[إبراهيم الوافي]

( 1 )




على باب الأمل نوقفْ .. أنا ولا المسا كذّاب ؟!
يواعدني ظلام الليل .. لو واعدْتُه السهرة ..!

مثل عنوان لكتابي .. لقيته في سطور كتابْ
أحس ان انتظاري بس لهروبي من الحسرةْ

انا الإنسان من قبلي .. وأنا الشاعر بعد ماتابْ
اذا ارتدّيتْ عن أمسي .. أبـــ ...اكفر في بعد بكرة ..!



( 2 )

عمى شال الصبر عيني .. دموعي كلبوها ملح
أنا والشارع الثاني مسافة حيرة الشاعر

يجينا ليل مايرحم .. ويقبل في تعبنا صبح
أغامر بس بجروحي .. ولولا الحلم ما اغامر

كفرت بأول أيامي .. وصلّيت الليالي جرح
إذا بكرة يجي يمكن ابركع بس للحاضر ..!


( 3 )

أنا واحساسي .. افــ بعدكْ عصافير وشجر وأوراق
ظِلالْ وشمس لو تغرب ..يجينا ليلنا الثاني

عيونك موطن الساعة .. ودقّات الحنين أشواق
نسي في شارع الأيام ..لايعطيك عنواني

إذا أمسي مثل يومي شجن وأخبار ماتنطاق
أبــ..انسى ذكرياتي يوم .. واذكر بعض نسياني !


( 4 )


على كرسي شفق أزرق .. وعند الموعد المهجور
شربت بكاسك العتمة .. وسكْرتْ منك شهقاتي

( أمانة يابعد مريم وياثوب الشعر مغرور
تبسّم في شفاة الليل .. واكتب عن معاناتي)

إذا بكرة نسيتيني .. وذكّرك الحنين سطور
أبــ.. انسـى منك نسياني .. وابااحيا في كتاباتي


( 5 )



أجيكْ وللصباح أنفاس ..تحبي في رصيف الدرب
نجمّعها ..سوى للريح .. ونلمّ السحاب أعمى

ترى كل الكلام اللي .. يعدّونه عن أهل الحب
إذا جيت أتسمّع شِفْت صمت العاشقين أسمى

متى كان السفر .. غيمة وعنوان الأماني كذب
إذا كان العطش صحرا ..وميراد السراب أظمى ..