الله من البرّ وصلة الرحم اكيد

تسلم بابوالوفا
موضوع دسم بالحييييييييييييييل

لا تحرمنا من طلتك على شعبيات
أطيب تحية

.

[سيف الرعد]

الله يجعلنا نوفيك حقك يابو وفا

والحقيقه مثل ماقال علي القحطاني للي رصيده ملايين ,,,, والضعيف ضعيف
وشكرا على المعنى الاجمالي الأخير بس ليتك حطت معاني الكلمات بعد
اما منطرف السياحه الخارجيه فالحقيقه انها صياعه ماهيب سياحه وخلوها على الله ومانقول إلا الله يوقا شباب المسلمين
اما منطرف المعرس إللي طلق مرته الظاهر انه من نمونة الشله آنفة الذكر ابطال القصه
واما من طرف صلة الرحم الله يرحمنا برحمته كلنا مقصرين وكل يحاسب نفسه قبل ما يحاسبه ربه والله يجزاك خير على هذا التذكير الطيب وامتعتنا الحقيق بالقصه التي ماعرفنا لها راس من ساس إلا في الاخير وبيض الله وجهك

[نورة العجمي]

ياحيا الله ابو الوفا
شرفت ونورت ياسعادة الباشا

الله من السواليف عندك اللي توسع الصدر
والله انسجمت مع سواليف هالشباب اللي مثل المسلسل
وليتها تصير مسلسل مكسيكي من ميه وطعش حلقه وان صارت ميتين ماهيب شينه بعد
والله انهم رايقين شكلهم لاشغل ولا مشغله
تسلم والله على هالجيه السنعه
عساها تصير عاده بس

الله يوسع عليك دنيا وآخره مثل ماوسعت صدرونا بهالموضوع الرايق

كل الود

[عنود]

النياحة على السياحة .. والعسير في عسير

من قريت العنوان وانا اقول اكيد موضوع ماهوب صاحي

ولاخاب ظني بالرفيق الموالي

يقولون ان المعرس اللي سلم عليه ابو الشباب وصور معه عدة صور , من بكره وراها اهله واهل مرته وماعرفوه هو يقول هذا من جماعتكم وهم يقولون مانعرفه ثم وراها رمته وقال من هذا ؟قالت ما اعرفه قال الا تعرفينه ونص قالت تشك فيني ؟ قال مهوب مسألة شك.. قالت اجل وشو ؟ وكلمه منه وكلمتين منها وآخرتها اتهم زوجته ان لها علاقه معه وبالاخير طلقها ,,الظاهر ان اللي صور معه كان مزودها حبتين في التبويس

لاحووووووووووووول لهالدرجه الناس مفوته

يسلمووووووووووووووا على هيك موضوع

[عنودالصيد]

ابوو وفااا


موضوع مايحتاج مدح .. لان مواضيعك تمدح نفسهاا

الله يسلم ايدينك ... وفعلن سياحتنا الداااخليه تحطيم

المهم اقعدوا الناس ماتعرس الا في العطلة فهي احسن فرصه تشوف فيها جماعتك وربعك وبها الطريقه وين يضيق صدرك معه؟

انا اكره العطله بسبب العرووس لا جينا بنروح والا بنساافر
والا نستاانس.. لااا اقعدو عشان عيال عمكم ولا عيال عماتكم والا بنات خلاتكم كلهم بيعرسون
والعطله اللي ننطرها طول السنه ترووح وااجباات اجتماااعيه ... ياخي ترى عادي الناس
تعرس بالدراسه ماهوو حرااام <<< افتت




ملاحظه اخيره

ابو فااا طلبه لاتكتب بالاخضر عجزت اقراء

[تركي]

فإذا علمت انه بيكب في الزباله وجيت وتعشيت معهم تؤجر على هذا الفعل >>الله لايحرمنا من أهل العلم ..

خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخ

يازين سواليفك يابوالوفا
والله ياني مسكت خط ضحك ماعرفت ارجع خخخخخخخخخخخخخخخخخخخخخخخخخخ

ياحبيلك وسواليفك

كلها ملح وقبله وتوسع الصدر

لكــ التحية