[مدمن شاهي]

سلامون عليكم جميع .. من أوّل نمبر إلى آخر حته من النمبرات << جديده هذي وأوّل مرّه أكتبها بالنت .. عِوضاً عن الطريقة الترحيبية القديمة اللي كلّها ( صباح الورد والفُل والياسمين ) والخنبقه اللي مدري شسمها ذيك << اسكت بس !

مسائكم بردقان مقشّر .. ويسعد لي مسا أخوي الغالي : راشد .. ياناس راشد هذا مدري وش انه مسوي بي ... ساحرني واحبّه من كل قلبي .. حتى في نومي أحلم فيه .. واذا قمت الصبح ومن زود الخمّه أنسى أقول ( أصبحنا وأصبح المُلكُ لله ) ويجيني الشيطان وينغزني مع وريدي الايسر واقول بِكُل دشارة ( أحبك يابعد قلبي راشد ) !

من دون طويله وخلونا في موضوعنا اليوم واللي هو عبارة عن حلقة أخيره من حلقاتي الثلاث " بتاعة الزواج والمزواجين " واللي بإذن الله راح يموت فيها البطل .. إلا على طاري ( يموت البطل ) .. أذكر زمان أوّل يوم كنّا نتابع التلفزيون أبو لونين أبيض واسود متنيّل بنيله .. كانت الحلقات توصل الميه .. بل وتكسر حاجزها بِكُل بجاحه وفي آخر حلقة يموّتون البطل ... طيب عطوناها من آخر واهلكوا البطل من أوّل حلقة وفكونا من هالمشوار الطويل .. ألا ياجلعه السلّ .. مابلا مضيّعين وقتنا بالتبطّح عند هالتلفزيون وآخر شي يصير مسلسلهم أنواع المصاله !

حلقتنا الأولى من مواضيع الزواج طردنا فيها العزوبيين والعازبات ( شرّ طرده ) وفي الحلقة الثانيه صرّفنا العزوبيين والعازبات مع الباب اللي ورا .. لأنهم اشغلوني يبون يدخلون ويقرون .. ولكن في هالموضوع فالوضع مختلف والواسطة فوق كل شي والباب راح ( نفتحه على مصراعيه ونعلّقه بعصاقيله ) لِكُل عزوبي وعزوبيه عشان يتفهّمون مُستقبلهم زين << أقطع ذراعي إذا ماصاروا عارفين كل شي أكثر من المتزوجين !

لكن قبل أبدا بهالموضوع أحبّ أبيّن بعض الاشياء اللي قرقعت بتسبدي فأقول مُستعيناً بالله << قلْ يامدُمن ولايكثر !

* طرحي لمواضيع الزواج هي جانب واحد من عدّة جوانب .. وزاوية فضفاضة من بين أكثر الزوايا شُعاعاً .. أي أنا أطرحها من جانِبِها الوضّاء ذو اللون الأبيض البهيج بعيداً عن المشاكل الزوجية والتي لايخلو منها منزل .. إذاً طرحي هو دليلُ وسبيلِ غيرِه من الطُرُق لتغيير الحال من الظُلمة إلى النور ومن المشاكل إلى الأُنس والفرح !

* الكثير من الأزواج يعتقد أن الزواج هو عِبارة عن فرض سُلطة ، وأن الزوج المؤنس لأهله إنما هو ( رخمه وزلابه ) عند أهله .. وهذا إعتقادٌ خاطئ .. بل من حق زوجتك تفهّم حياتك والعيش معك بِكُل جمال كما أنت تراها جميله مع أصحابك ورفقتك !

* وصلتني أكثر من رساله من بعض الأزواج يذكر فيها أن ( كلامي راح يطير في الهوا ) عِند أوّل ليلة زوجية لي .. وأن ( نظرتي ستتغير مع مرور الأيام ) .. وأقول بالفمْ المليان ( من يرسم خُطة حياته بوردة حمراء سيعيش أبد الدهر في غبطة وسرور ) .. ومن ( يسُنّ قلمه بشوكةٍ فليتجرّع ألمها جيّداً ) !

* أكرر عبارتي المُعتاده ( أنا عزوبي منتف ولا فخــر ) .. بس أحب أتميلح عند المتزوجين واحاول أني أعطيهم مما جمعته في الأيام الماضيه من أمور اجتهاديه أراها مُناسبه لِكِلا الزوجين .

= = =

كالعاده .. وككُل بداية .. راح " أشلوط " أخوي الزوج في هذا المويضيع الخاثر واتمنى أنه يسمع بعض التنبيهات عشان يعقل ويركد ويحاول يفتّح عيونه على مستقبله وأُسرته << الله من واحدن وحده يجلدني بعد ذا الحتسي !

* أخوي الزوج .. الكَرَم ( صِفةُ المدح الكُبرى ) .. ومن خلال كرمك يتبيّن مقياس حُبك لزوجتك .. أغدق عليها بالهدايا بين فتره وأخرى من دون كَلَفةٍ أو بــذخ .. فالمقدار بالعطيّه لابقيمتها .. والبخل مامنه بركه .. خل عنك جمع الدراهم وبع لك خمسة أسهم من ( أسهم شركة صافولا ) .. ووسّع صدرك ترى الدنيا فانيه .. ولعلمك .. ترى الحرمه ماتحب الرجل البخيل وتتعاقد الفُرص مع نفسها ( كي تقوم بسحب محفظة جيبك ) في أقرب ساعة نوم هنيّه لك !

* الزوج المفضال .. تدخلك في شؤون البيت كثيراً لايمنح زوجتك الثقه في نفسها .. لأنها تعتقد أنها مَلِكه متوجه داخل بيتها .. فلا تحرمها ذلك ( الحُلُم الجميل ) !

* تغزّل في زوجتك بين فتره وفتره .. وخل عنك التكشيرات في وجهها .. ترى الحرمه تموت ثم تذوب لين ( تغدي ) صينية ( باشَمِلّ ) بين يديك إذا شافتك تمدحها وتُغري أنوثتها .. عطها من الكلام المعسول الحلو واحفظ لك كم كلمة إذا صرت ( دثوي ) وماتعرف تتكلم .. سجّل عندك من " بُئ " مدمنوه .. مجّاناً من دون مُقابل [ حياتي صارت أحلى حياة بالقرب منّك .. تكرم عيونك .. الله لايخليني منك .. نورتي حياتي .. البيت من غيرك ظلام .. أنتي روحي وقلبي .. يا هلا بالنور.. اشتقت لك والله .. أنتي حلم حياتي .. الحياة معك تقرمش وتهبّل .. نفسي تفداك يانور عيني .. أنتي أجمل هدية ] << الكلام المذكور آنفاً يجب استخدامه استخدامات حشمه وعاقله .. يعني فقط بين الزوج وزوجته وأُخلي انا يا ( مدمنوه ) مسؤوليتي وذمتي اذا استخدمها " سمير " في مدح " تفيده " !

* أخوي الزوج .. في حين الخروج من المنزل ودّع زوجتك بابتسامه .. جرّبها مش حاتندم !

* في حين جلوسك في صالة المطبخ .. استغل وقت " روقانك " وشارك زوجتك عمل المطبخ من ( قليْ ) و ( غسيل ) << الله من واحدن بعد بيقول ( كثّر منها .. آخر عمري أغسّل الصحون معها ) .. بس صراحة .. أنت لو تعرف قدر مُساعدتك لزوجتك وخدمة أهلك عند الله عزّ وجلّ .. لما تفانيت ساعه من تفويت ذلك العمل العظيم !

أختي الزوجه الحنون .. أسمعي مني هالكلمات الناصحه المقرمشة ..

* لاتُقحمي عُزلة زوجك .. خاصّتن إذا كان لديه مُشكلة خاصّه فيه ويحبذ الوحده والخلوه بنفسه لحلّها أو النظر في أطرافِها بسكينه .. وبعض الحريم - الله يهديها - من تشوف زوجها سارحن عنها بعيد .. وهي مُباشره ما تفكّر إلا أنه راح ياخذ عليها أو أنه جالس يفكر بوحدتن شافها بالشارع .. ومن تشوفه وهي تخمطه بسؤالها السقيم ( علامك يافلان .. وش انت تفكّر فيه .. ياللي فيك وياللي مافيك ).. وتصير الدعوه صيحه ونيحه !

* اذا كنتي أنتي أختي الكريمه أعلى شهاده دراسية من زوجك وكُنتي ماخذه الشهادة الجامعيه بامتياز وزوجك كان ( خريّج ابتدائي ليلي ) فهذا مايسمح لك أنك ( تفشخرين ) عليه وتبدين ترفعين راسك كل شوي وفي كل صغيره وكبيره . وكل ماقلتي .. قلتي ( تراي أعلى منك شهاده ) ... صحيح أنك أفضل منه .. لكن أنتبهي تفقدين ( حبّه واحترامه ) من هالطريق !

* تعاهدي زوجك بالهدايا ... لاتصيرين بخيله وترصيّن الدراهم في حسابك المتنيّل بنيله وتجمعينها بس لمكاييجك وحوساتك توالي ليل الاربعا والخميس !

* الثقة مبدأ .. والمبدأ هوَ علامة الرسم الصحيح للحياة الجميله ... ماأزكّي الرجاجيل << انقلع بس .. ولكني أحاول أبيّن للمرأه أنها بمبدأ ( الشك ) في زوجها وكل ماطقّت ( حصاة بعود ) قامت تهذري وتوسوس في زوجها .. فهذا يَهدِم مابُني طيلة أيامِهِم الجميله .. اعقلي يامره ودعي الشك عنك يامال الملاس على ظهرتس !

* في حين دخول زوجك المنزل بحاجيات البيت أُشكريه واثني على ماقام به من فعل .. فقد تكبد التعب والمشقّه لكي يوفّر لُقمة العيش لبطنك ولعيالك !

= = =

وكما تعودنا في الطرح السابق ... فلرومانصيه مكان .. وللدلع خقاق وحركات لابُد منها ..

أخي الزوج ..

* في حين نزولك للسوق بصحبتها .. فاجئها بعيّنه من " اكسسوار " طالباً رأيها فيها .. وحين إعجابها بها .. اخمطها بالكيس وعطها ابتسامه وقل لها ( هذي هديه منّي لك ) !

* تغانم فرصة ذهاب زوجتك لاهلها ... شف لك أقرب محل ( حلويات ) .. طقّ لك أحلى صينيه كبر راسك وحطّها على طاولة صالة المنزل .. وحط عليها بطاقة جميلة واكتب عليها كم كلمة حُب وغرام .. وانتظر فرحة زوجتك في حين مُشاهدتها لهالحركة الجميلة .

* فاجئ زوجتك في أحد الأيام بتذكرة سفر لإحدى المناطق واضعاً إياها على سرير نومها .

أختي الزوجه الدويفع ..

* ( احشي ) وفي رواية أخرى ( اترسي ) وفي رواية أُخرى ضعيفة ( ادعسي ) قليلاً من الورد المجفف في مخدّة صغيرة مِن صُنع يدك وطرّزي عليها من الخارج كلمات الحُب .. وخليه يهبد راسه عليها حين النوم !

* في يوم من الايام صرّفي " البزوره " و " الدقرش " وازرقي انتي واياه لمدينة ترفيهيه وعيشو يومكم سوا !

* ألعبي مع زوجك داخل المنزل بعض الألعاب << أحسّ أن اللي بيقرا ذا الحتسي ودّه يقوم ويجلدني .. صحيح والله أن هالألعاب لها دورها الجميل في تحريك الماء الساكن في الحياة الزوجيه .. بس البعض مايدري عن هالشي ويتوقّع أن هالحركات حركات بزران .. مع أن الرسول - عليه الصلاة والسلام - وهو خير قدوه لنا .. لاعب زوجاته في بيته .. مالت على دحيّم يوم انه ياخذ سويّر ومابلا كل يوم تكنس السطح .. لارومانصيه ولاحركات من تحت لتحت !

* حاولي دائماً أنك تسألين زوجك عما لاتعرفينه .. وحاولي أنك تمشين ( بالملّي ) بمثل مايقوله من توجيهات .. فذلك يسعده .. بس انتبهي لاتسألينه عن شي ماله داعي ثم تتفاجأين بأن الصحن ناشب في جبهتك !

* في بعض الأحيان ساعدي زوجك على خلع ملابسه من حين العوده من عمله مُنهكاً ثم اسكبي قليلاً من الماء << الكلام الأخير كتبته خطا ومتعيجز أرجع وامسحه .. قصدي في حين عودة زوجك من العمل حضّري له حمّام دافئ بعد مساعدته في خلع ملابسه .. فذلك يكسوهُ الإرتياح وهدوء الاعصاب .

= = =

إلى هُنا أرى أنني قد حاولت أن أقدم شيء ولو بسيط لإخواني وأخواتي المتزوجين من نصائح وتوجيهات وبعض الطُرُق التي أرى أنها جميلة لتغيير نمط الحياة المُمل والقاتم الذي نراه في المنتديات والمجالس من مشاكل وأخبار مُحزنه وطرح قناعة الرأي بأن الزواج ماهو إلا تِعدادٌ سُكاني وزيادة نَسَمه !

قبل أن أُنهي موضوعي أحب أن أشكر كُل من راسلني وإيّدني للإستمرار في طرح هذه الحلقات والتي هي بمثابة ( شيك مفتوح ) للجميع من متزوجين لتعديل الحال وللعزازيب لتفتيح البال .

أيضاً إلى كُل من ذكر أن مثل هذا الحديث لاينفع في ضلّ وجع الراس من المرأه أو الرجُل فهذا كلام خاطئ وغير صحيح ... فالحياة تبدأ بخطوه وتغيير وتصحيح الخطأ خيرٌ من المكوث فيه .. دعونا نبدأ بشمعه طويلة الأمد ونفتتح صفحة بيضاء كي نرى من خلالها كُلَّ الأسطُر من دونِ ( رُتوشٍ أو خرابيش ) !

عن اذنكم ... بروح اتزوج وارجع !

سلام .

:: مدمن شاهي ::

* لا أسمح بنقل الموضوع أو لطشه إلا بالإشارة إلى أنه منقول من العم مدمن شاهي !