06-06-2002, 17:07
|
#1 |
|
رحمة الله عليه
|
تكفون جيبوا بدوي بامريكا واقلطو
السلام عليكم ورحمة الله وبركاته حياكم الله يالربع ..... <======= لو ماجبتو بدوي بامريكا مهيب لكم ذي  الموضوع ومافيه ببساطه هو قبل فتره كنت بمنتدى الشعر النبطي بالاقلاع وكنت ادور بالمواضيع القديمه الي لها سنه واكثر  المهم طحت بموضوع لاحد الاخوان وكان يسب بناتنا وماهو سب في الشرف لا والله كان سبه بدلعهن وكثرة الطلبات وكان مبين فيه اشياء بصراحه تخلي الي يقرى يقتنع لكن جاء واحد بعيد عن الديره واكيد ان البعد خلاه يشتاق لاهله ولديرته واكيد انه انقهر من كلام الي يسب بناتنا  وبصراحه شاعر هو ومن الشعار الي تستمتع وانت تقرى لهم الاخ ذا هو (بدوي بامريكا) ورد عليه رد بصراحه البنات لقطن القصيده ووزعنه بالمنتديات البنات<=========== منبسطات بصراحه ياخوان الشي الي محد يشك فيه ان الشعر الزين يغير رايك ببعض الامور  يعني انا افهمكم انا يوم قريت قصيده الي يسب البنات الصراحه كنت معه ومتعاطف معه لكن يوم قريت رد اخوي بدوي بامريكا الصراحه غيرت رايي الاول ...اتمنى انكم فهمتو علي  اخوي الغالي بدوي بامريكا اول شي لاتفهم قصدي غلط انا ياخال سمعت قصيده لواحد من اكبر الشعار الي على الساحه والقصيده تشرح نفسه وهذي هي [poet font="Simplified Arabic,4,red,normal,normal" bkcolor="transparent" bkimage="backgrounds/15.gif" border="none,4,gray" type=0 line=200% align=center use=ex length=0 char="" num="0,black" filter=""] يامل قلب كل مانمت فزيت فزة قريص شال رجله يوني اقعد واقوم وليا تقهقرت شديت عفت الكرا وهموم قلبي شوني هاجوس قلبي شتت الحال تشتيت وغديت مثل القوس بيد المغني تسعة عشر ليله وانا مااسفهليت انوح نوح الورق لاغردني على حبيب(ن) لي بحبه تعنيت غرو البنات الي بحبه محني دايم على بالي وليا نمت نزيت وليا طرى لي طير النوم عني وقمت اتخير بالمثايل وغنيت ولاهمتن دنيا الفنا يوم اغني واخترت انا الجزلات وفيهن تسليت وعسر المعاني ليا بغيته ضوني واخلي الشينات بوقته ليا بليت واقطف من الزينات لاساعفني لاضاق صدري شلت انا الرجل واقفيت يعل هموم القلب تنزاح عني ومن دار جدي للمطاريش سجيت ومن فوق عجلات المسير ابعدني اضوي ولو طال السفر مااستمليت ومشي الخلى والبعد شوقي وفني متعود قطع الفيافي ليانحيت واطرب الا شفت النجوم ابرزني ومن دار نجد الي بحضنه تربيت عقبتها يوم الضروف احرجني عيو علي بالزين وبالشين عييت واطمع اهلها عن عشيري حدني من جيت لمه قال بسنك تمثنيت وعندك مره وبني لايطمحني يبي يبيعونه وانا ماستعديت شروطهم عقب الذهب اشرطني يبون ثلاث ميه مقدم وهجيت هجة بعير من سباع عوني وعقبتهم من عقب الاردن وعديت وجيت الديار الي جباله زمني سافرت لم الي بشوفه تمنيت وشفت الضباالي للنهر ياردني ماذيرن يوم الحظني تتقيت ومن شان اعرف القايده ليااقربني وصبرت يروح جفالهن ثم ضحيت ياطيب حظي ريعن وارتعني سميت باسم بالله على الصيد وادليت وصدت السمين القايده واعجبني واخذت من روس الحميل ونقيت وخليت انا الهزلات لو هن يبني واخذت من نسل الخوالد ولااخطيت ورفعت راسي مابغيت التدني حضرية(ن)من عرقنا ماتدانيت عروق الشرف لعروقنا يجذبني لياصك باب الرزق لله تنصيت وبيبان رب الخلق مايقفلني من لامني يعل ينقل على الصيت ومن حادث فيه الجثث يجمعني ياطير ابن برمان وش عاد سويت تزرى علي ومنك الاوهام جني الجلف والجاهل وبامرخ وارخيت صنيعهم حدر الحذا لوصخني باكل المفطح لاتحسبك تعليت ماطيبت سقط الملا ونفعني الخيل من ركابها لاتنخويت واهل الظفر وخيولهم يسبقني واخذت انا الي كنها شمعة الليت ابو ثمان لاضحك ولعني مصيونة(ن)عن لاهب القيض في بيت ولاهيب من الي يلبسن المصني من ربوة اشجارها التين والزيت وطيور النهر وغصونها عششني لابان نور الصبح سجن بتصويت وآحلوهن باصواتهن لاسجعني الشام جنه مايوصف مثل هيت انهار تجري والشجر يثمرني ناسبتهم بالمرجله وماتراديت وبناتهم لاخيارهم قربني واخترتهم عن غيرهم واستدليت والطيبين افعالهم يشكرني وحصلت انا الي تعجب النفس واقديت وصبت الهدف ماخيب الله بظني ليا وثرك الله بظله تذريت وسبحان من يعطى العطى دون مني وعند الشدايد ينفرج ماتحريت ولابد عسرات الدهر يفرجني امشي برجوى الله وليا راد زليت وكل(ن) على هالحال انس وجني واخطي واصيب وليا تمعنت رديت ومن ساعده مولاه عاش متهني وكلش يزول وكل شي بتوقيت وسن اللبن ملزوم ينحاه سني لاضامتك دنياك وفيها تدهويت اصبر وبيبان الفرج يفتحني قبل تدل الدرب لاتقول دليت اسال عقول بالدروب عرفني وجنب عن جحور الشجر لو تعصيت وافهم ترى سكانهن يلدغني مادمت رجل عاقل وانت ماعنيت خل الدواب بدربهن يسرحني الهرج واجد مير انا تقل ماوحيت غوغا طيور بالخراب سكنني والله ماسمع هرجكم يوم انا انحيت الا اسمع امواتكم يسمعني وبناتكم عفته وعنها تخليت وشي به المنه عسى مايثني وهرج بلا صمله فشيله وتفليت كلاخ العشاير لياشبعن وابركني منيب منافق ليا اشرق النور صديت افرح ليا شفت البني يلعبني وقلبي حنون وعاطفي ماتخفيت يعل وجيه اهل الحسد يذهبني وذوقي رفيع ولاجمل البيض حبيت الي جماله والعيون سحرني كن الزهر باوجانها يوم لديت زهور ورد توهن فتحني اخذتها بكر(ن)ومنها تقصيت حتى تثبت الوفى من مظني مااكل فضال الناس لو ماتعشيت ومن مكسب اليمنا الايدين اشبعني ومشيت من عنده وانا ماتقاضيت ووادعته الله والمواتر خذني ياغبن حالي كان صدت وصديت ولاحصل للعين شوفة مظني يطري على كل مااصبحت وامسيت وعيا يطيع القلب لايرجهني وذكرت انا عصر الصبا وقلت ياليت ليت السنين الماضيه يرجعني اخاف لاشيبت عودت وازريت وتزهد بي الخفرات ويودعني قصة غرام في حلاها تحاويت وبيحت سر بالحشاء مستكني وصلو على محمد وانا اقول صليت عد الكواكب ليااشرقن واغربني [/poet] اخواني وش رايكم بكلامه وانا اخص اخوي الغالي بدوي بامريكا بصراحه يهمني ادري وش رايه لو شاف واحد منزل قصيده مثل ذي؟ بصراحه حجة الخالدي اقوى من حجة الرجال ذاك الي سب البنات ورد عليه اخوي بدوي وخوالنا الشيبان يقلطون كلهم ابوصالح ابونوت <======== مايعرف الا الشايبين ذولا على العموم احب اشوف تعليقاتكم يالربع وتكفون يالبنات (قل خير او اصمت) بالذات انتي ياحصه <======= يسوي درويش  واستاذنكم الحين اخر تعديل كان بواسطة » عزيـز في يوم » 06-06-2002 عند الساعة » 19:33. |
|
|
|
07-06-2002, 06:01
|
#2 |
|
شـــــاعــــــر
|
عزيز والله اني اقدر فيك هذ الكم الهائل من الإطلاع ومحبّة الآخرين
اخوي عزيز <<<<<<<<<<<<< قصده ياولدي دامه شايب وش يقول  مبرطم وزعل ياخي لا تقول قدام الناس شايب 0 ابو صالح ادري انه شايب وما ينكر انه شايب وهو شايب فعلا ( طلعت الفضايح ) بس انا ياخي توني بيني وبين الثلاثين سنه يجي خمسه متر 0 بس ما عليه ابو عبيد فيه والله لنشده عنك لين اطلع شيبك وبعدين تعال ما تستحي تنادي البنات ؟0 الظاهر اني ابا اشوف لك شغل 0<<<<<<< ذلف عن الموضوع من يرده؟ اقول وش كنت اقول الظاهر انه جاني الخرف المبكر اللي يجينا حنا يالشباب من العشرين لين الواحد عشرين  هه شف حبوب الشباب مبهذلتني ( لا تدوخنا مثبت اني صغير مثبت لو تبيني احلف بعد الظاهر اني نسيت فعلا الموضوع 0000000000 ايه الموضوع بدوي في امريكا الله يهديه 00 بس 000 اجل كل هذا اختبارات يابو سلطان ؟ علينا هالحركات الله يهديك بس بس لا يكون فصل من الدراسه واشتغل مدرس شعر تراهم في مريكا يبون مدرسين شعر نبطي وانا عاد ابصم بالعشره لبو سلطان 0 بس عاد ليته يطلب منهم انتدابات لنا ندرس معه وش فيها ننشر الشعر ونعلم الناس صح والاّ انا قلت شي غلط ؟بدوي والله اشتقنالك والله الساحه تنشد عنك وكل يوم متصل واحد ينشد عنك 000 اعوذ بالله بعضهم كنه ديّان وينهو وين القاه بسم الله يروعون 000 ـــــــــــــــــــــــــــفاصل من جد ــــــــــــــ فاصل من جد ـــــــــــــــــــــــــــــــــ اخي العزيز عزيز والله ما قصّرت جبت هالرائعه وامتعتنا لعل ابو سلطان يشوفها ويتهيض ويرجع محمل بالهدايا والصور الشعريّه الجميله كما تعودنا منه 0 تحيّة وتقدير ومحبّه للجميع ياللي بعده قم يابو صالح ينادون راعي العنود وانت تنعس على المركى الله يهديك 0وهذي صورة ابو صالح ياللي ما شفتوه يا حبّي له اخر تعديل كان بواسطة » ابونوت في يوم » 07-06-2002 عند الساعة » 06:06. |
|
|
|
|
07-06-2002, 12:18
|
#3 |
|
رحمة الله عليه
|
هلا والله وغلا حي الله ابونوت الله يجبر بخاطرك <======== بغا يروح موضوعه بدون ولارد انا قلت انك شايب؟ ابد الا انت توك في مقتبل العمر<======== ايه هين وابوصالح خله عنك انا اعرف الي رده بس يابونوت ماعلقت على الموضوع الاساسي ؟ والا حولك احد على الجهاز لكن ياخال والله رحمته يوم قال عيو علي بالزين وبالشين عييت <========= والله الي مايعرف يجامل ابوصالح تعال تعال والله ماعن وعنك ان تدخل الموضوع ذا وتحط تعليقاتك ويستحب الشجاعه في بعض الامور بس تدري يابونوت من الي ان جاء خربها وجاب العيد؟ ابوعبيد اصبر لعكوووووش <======= يشد عزم يبي ينادي عكاشه عــــــــــــــــــــــــــــــــــــكــــــــــــ ــــــــاشــــــــــــــــــــــــــــــــــــه  عكاشه<============= هذا الصدى تراه خلنا من عكوش انا ابي ابوصالح يجي هنا بالقوه بالمروه بالي هي به ابوصالح تعال ياخي ولاتزعل الربع قل ان الشايب ذا ماعنده سالفه ايه هين ماعنده سالفه تقل جت سالفة صابرين ابونوت وكاد انك سمعت بها سالفة صابرين بس ابي اقوله <======= ياكثر خرطه يقولك هذا شايب هو والعجوز متكين عند التلفزيون بعد الاخبار يتفرجون التمثليه وتجي صابرين والشايب التمس وهو يقول لولده ياوليدي منهي ذي؟ قال ذي صابرين يبه الشايب يناظر بالعجوز ويقول لاوانا ابوك حنا والله الي صابرين ومانيب ناسيك يابوصالح تبي تجي والا والله لاجيك<=========== ترى مشوار بين بيروت والديره الي انت به بررررررررررررررررررررررررررررررررب |
|
|
|
 |
| عدد المتواجدون في هذا الموضوع » 1 , عدد الأعضاء » 0 , عدد الزوار » 1 | |
| أدوات الموضوع | |
|
|
|
|
