04-12-2006, 09:15
|
#1 |
|
شاعـرة
|
وتسأليني
اغسلي.. من رماد الخوف روحي وضمدي... بعض الجروح النازفه خايفه؟ تموتي قبلي.. أو أنا قبلك أموت؟ اعذريني تنحني قامة عيوني وروحي يتعبها السكوت وتسأليني يمه ويش يعني البعاد؟ شنهو يعني نفترق؟ أختنق ويموت في حلقي الجواب واضيع في لحظة غرق تقولي يمه: شنهو يعني لما يتقرر مصير؟ وينكتب فوق الورق واحاول اشرح.. وفيني تحتار الحروف واقول يعني... لما نفرح بس تقسى هالظروف.. والدقايق تنسرق ويكتبوا (تقرير طبي) الدقيقه.. يكسروا فيها الثواني يجرحوا كل الأماني يزرعوها انتظار والليالي تمر طويله والثواني تحترق وتسأليني ليه يا يمه.. ما تبغيني أحلم والون احلامي شموس؟ وارجع اصمت ينتحر صوتي ويموت اجاوبك.. وفي شفاهي كل كلامي يحتضر اخاف حلمك ينكسر اخاف في يوم القدر يزرعه بحضن السكوت حبيبتي .. اعذريني أخاف احلامك تموت وترجعي .. تزرعيني أسئله يمه ويش تعني الطفوله؟ يمه ويش نفع السنابل في الحقول؟ وليه بعض النخل يابس وليه بعضه يبقى واقف قامته تكبر تطول؟ وليه بعض الورد يكبر وليه بعضه يموت في حضن الذبول؟ وارجع بصمتي أداري لوعتي واتركك .. في عيونك.. تجتمع دهشه وذهول واهرب بوجهي لوجهي في المرايه واقول.. يا روحي كفايه يارب .. اتعبني التعب وطالت افصول الروايه يشتكي صبري لصبري مره يصرخ ملني عاف الهموم ومره يشفق.. يغص فيني ويشرب احزاني معايا وترجعي تسأليني بأي تاريخ انولدتي؟ واقول: تاريخك عذاب انسكب حبره ألم فوق أوراق الغياب احتفل به كل سنه.. شمعه ذابت ومنها قلبي جمره ذاب واقول يمكن.. يمد لي ربي في عمرك واحضن ايامك سراب وتسأليني .. يمه ليه سميتيني (صبا) وآنا أذبل والصبا أوراقه تزهر؟ وليه أختي مني أصغر قامه تطول .. قامه تكبر وأنا عودي ليه يابس ليه أصفر وابتسم لك وفي عيوني.. غيمه مليانه ضباب وآآآآآآه يا كبر العذاب كيف اجاوب والحزن يقتل اطياف الجواب اسكتي .. لا تسأليني واغسلي من رماد الخوف روحي خايفه؟ اعذريني.. خوفي أكبر واتركيني وحدي ابلع هالعذاب آنا أمك .. اتمنى في روحي ألمك واعطيك من عمري سنيني بس تكفي اسكتي لا تسأليني ارحميني من الجواب واعذريني لما خوفي ينكسر داخل عيوني اخاف نبعد.. نفترق اخاف بكره هالقدر يعلق بقايانا صور فوق جدران الغياب... |
|
|
 |
| عدد المتواجدون في هذا الموضوع » 1 , عدد الأعضاء » 0 , عدد الزوار » 1 | |
|
|
|
|
