[حمود الصهيبي]

اللي سواتك يالسنافـي يلمـس الجـرح ويطيـب
الله عطـاك المعرفـة يـوم غـيـرك تجهـلـه

واللي يشب النار من صغـره يسمونـه شبيـب
والمرجلـة ماهـي ببـاب فـي يدينـك تقفلـه

واللي يحط اذنه على بيت النمـل يسمـع دبيـب
هذي رسالـة مرسلـه عبـر الريـاح المرسلـه

واللي يوديلك علـوم اعلـوم مـن يمـك يجيـب
يااهل النوايا المجهمـه كـلٍ علـى قـدر عملـه

والطبـع غالـب والطبايـع لاتـزال ولاتغيـب
والصدق منجاة الرجل والكذب وجهـه تـب لـه

والحر في راس الجبل والصيد في بطن الشعيـب
والجود راس المرجلـه والشـح مابـه مرجلـه

والريح لا منه تهـادي مّيـل الغصـن الرطيـب
والصمـت هيبـه والرجـل مايلتفـت للبلبـلـه

والحق صوت ضاع مابيـن المنـادي والمجيـب
والفتق عندي ميسمـه يـا آخـر الطـب أولـه

صب المبادى بالضلوع الحدب لو صدرك حضيب
والقـوس سـره بانحنـاءه فهمـوا مـن يعدلـه

عنز المدينة وش بلاهـا تتبـع التيـس الغريـب
حتـى لحاجتها البهيمة تيسـهـا ماتقبـلـه؟

[علي ال شيبان]

قصيدة تصبّ لنّا بعض المبادئ بالضلوع الحدب عن طريق فعل الأمر
لنكتشف من خلالها عنّاد عنز المدينة ,
قصيدة تبتديء بالسنافي لنقف عند الحاجة !!!!!!
قصيدة أعتمدت على الحدث الرمز ليتضح لنا بأن آخر الطب أوله ,
ومابين اللي و واو العطف قصيدة مفعمه بالحكمة والرأي والرأي الأخر !!
الله عليك يا حمود ,