[نايف سعود]

قد تكون هذي اّخر محاوره في هذا المنتدى وحب تكون معك يابو بدر

يا الدحيمي تعال وروق والجو رايق = ودنا نار بن عمار تلحس لظاها
قبل ما ترسل الدعوى بوسط البطايق = عارفِ من كتبها واعرف اللي قراها

[ماجد بن شايخ]

لاهنت يبو سعود ..

ودي إني بصفك لأني من متابعينك ..

لكن ما دام الخال الدحيمي بيجي فأعتبرني من صفه لأن الخال والد والوالد لو ماجيت في صفه .. الله يستر من تواليها ..

بإذن الله موعودين بمحاورة راقية وعذبة ..

عالقوة يارب دوم ..

أجمل سلامي أخي نايف ..

أخوك : ماجد بن شايخ

[محمد الدحيمي]

ارحب يابو سعود وارحب ياماجد

شرف لي اللعب معك يابو سعود

استلم طال عمرك

لاتطفي الحريق ,, ولا تشب الحرايق
والحبال القصيره خابرن وش مداها

تنمحي في ثواني .. تنكتب في دقايق
نعنبا من كتبها .. نعنبا من محاها

[ماجد بن شايخ]

الله الله يبو بدر ..
ولا تهون يبو سعود ..

موعودين بملعبة عذبة حيل و دسمة ..

لاهنتوا يالرياجيل

[نايف سعود]

الأخ ماجد بن شايخ متابعتك شرف لي طال عمرك وبشر أني عند حسن ضنك وترى صفي وصف خالك واحد يا القرم رجال ولكم عندي تقدير خاص تشرفت بمرورك مره ثانيه

[نايف سعود]

طيب طيب أستلم لا هنت

شي طيب يليق وشي ماهوب لايق = من يموح الدلي لازم يجود عراها
أن بغيت الحقيقه في ملفك وثايق = ونت رجلِ جواده تنعرف من حذاها

[محمد الدحيمي]

خلوها

الحكايا حكايا والحقايق حقايق
تايبٍ من هروج النقص واللي حكاها

ياولد لاتحسب ان المجالس حدائق
سوّد الله وجيهٍ ماتحشّم لحاها

[نايف سعود]

خلووووووووها

وش حرش ضبك المقرود واف السلايق = لا تحاول تكحلها تسبب في عماها
أعرف المجلس اللي ما يضم العلايق = طول عمري مجنبها ولا أبحث خفاها

[محمد الدحيمي]

دامت انك ولد بطران ليش اتتوايق
معك قربه ولا تدري من اللي ملاها

حن خطام الردي وكل سرّاق بايق
والنفوس الضعيفه وسمنا في قفاها



نايف بن سعود
انا والله ماعرفك من قبل ولا قد لعبت مع احد مااعرفه ولكن حسيت اني اعرفك والطيب يبقى على اهل الطيب ماريه
تشرفت باللعب معك ومعرفتك الليله كشخص وشاعر
لاهنت شكرا لك