[ابونوت]

أ عزّائي الغالين

هناك شعراء اثروا الساحة الادبية بشعرهم الشعبي وحلقوا بمعاني الشعر نحو افق راقي وجميل وارتفاعا عن الاسفاف والابتذال

من هؤلاء الشعراء الشاعر الكبير عبدالله بن عبد الرحمن السلوم يرحمه الله بحثت طويلا في شبكة الانترنت عن هذا الشاعر الكبير فلم أجد الا نزرا يسيرا لا يبل صدى ولا يشبع فضول متطلع ,, وإني لأعتب على شاعرنا وأخينا
خالد بن عبد العزيز السلوم ( ( خالد العنقري ))
ابن عم شاعرنا لعدم اهتمامه بهذا الأمر وتسجيل ما يقع تحت يده من شعر جميل لهذا الشاعر الكبير

إن هذا الشاعر من قبيلة بني تميم من فخذ العناقر وهذه القبيلة منتشرة بشكل كبير في انحاء الجزيرة العربية والعراق والشام

امتدحهم الرسول الكريم عليه افضل الصلاة والسلام بقوله (( اشد الناس على الدجال بنو تميم )) كانوا في عهد النبوة في وسط الجزيرة العربية تقيم حا ضرتهم في وسط نجد وباديتهم تنتشر في بواديه و كان منهم الفرسان والامراء والعلماء


وشاعرنا عبد الله بن عبد الرحمن السلوم العنقري التميمي هو محور حديثنا اليوم


ولد عام 1370 هجرية في بلدة القرائن بالوشم وهي قرية جميلة تجاور مدينة شقراء الواقعة غرب مدينة الرياض

كانت بيئة هادئة ونقية أخذت من البداوة كل جميل ومن الحضارة مثل ذلك لتكوّن شخصية ادبية متفتحة الذهن ,,,, والده شاعر مفوّه له قصائد اشتهر بها لا تقل جمالا وبهاء عن شعر كبار معاصريه وسابقيهم

لذلك كبر وهو يستمع الشعر ,, ويتغنى به رجال قريته اهازيجا و الحانا يسامرون به ليلهم الجميل

بعد ان اخذ ابجديات العلوم في بلدته اخذ شهادة الليسانس في التاريخ عام 1396 هجرية وذلك من جامعة الملك سعود ( الرياض) آن ذاك ,,,, تدرج في سلم الوظيفة الحكومية من خلال عمله في إمارة منطقة الرياض

فجمع بين تربيته الاجتماعية البسيطة وعمله داخل المجتمعات الرفيعة فاكتسب دبلوماسية اهلته ان يتبوأ المرتبة الرابعة عشرة في امارة منطقة الرياض حتى توفي وهو على رأس العمل

صدر له من الدواوين الخطوة الحائرة وقد قدم له الأديب الكبير عبد الله بن خميس حيث أسماه الخطوة الحائرة

كما صدر له (( ديوان الشاعر عبد الله بن عبد الرحمن السلوم )) عام 1416هـ ولا اعلم هل اصدر غير ذلك أم لا

إمتاز شعره بالجزالة في اللفظ والجمال بالأسلوب والرزانة في المفردة

كتب في اغراض الشعر المتعددة عاصر في شبابه كهولة الأمير الشاعر محمد الأحمد السديري

وكان بينهما مساجلات كثيرة جدا ابتدأها في كثير من الأحيان الأمير محمد السديري يرحمه الله وذلك اعجابا بشاعريته حتى انه أسماه بحتري الشعر الشعبي ,, شهد له الأمير الشاعر الكبير عبد الله الفيصل في لقاء مع الصحفي خضير البراق بقوله ((عبد الله السلوم قمة من قمم الشعر)) ,,, ساجله الشاعر الكبير محمد السياري رحمه الله كذلك راسله الشاعر الكبير عبد الله بن عون الرويس ,, والشاعر الكبير عبد الرحمن العطاوي ,, وعمير بن زبن بن عمير البراق ،، وكذلك الشاعر عبد الله السياري ,,, وشعراء كثير لن يسع المجال سردهم





له شعر وطني كثير فقد تغنى ببلاده كثيرا وبرموزها حفظهم الله

مما قاله بسيدي خادم الحرمين الشريفين

يابو فيصل لك من القلب حبٍ واحترام = يرفع الترحيب شعبٍ على حبك مقيم
أنت الى من قلت تافي وتصدق فالكلام = تظهر أفعالك ويدري بها الشخص الفهيم

ومن قصيدة القاها بين يدي سيدي سلمان بن عبد العزيز أثناء زيارة سموه لبلدته القرائن عام 1392 هجرية

هلا مرحبا ما هل هتّاف الامزاني = تحية وفاء يا سيدي طير حوراني
هلا عد ما هل المطر من سحابة = واجرى بامر الله شعاب وودياني
هلا من صميم القلب ابرفع مقامها = عن اهل القراين بالنيابة لسلماني

الى ان قال

هم صقور نجد اللي تذكر فعولهم = وهم درعها الضافي الى حل عدواني
وهم عزّها يا جعل ربي يعزهم = ويبني لهم في جنّة الخلد بنياني

إلى أن قال

الا يا ولد عبد العزيز الذي بنا = وشيد حصون ما يشيدهن انساني
أبو همّة حرر بها البر والبحر = من شرق الاحساء لين قبليّ نجراني

ومن وطنياته

اليوم هو يوم الوطن يوم الافراح = يوم تجلى فيه معنى السعاده
يوم غلاه مداخل كل الارواح = في كل عام يزيد حبه زياده
له قصة توج هدفها بالامداح = متلاحم فيها الوطن والقياده
قصة بطلها ما توقف ولا ارتاح = حتى بنى مجد الجزيرة وشاده
حر يباريه السعد وين ما راح = ان شاف طير يدرج الحوم صاده
ياما سهر لين ابلج الصبح ينباح = ما حط راسه فوق لين الوسادة

له قصائد وجدانيّة نالت اعجاب الكثيرين حتى انها لم تسلم من السرقة فقد ادعى احد الشعراء قصيدته الرائعة

حمام ياللي تزعج الصوت بلحون = نوحك طرب منتاب مثلي معنّا
يالورق نوحك زادني هم وشجون = ارجيك خفف لوعتي لا تعنّا
أنته مريح وبين غدران وغصون = وأنا عليل وخاطري ما تهنّا

الى أن قال

هي عادة الدنيا على كل مفتون = غاراتها بالناس يا ما سطنّا

ومن جميل شعره قوله يرثي صديقه محمد السياري رحمهما الله

لا والله الا راح للنفس محبوب = شيخٍ يخلّص فالملاقا طليبه
شيخٍ رفيع القدر عن كل عذروب = نفسه سمت عن كل شيٍ يعيبه

ومنها

دنيا كفى الله شرها تقل دالوب = ماكتب للمخلوق فيها يصيبه
من لبس فيها ثوب يفصخ بها ثوب = ومن عاش فيها ما خذ الا نصيبه

وقال في الامير عبد الله الفيصل حين شهد له بأنه قمة من قمم الشعر

شهادة التاريخ تبقى للأجيال = وشهادة الرجل العظيم محسوبة
وانا شهدلي زاكي أقوال وأفعال = عبد الله الفيصل سليل العروبة
الطيب ورث له من العم والخال = دوحة ذرا يلجى بها عن هبوبه

لشعره نسمة تجبرك على المتابعة حتى النهاية فرجائي من الأخ خالد تزويدنا بشيء مما لديه مخطوطا


شكرا لمن أعطى هذه الحروف جزأ من وقته الثمين سامحا لمن اراد النقل أن ينقل وما عليه سوى ان يشير الى المصدر

لكم اطيب تحية وأجل تقدير

[سعود الخويطري]

ابونوت


مـرحبا بك مليون في محلك

سيره ذاتيه لـشاعر رائع جدا : عبدالله السلوم و من قبيلة عريقه وتاريخيه ( بني تميم )

وبكل صراحه شاعر اعتبر من الشعراء الذي ظلمهم الاعلام

ونرجو من الاخ الغالي : خالد العنقري - ان يزودنا بقصايد بحتري الشعر النبطي , ويثبت على مسووليتي.

تقبل سلامي

الخويطري

[نورة العجمي]

صباحك ورد



الأخ العزيز ابونوت


سيره رائعه لشاعر رائع

فعلاً الأعلام ظلم هذا الشاعر , وولم يعطى حقه اعلامياً

وحق على اقاربه ابراز هذا الشاعر امام المهتمين بالشعر

وننتظر من اخونا خالد العنقري نشر مالديه من قصائد


لكم كل الود والورد

[الجازي]

الوالد العزيز ..


بادره رائعه ووفاء ليس بغريب .. من الشاعر صالح السبيل ..

شكراً على اثراء معلوماتنا عن هؤلاء الشعراء المتميزين ..

سبق لي أن قرأت للشاعر عبدالله بن عبد الرحمن السلوم مرثيه في ديوان للشاعر محمد بن احمد السديري

تعزيه لأبن الشاعر زيد السديري ..

ومشاركه مني لهذا الموضوع سأورد القصيده هنا منقوله من نفس الديوان



يا ( زيد ) قلبي مثلكم صار مفجوع
وقلب الّمحبه هو مقرّ الفجيعه


على فقيد راح ماهوب مرجوع
ارجى عسى اعماله تجي له شفيعه


يازيد شخص مات والراس مرفوع
يفرض غلاه بكل دين وشريعه


يازيد رجلٍ قاد حملات وجموع
تنقاد له كل المشاعر مطيعه


ساعة سمعت العلم يازيد مسموع
من حسرتي ضاقت علّي الوسيعه


أصبحت قلبي من مجانيه مشلوع
والعين تذرف بالدموع السريعه


الموت حق وللمخاليق مشروع
وارواحنا يازيد مثل الوديعه


مرحوم ياشيخ يخلّي الصعب طوع
مواقفه تعرف نهار الوقيعه


مرحوم يارمز الشرف طايل البوع
من عاش حتى مات نفسه رفيعه


لعل قبرٍ فيه ابوزيد موضوع
تسقيه نفحات السحاب المريعه


ولعــلّ شمل يوم هو حيّ مجموع
مايفترق تبقى حصونه منيعه



وبأنتظار الشاعر خالد العنقري في بقية القصائد ..


أطيب تحيه لكم ..

[عبدالله البكر]

.













يسلم هاليديات ياخال .. !

موضوع غني إلا أبعــــد درجــــة ..
أسلوب سرد رائع .. وفكرة إنتظرنــــاها منذ زمن ..


شكرا ً لك يا صالح ..
مددا ً بلا عدد .. !





الشاعر عبدالله السلوم ..


أشهر من نــار على علم ..
كــدت ان أكتسي بهجـــة بالمشاركــة في إحدى قصائده الجميلة التي أرسلت لي منذ زمن من أحد أقاربـــه ..

ولكن : لم أجدها حتى الآن للأسف ..








إلى أن أجد ما استطيع .. !



شكرا ً لك يالسبيل .. شكرا ً كثيرا ُ جمـــا ..




.

استاذي ومعلمي القدير ابو نوت
السلام عليكم ورحمة الله وبركاته
اشكرك شكراً جزيلا نيابة عن ابناء عمومتي ... عبدالرحمن واخوته ابناء الشاعر عبدالله رحمه الله
لقد كتبت ما كان بودي ان اكتبه... اما وان جاء بقلمك العطر فقد صاغه صياغةٍ ادبية
ونزولاً عند رغبتك ووفاء لهذ الرجل سوف اورد ما استطيع من قصائد للشاعر او ما داربينه وبين شعراء جيله
اكرر شكري لك كما اشكر الاخت الجازي على كتابة القصيدة الملحقة بردها

تحيات

اخوك خالد بن عبدالعزيز السلوم

قصيده عمير بن زبن التي ارسلت للشاعر عبدالله السلوم من الطائف عام 1399

نويت ثم ارسلت من غير فتلي= كلام من حبر على الطرس مكتوب
يحكي بصدق قصته قد جرت لي = حبيت انا ابعثها لشاعر وموهوب
عبدالله السلوم أديب زهت لي= علومه مع افعاله على الجود منتوب
نعم الصديق اللي صحيح ظهرت لي = خصال جوده مابه شكوك وعيوب
يا سعود قل بعد السلام ارسلت لي= قصة يابن سلوم لك وسط مكتوب
وليا سأل قل ما بعد ترجمت لي= خذها عساك من الصوداديف محجوب
وقل له يقول عمير عذرا بدت لي = ثم اختفت عجله وانا اصبحت منيوب
من يوم خاطفة القلوب خطفت لي= عقلي جلس بالجد يالشهم مصيوب
بعين بها السحر الصحيح نظرت لي = واصبحت كل الجوف بالفعل ملهوب
في برحة القزاز غصب خطرت لي = وراحت وانا ضليت والقلب منهوب
وش جابني للسوق حتى عرضت لي = الا أن هذا يا فتى الجود مكتوب
مكتوب اشوف السحر يوم ضحكت لي = فيها ويجعلني من العقل مسلوب
مكتوب اطب السوق حتى صدفت لي = والا فنا ماني على السوق مغصوب
من شد ما حسيت يوم سلبت لي = قلبي وعقلي زاغ وامسيت مرعوب
ما جيتها يالشهم لاشك جت لي = صادت وراحت واصبح الدمع مسكوب
من نون عيني يوم هي روحت لي = بقلبي هي الكاسب وانا اصبحت مكسوب
أول خطر يالشهم يوم ندهت لي = هو صوتها السحري له العقل مجذوب
وثاني خطر يالشهم ساعة خطت لي = لحظة نظرت اللي على الصدر منصوب
وهن درتين شفت يوم قربت لي = مع قدرة التعبير باخلاق واسلوب
وثالث خطر هي بالصحيح نصبت لي = بعين وجسم ووجه ما فيه عذروب
واليوم يا مشكاي وان حل قتلي = منها خذوا ثاري ترى الشرع منصوب

رد عبدالله السلوم

حي الكتاب اللي رجع بالبخت لي = ترحيبه المندب الى عاد مندوب
كزه رفيقٍ مانوى بالعنت لي = لوظاهر القيفان بالكود مصحوب
أحيا ربيع القلب يوم ازهرت لي = فيه العلوم ونلت غاية ومطلوب
الغايه اللي من زمان اسنحت لي = مع شاعرٍ شعره مقدر ومحسوب
واقفى وذكراه العزيزة بقت لي = وطاريه في قلبي مقدر ومحبوب
واليوم رايات الغرام خفقت لي = واصبحت كني بالمحبين مصحوب
يا عمير مكتوبك علومه طوت لي = شيٍ دفين ويخفي اسرار منكوب
من تل قلبك تلتينٍ بنتلي = ما خاف من فعله عواقيب وذنوب
اطغاه وقته واصبح الزين يتلي = من شاف في قلبه من الحب منسوب
يا عمير ابخبرك بطواري طرت لي = علوم اغنيها هجيني ومسحوب
اخطارك اللي صابتك قد مضت لي = وعالجتها بالصبر والصبر مرغوب
صادفت بابها وحدةٍ وهتفت لي = ومن عقبها ما طاب زاد ومشروب
من حور ربي كنها نزلت لي = راحت وخلت لاهب القلب مشبوب
ولا غمضني غير يوم اشرت لي = بالكف والا الوجه باد به أشحوب
وحاولت اقاضيها ولكن قضت لي = وصارت تدهوك بي على كل ملعوب
يا ليتها يوم الوداع حجزت لي = أغديه ينقلنا مع الجو مركوب
عله يبين علوم منها خفت لي = ان الهوى في صوب والناس في صوب
ولاعاد اصدق كل عذرا سعت لي = لو حاولت تبدي لي اسرار وعجوب
ولوكان بلحان الغرام عزفت لي = دريت ب انك يا فتى الجود مكروب
يلزمك تصبر لاتقول اقبلت لي = حتى تقرر لك نصيب وماجوب
يا عمير وان كان الليال سمحت لي = بذلت لك نفسي ولا يلحقك نوب

قصيدة عتب من الشاعر عبدالرحمن العطاوي للشاعر عبدالله السلوم
يقول العطاوي

زار بيتك مشفق يابو هنوف = صاحب لك ما قبل غيرك خلف
هايم مشغوف يالرجل العروف= في غلاك تصدقه لو ما حلف
ما حدتني عن مواصلك الظروف= وسالف الاخيار يا نعم السلف
الروابط بين الاجواد الشفوف= والقطيعه مالها قلبي ولف
لو من ادنى الناس لاقصاها تطوف= مالقيت الوافي الصافي بلف
يا زميل بالوفا دايم ينوف= كم قدم رجلي لديوانه زلف
الخليل الحق في خله يروف = كان غاب النوم عن عينه ذلف
وان تعاملنا بعسرات الحروف = راد ربحي وانت مالك ما تلف

رد الشاعر عبدالله السلوم

مرحبا واهلين من قلب عطوف = يا رفيق صابني عقبه كلف
يا نديم شوفتك تبري الحسوف= تبعد الغربال عني والصلف
بالمرجال والوفا صرت معروف = وفي حديثك لاخداع ولا جلف
لو سلامي ما حصل لك بالكفوف = يعلم الله عنك قلبي ما اختلف
جيت ابي شوفتك لكن الصدوف= فرقتنا في طريق وفي ملف
رح لباب الرنج حتى انك تشوف = الدليل ان القدم يمك دلف
شفت لي طير على وكره يزوف = يمكن انك تو معطيه العلف
لو لسان الطير يفهم للضيوف= رد لك ترحيبه مني سلف

قصيده مرسلة من عبدالله السلوم الى الشاعر الكبير عبدالله بن نايف بن عون
وذالك حين دعاهم الشاعر عبدالرحمن العطاوي الى رحلة الى البر عام 1400 هـ
وكان الشاعر الكبير مرشد البذالي سوف يشاركهك هذه الرحله لولا ظوفه
يقول عبدالله السلوم

النفس من صحبة الغالين مسروره= مدري متى الوقت يا مزهب يعوضها
ربع نشاما بوسط العشب وزهوره= في فرصة عجلها من جنس ريضها
في روضة من صدوق الوسم ممطوره= عند المغاتير نتبعها ونلحضها
حيرانها كنها لاعبة الكوره= وان غابت الشمس تشغلها وتمرضها
وان جيت لك حاجر بالنبت خذ دوره= وريح الخزامى هوى الغربي يفيضها
هذي حلاة العمر بالوصف والصوره= حقيقة واضحه محدن يعارضها
حب ابو نايف بنى بالقلب مقصوره= وحب ابو نواف يعليها وينهضها
ولو ان مرشد نفعنا الوقت بحضوره= وابدى لنا من تماثيل يهضيها
كان اصبحت رحلة فالعمر مشهوره= يشيب راسي وانا لازلت حافضها

رد الشاعر عبدالله بن نايف بن عون

مني لعبدالله السلوم منشوره= محبة هرج مبغض ما يغيضها
تبقى مد العمر محشومه ومخبوره= عقب احتكم حبلها محدن بناقضها
رفقة شرف بالوفا والعز مخشوره= يموت راع النميمه ما تعرضها
عادل صغى القاف لامنه حضر دوره= يعطيك جزل التعابير بحمايضها
أنشهد انه بليغ الشعر دكتوره= والناس مالي بهاجيها وقارضها
ناس بعضها يجيك بما بحنجوره = يسد نفسك عن العيشه تلفضها
والفضل للي عزمنا عند مقهوره= يوم المغاتير في زراق رفضها
اللي من الطيب اخذ حقه ومقدوره= ماهوب راعي شواة ما ينجضها
وضح شراها من الخرشان مذكوره= يطربك لا سيقت القعدة نضايضها
يا ليت مرشد يجي له يمها زوره= أما بمرباعها والا مقايضها

[محمد العريني]

ابو نوت..




معلومات وافيه.. شاعر يستحق ان يكتب عنه..




ابو عبدالعزيز..




مجهود رائع..



و ننتظر المزيد.. اذا توفر..

قصيده اسندها الشاعر عبدالله السلوم على الامير محمد السديري رحمه الله





باقي من الذكرى

باقي من الذكرى رسوم للاطلال = هوج الرياح العاتية ما محتها
اظنها تبقى على مر الاجيال = تفيد عن قدرة يدين بنتها
ارض نشا فيها من الخلق نزال = وشخص عشقته عاش في ناحيتها
ان غبت عنها شفت من ضيقة البال = ما يلحق النفس العلية عنتها
وان جيتها عقب التباطي والامهال = فرجلي تسير الين تاصل جهتها
واقف عليها وارسل الطرف يجتال = والرجل ماكن البسيطة تحتها
تموج كني واقف فوق زلزال = وعيني تضيق بعبرة حابستها
اخاف يدري بي حسود وعذال = حيث العيون دموعها هي لغتها
يا شيخ واقلبي عليه الصبر طال = وراحت مسراته سريع فوتها
يا شيخ كلن قدر ما يحتمل شال = وانا حمولي كيف نفسي قوتها
نفسي لها عن لذة العيش سلال = تتوق لاخبار القديم وسنتها
ولا الغرام بعشقتي طقه الجال = واصبح جنازه والسنين اقبرتها
ولاعاد لي ملحوظ في الواو والدال = فلت يدي صفحة والاخرى طوتها
واصبحت من عقب المخاطر والاهوال = اجنب الحية واعاف شجرتها
يا مير بينت السبب لك ولا زال = في النفس حاجة وانكفت ما قضتها
يا مير شخصٍ ياصل الحبل بحبال = وشخصٍ يسره يوم يقطع بتتها
وانت العديم معرب الجد والخال = ونفسك مراقيب الشهامة علتها
خذها شهادة واحد ما بعد قال = كلمة نفاق يرتجي منفعتها
والناس يابو زيد من كل الاشكال = من شاف عثرة عاثر ما غمتها
الا الذي ماللردا فيه مدخال = هذاك ابو نفس يحصل بختها
وقت مضى له حال واليوم له حال = وارجي من المولى حسن خاتمتها

ريـــم البلد

وراك يا ريم البلد تستذيري = او فيك شارات المها قايد الصيد
لد النظر بي لاتحث المسيري = مالك لزومٍ بالجفا والتصاديد
انا رفيق العام ما شفت غيري = عنيت ابي شوفك وابي شوفة العيد
وان كان شفتك صار حظي كبيري = عساك تافي لي بحلو المواعيد
سيف الهلاك اللي بكفك شطيري = هذا بجسمي له علامات توكيد
وبعض الجروح اخفيتها في ضميري = تنزف ولا يدري بها زيد وعبيد
ارفق بحالي دوك جرحي خطيري = اما شفيته مت باسبابك شهيد
حبك صبغ في مهجتي يا عشيري = وانتا مناي وغايتي والمقاصيد
ماعاد لي من جور حبك مطيري = وانتا هواي قريب الدار وبعيد
تراي بك من سطوتك مستجيري = عساي احصل راحة عقب تنكيد

الشاعر عبدالله السلوم
رحمه الله

في احدى سفريات سيدي صاحب السمو الملكي الامير سلمان بن عبدالعزيز خارج المملكه
ذهب الشاعر عبدالله السلوم رحمه الله وقال

يا قصر انا جيتك ولي لازم فيك = وذكرت شخص هو بهاك وجمالك
يا قصر عل العز يحفظ حواميك = حيثك تشرف كل منهو عنالك
عسى حياة اللي ليا جاك يحييك = تبقى وتسلم من دروب المهالك
سلمان رمز الجود ما فيه تشكيك = ما يسلك الا طيبات المسالك
أوفى من الوافين ذكره يناديك = كالشمس يجلي نورها كل حالك
الا وله نفس كرمها يلاقيك = لاجيت عنده طاب حالك وفالك
يا متعب بالجود ناس تباريك = طال الطريق وصار دربك لحالك
مالي وسيلة غير بالشعر اناجيك = عساه يبدي لو بعض حبنالك
والاانت فوق الوصف محدن يحاليك = يا باذل للناس نفسك ومالك
عسى الكريم بعين عطفه يراعيك = وتسلم لنا في قامتك وارتحالك

الشاعر عبدالله السلوم
رحمه الله

الرســـول المأمــــــون

اثبت لي انك مغرم في هايم = واثبت لك اني هايم فيك مجنون
يا واحد ذكرك وطاريك دايم = لك منزل في داخل القلب مضمون
ما غيروه اهل الحكي والنمايم = اللي على تفريق الاحباب يسعون
أن شفتك اصبح طير الافراح حايم = وأن غبت صار الحال من دون في دون
يا كيف ترضالي بهجر وضلايم = وأنا الذي برضاك ماشي وممنون
الماضي اللي له بقلبي علايم = الى طرالي صابني هم وشجون
لو عشت في باقي حياتي مسايم = والله لابقى في محبتك مرهون
واخلص لحبك لو عذل كل لايم = واحفظ لسربين الاضلاع مدفون
أحمل اشواقي هبوب النسايم = حيث النسيم بنقل الاخبار مامون
والله مالي غير حبك غنايم = وان ماحصل شوفك ترى الموت مسنون

الشاعر عبدالله السلوم
رحمه الله

ردت مع المكتــوب

اعطيتها سر يعذب سكاتي = صارحتها من كل قلبي صراحه
ومن اجلها ضحيت وانكرت ذاتي = لعلها تقرب حدود المساحه
مساحة تفصل حيايي وحياتي= حطمتها خليتها مستباحه
بلحظة سعادة في غياب الوشاتي = ارسلت مكتوب هناي بنجاحه
صفحة عذابي واختلاف امنياتي = سطرتها بدموع ببلا نياحه
دموع الرجا والياس مسترسلاتي = والعاشق الصادق دموعه سلاحه
وصرت انتظر مردود سيد البناتي = يجلب شقى ولا سعادة وراحه
مغير افكر وش تجي مقبلاتي = وغيم الحزن يضفي عليه وشاحه
وردت مع المكتوب خمس كلماتي = خلا ، كلن ، راح ، يتبع ، صلاحه
وقالت وهي بين الخجل والثباتي = اعرف شعورك بس اخاف الفضاحه
حقك على احفظ لك الذكرياتي = وابقى لك التقدير هو والنصاحه
واكتم علومك لو عن اقرب خواتي = ومسجون سرك مقدر اطلق سراحه
وحقي عليك ان كان تحفظ وصاتي = أعلم ترى الراحه تسمى رباحه
مادام املنا منتهي بالمماتي = ترى المقفي ما يرده صياحه
عز الكلام وقمت الملم شتاتي = وجدايه اصفق كف راحه براحه
واقول يالله خالق الكايناتي = تجبر مصاب اللي كسير جناحه
يسهر ومرتاح الخلايق يباتي = نديم ليله ما يداني صباحه
يجلس يراقب رحلة السارياتي = عسى مراعاهن يخفف جراحه
ان كان في الدنيا نعيم العصاتي = والوقت مسعفهم بدورة رياحه
فحبي لها ما يقبل الناقصاتي = اطهر من الغيث المصفى قراحه

الشاعر عبدالله السلوم
رحمه الله

[سعود الخويطري]

[سعود الخويطري]

شكرا لك مليون يــ خالد العنقري


وبارك الله فيك على استجابتك للمموضوع بخصوص قصايد الشاعر : عبدالله السلوم - الله يرحمه


وبدون ادنى شك سيكون الموضوع مصدر لـ الشاعر

وتسلم يمناك

وتقبل سلامي

الخويطري

نصيتك يا بحــر

لانك يا بحر دايم تسمى ملتقى العشاق= نصيتك يا بحر كودك تفرج عني الضيقه
نسيمك فيه معنى للحنان يداعب المشتاق= وتكسر موجك الهادي يجدد فيه تشويقه
رميت هموم قلبي في ثنايا موجك الرقراق= عسى هم جمعته تسعف امواجك بتفريقه
تحملت الهموم اللي سبايبها ولع وفراق= وهذي عادة الولهان يشكي قل توفيقه
اسافر مع هموم اليل وابعث خالص الاشواق= الى خل تخيرته صدق لي في مواثيقه
تخيرته على غيره بحسن الوصف والاخلاق= غلاه مداخل قلبي وهو سبة تخافيقه
لوأنه يابحر عندي تصير لهرجتي مصداق= تشوق اللي يتيهن العذارى في طواريقه

الشاعر عبدالله السلوم
رحمه الله