[احلى سوسو]

الرسالة الأصلية كتبت بواسطة عنودالصيد

احلى سوسو


هلابك ومنوووره شعبيااات .. واحلى مشاركه ..اولى..





ياكثرهم ... تدرين اعرفلتس واحد ملك على الاولى وبعدها بشهرين ... راح عند واحد من ربعه

واهدى عليه اخته ... وافق .. وملك عليها تخيلي يعني ملك على الثانيه وهو ماسوا حفلة زواجه من الاولى
ويوم قالوله ليش قال ..جتني هديه شسوي ارد الرجاال.. وهو على فكره شااب بداية عمره .. وزوجاته نفس الشي

يعني بالله بالحاله هذي شيقول الواحد!!!!!!!






عني انا ارفض رفض تااام .. انه يتزوج علي .. لا وانا شابه ولاعجوز ..بس طبعا هذي اشياء بعلم الغيب

وعموما الناس تختلف مشاعرها واستعداداتهم لتقبل هالوضع ... بس عني انا وحده ادق الاشياء

اللي تخصني ماحب اشارك فيها احد ابدا ابدا ابدا .. شلون .. اذا كان شخص احبه ..



تحياتي ..

عنود الصيد أهلييييييييييين ..

بصراحه أول مره أشوف أحد يهدي بنت سمعت انهم يهدون سيارات يهدون عطورات بس صارو يهدون بنات !!

الله يستر <<تقولها وهي تبلع ريقها ..

مشرفتنا الغاليه عنوووووود الصيد منووووووره الموضوع

[احلى سوسو]

الرسالة الأصلية كتبت بواسطة عنود

يادي النيله يعني هو مقدر علينا في كل الحالات

فال الله ولا فالك ياشيخه

بادعي الله انه يحبني حب جنوني ويصير خاتم بيديني


احلى موضوع لاحلى سوسو

------------------------------
^
^
هلوين بالعنوود

صح القدر الي ربي كاتبه ومقدره علينا هولي بيصيروالله يعين ..

بس حب جنوني أنتبهي منه لا يتجنن ولا شي أدعي انه يصير يحبك حب عاقل

عنووووووووو د مراحب بك

[ثلاس طمرات !]

يا هلا ويا مسهلا يا احلى سوسو .... اعداد ماقال الديك كوكو كوكو .... ياللي من حلاك كل من شافك قال شوفو شوفو

بس احس ان الشطر الثالث مكسور بس يالله ندخل فالموضوع


بصراحه انقلب راسي وانا اقرا موضوعك بس باين عليك منتب بعيده من منتهى قريش كل نظامكم واحد (( ماسكين خط ))
تصدقين قد ايش >> ياعومري قد ايش هههههههه لا جد عاد قد ايش قلبتي راسي كني راكب في سندوق ددسن ومدنق راسي اناظر الزفلت والكفرات توطى على الحبيبات البيض اللي فالشارع >> حبيبات متأثر بعصير راني لاهالحين

الحين يقولون وحده تزوج عليها زوجها وهي حنة زواجها لسا بيدها !! العن أبو النشاط ياشيييييييخ

معليش قبل شوي رحبت بك ماقلت شئ بس تلحسن مخي معليش .. مانيب ناقص !! وش نشاطه ؟؟

شوفي

وحده في يدها حنا >> حلو ؟
تزوج عليها جوزها مدري زوجها >> تمام ؟
والحنا لسا في يدها >> طيب .. هذا مثل يتكلم عن سؤ الحظ ومدري ايش وش جاب طاري النشاط الله يطول بعميرك ؟
يمكن البنت بس ماقدرت موقفه الانساني وتزوجها بعض الحريم استغفر الله ودك تخلها معلاق هدوم من كبر خشمها

طبعاً بعد ما أمتص شباب أم العيال وعافيتهايازاااااااااالم ومايرحم ......

امتص شباب ام عيالها ماصارت حرمه ذي عصير سن توب الله يسلمك ياسوسو عادي الرجل يتزوج على ام عياله اذا صار مايقصر معها اما انه هو اللي يمتص عافيتها معصي الا الحرمه اللي تمص عافيت الرجال وتمص حلاله وتلعن شكله

>> تحمس هههههههههه

لا جد عاد يمكن بس حريمنا هم اللي يتغيرون اذا تزوجو اما حريم باقي الدول مايتغيرون .
يمكن عشان حريمنا يقدرون شئ اسمه الرز مايهتمون فالفواكه اللي تحافظ على جمال بشرتهم .
تصدقين عائلتي من كثر اهتمامها بالبشره والصحه صرنا كنا سوريين
(( حمرانن عطران )) << مثل تقليدي غير معروف عند البعض
على قولت المثل التايلندي اللي يقول : (( يا حواء اكلي الفواكه بطريقه اسهل .. عشان مايجي جسمك تبعجات وترهل )) >> الله يذكر غزيل بالخير

وأنت ايها الرجل العزيز هل تتزوج على زوجتك اذا كانت صغيره وشابه وهي في قمة العنفوان ..؟؟

أم هل تتزوج عليها اذا عجزت وأصبحت تجدل ظفايرهاوتدهنها بأبو فاس وتستخدم الفكس

شكرا شكرا >> مالها دخل !!

لا اقصد حلوه ايها الرجل العزيز .. بغيت اقوم اكوي شماغي ولبسه وكمل الرد عموماً ودي اتزوج عليها وهي شابه احسن متزوج عليها وهي عجوز لان من طبع الرجال انهم ما يجحدون العشره وما يخونون ودائماً وافين والحريم هم اللي يقلبون

ودليل اغنيه عاصي :
يناكر المعروف ...... ااه وياويلي واوف >> شوفي المسكين وشلون يتـألم

عشان كذا بتزوج عليها في شبابها لأن اكيد ما راح اتزوج عليها لعانه لازم يكون فيه سبب للزواج
بس منيب متزوج عليها اذا كبرت لانها كيد كانت عاجبتني طول هالسنين لبى قلبها ولبى ريحة الفكس اللي في ركبتها

موضوعك رائع وانتي بعد رائعه

تقبلي تحيات ابو طمرات متعدد الزوجات طبرجل

[منتهى القريش]

اختي احلى سوسو

والله انك منوره الاستراحه كأنك لمبة في ظلام الليل البهيم

من زمان وانا حابه اشارك في هذا الموضوع بس كلما جيت اسجل خشوش في الموضوع قلبي يعورني

انا ضد الفكرة من أساسها ما أحب اي رجال يتزوج مره ثانية مهما كانت الأسباب
واذا فكر يتزوج الأحسن يطلق الأولى مع ان الطلاق أبغض الحلال ... ليش يطلق الأولى؟
لأنه لازم حتما ضروري وحده منهم راح تنظلم يا الأولى يا الثانيه وأكيد اذا كان عنده أولاد من الأولى نفسيتهم راح تعورهم بقوه ليش انه ما احترم العشره واتزوج على امهم ...
الزواج من ثانية يحطم نفسية الأولى ويأثر سلبا على أولادها ... ودا الكلام ما اقوله جزافا (لا مثقفه) والدليل جزافا ...
المهوهم الأحسن ومن البداية يظل على وحده ولو طلعت عيونه من راسه (ترى دادي متزوج ثانيه) حلوه دادي ...
ما أدري هالموضوع يجيب لي مغص في راسي... ودي استرسل اكثر بس اخاف ما اطلع الا بكره

مودتي يا صاحبة الأفكار الجميلة

[احلى سوسو]

^
^
منتهى قريش هلوات ..
هههههههههههههههههههههه حلوووووه خشوش خخخخخخ
والأحلى مغص الراس يامنتهى عليك وصوف جابت لي صداع في بطني خخخخخخخخخخ

أسمعي ترى كل الحريم عندهم هالحاله بس الواقع يفرض نفسه الحين حالات الزواج من ثانيه مو هي الي كاثره لأ أبشرك حالات الزواج من الثالثه والرابعه !!

منتهى منووووووووره الموضوع والحمد لله تم تسجيل خشوشك بسلام ..

[احلى سوسو]

الرسالة الأصلية كتبت بواسطة متعب الخامسي

الله يحييك ومنورة الاستراحه

بصراحه ودي ارد على موضوعك بس حبيت أرحب فيك

وللموضوع عودة إن شاء الله وإذا مارجعت الماريه الغفله <<اسلوب رد جديد



مالومك يا راكان بالغصب تبي الناس تدلعها<<قلب الموضوع شات

تراها مزوح ولي رجعه تحياتي لكم

---------------------------------
^
^
مودلع هي الحقيقيه <<ياوثقه

أخوي متعب جزاك الله خير وألف شكر على الترحيب

هلووووووووووووات

[احلى سوسو]

الرسالة الأصلية كتبت بواسطة حسن آل مسفر

هلا احلى سوسو

يالله انك تحييها هلا ببنت الاقلاع الثانيه المنضمه لكوكبتنا المستريحه <<< تيمنن بالاستراحه

وعلى فكره ترا عندنا مراكي ومساند للبيع

تو مانورت الاستراحه والله

اخبر فيه لمبتين في السور اللي مناك طافيات وولعوا اليوم والظاهر انك انتي اللي ولعتيهم شكلك جايبه سلم

<<<<<<<<< وجهن يقول لو فيه بنات يشتغلون بالكهرب كان كل يوم اخرب عداد الكهرب



وبالنسبه لتسؤلاتك << شربت زيت زيتون عشان تطلع ذا الكلمه ابجاوب الجزء اللي يهمنا يامعشر الرجال <<< كان ناوي يجاوب على كل الاسئله والله من زود الاجتهاد

فجوابي وعمرك وعمر السامعين يطول <<<<< تربع

الرجال مسموح لهم شرعاً يعرسون على اربع حريم <<<<< بغيت اقول يجوز وذليت اتصفق رغم انها يجوز بقوه بس قلت اقول مسموح اهون شوي اغديه ان صار فيه تصفيق يكون تصفيقن سمح


المهم ان المره يجب ان تكون سنعه عشان زوجها مايعرس عليها واذا كانت تسمع بالسنع حتى لو هي عمرها خمسطعش سنه بيعرس عليها يعني بيعرس عليها

متصفق متصفق الله لايعوق بشر

تشاووووووووو

^
^
الحين عندكم مراكي ومساند للبيع وتقول تشاو <<ياكافشتهم أنتي ..

أشكرك على الترحيب وأحس انك أخجلت تواضعي ويستاهل لأنه كان مغرور

أهــــــم شي السنع صحيح بس مو في المرأه حتى سناعة الرجل مهمه

وترى لو سمحت لا تطلع عننا أشاعات اننا عنيفات ونصفق وكمالات أجسام

صفة الركب السود ولزقتوها فينا لزقة جونسون الحين تبون تلزقون فينا صفة الخشونه

أبو علي مرحبا بك ..

منوووره الموضوع يافندم

[احلى سوسو]

الرسالة الأصلية كتبت بواسطة يزيد بن غشيّان

اهليـــــــــن سوسو نورتي شعبيات يا نجمة الاقلاع

موضوعك في قمة الحساسيه ويبغى له حريم كثير عشان يكون النقاش اصدق
انا من ناحيتي الزواج الثاني بيكون بعد الاول بايام قلائل لان الاولى انا ما اخترتها << بينطقّ برضو

سوسو ولكم في قهوة شعبيات حيث البراد وحليب الخلفات والمقلقل وما الى ذلك

دمتي بخير

-------------------------------
^
^
يزيد بن غشيان وش يقرب لك فهد الغشيان <<لاعاد تتفلسفين

صح اذا الرجل ما أختار المرأه يمكن انه يتزوج عليها سلامات يابوو الحين وفي مجتمعنا من الي يختار ربعهم الوالده تختار لهم ونصهم الخطابه والربع الباقي شختك بختك

يزيد شكلك ناوي لك على نيه ولا تبي تختار يازين الأعذار عندكم مادري من وين تجيبونها !

طيب وحنا نبي نختار بعد << يقال لها تحجر الحيييييين

هلوووووووووات بك يزيد منور الموضوع <<ماصدقت خبر يوم قلت عنها نجمة الأقلاع

ألف شكر لك

[احلى سوسو]

الرسالة الأصلية كتبت بواسطة ثامر الشعيفان

هلا بـ " أحلى سوسو " وشلونتس ووشلون العيارين من هناك ؟

سبق وأن ودار نقاش مطوّل حول الزواج من ثانية في منتدى حواء سابقاً في موضوعٍ للأخت الفاضلة نجدية ..

وقبل الحديث عن وجهات النظر يجب على الجميع أن يعرف أننا نتحدث عن حكمٍ من أحكام الشريعة لذلك يجب الرجوع إلى مصادر التشريع وربطها بالواقع الإجتماعي ونقل رأي أهل العلم والإختصاص

وسأوجز وجهة نظري حول هذا الموضوع فيما يلي :

غلاء المهور و محدودية الدخل ارتفاع نسبة البطالة في المجتمع كلها معوقات تقف في وجه أي زواج .. أفـ بعد ذلك نضيف عقبةً أخرى في الزواج وهي أن لا يكون متزوجاً من قبل !!
القضية مشكلة اجتماعية حقيقية والحل موجود ولكن الأهواء تحكم .

المرأة بحاجةٍ إلى رجل كما أن الرجل بحاجةٍ إلى امرأة
هي حاجةٌ فطرية إن لم تفرغ فيما يرضي الله قادت المجتمع إلى ما لا يرضى الله وكثر الفساد وتعددت الجرائم .

والزواج نعمة من الله سبحانه وتعالى امتن بها على عباده وهو أيضا من سنن الأنبياء والمرسلين كما أنه من هدى الصالحين وقد أمرنا به ربنا جل وعلا في كتابه بقوله: ((فانكحوا ما طاب لكم من النساء مثنى" وثلاث ورباع فإن خفتم ألا تعدلوا فواحدة أو ما ملكت أيمانكم ))

انا أبعرف اللحين وش المانع من ان الشخص يتزوج ثانيه اذا توفرت كل هالشروط فيها مع وجود الأولى ؟ اذا كان الزواج هذا بيحقق أيضا للمرأة الثانيه الاستقرار النفسي وقد تنجب أولاداً وتضمن حياتها الاجتماعيه مع رجل .

يجب على الجميع تغيير فكرة أن الزواج من ثانيه عصاً لضرب الأولى المسألة مهيب مسألة تقصير رغم ان التقصير قد يكون أحد الأسباب اللتي تجعل الرجل يفكر بالزواج بأخرى ..

وبعطيك بعض الامثلة عن حاجة الرجل للزواج من أخرى رغم عدم تقصير الأولى :
فمثلا قد نجد رجلا يحب النسل ومع ذلك هو متزوج من إمرأة لا تنجب لعقم أو لمرض أو غيره أفلا يكون أكرم لها وأفضل له الزواج من أخرى تنجب له أولاداً مع بقائها وضمان حقوقها ؟
وقد نجد رجلا آخر قوي الغريزة ولكنه رزق بزوجه قليلة الرغبه في الرجال او ذات مرض او يطول حيضها (تكرمون) أفلا يتزوج من أخرى حليلة بدل من أن يبحث عن أخرى خليلة ؟
قد يزداد عدد الاناث ويكثر على الرجال وخاصة في اعقاب الحروب التي تلتهم صفوة الرجال والشباب وهنا تكون مصلحة المجتمع والفتيات في أن يعشن ضرائر لا أن يعشن العمر كله عوانس محرومات من الحياة الزوجية، وما فيها من سكون ومودة وإحصان، ومن نعمة الأمومة، ونداء الفطرة في حناياهن يدعو إليها.

انا لست ضد ان تتزوج المرأة من شاب أعزب ولكن ما المانع لو تقدم اليها من لديه القدرة وهو متزوج ؟
فهي اما ان تعيش محرومة من الزواج ... او ان تكون لعبة يعبث بها من يعبث ...واما ان تتزوج

وعلى الجميع أن ينتبه إلى ما يقول فلا يكون كــ الغرب الذي أنكر تعدد الزوجات وشنع على المسلمين على حين أباح تعدد العشيقات والخليلات، بلا قيد ولا حساب، ولا اعتراف بأي التزام قانوني أو أدبي، نحو المرأة أو الذرية التي تأتي ثمرة لهذا التعدد اللاديني واللا أخلاقي فأي الفريقين أقوم قيلا وأهدى سبيلاً ؟


والزواج من أكثر من واحده في الاسلام له قيد و شرط
فأما القيد : فــ هو أربعه نساء
وأما الشرط : فهو العدل في المأكل والمشرب، والملبس والمسكن، والمبيت والنفقة ...
فـ من لم يستطع العدل أو لا يجد في نفسه القدرة على ذلك فيحرم عليه الزواج ... ولا يدخل في ذلك الميل القلبي لقوله صلى الله عليه وسلم "اللهم هذا قسمي فيما أملك، فلا تؤاخذني فيما تملك ولا أملك"


ولو أن ليس في تعدد الزوجات فائدة لما شرعه الإسلام لنا ، كما أن البعض قد يظن أن الإسلام كثر من عدد الزوجات في حين أن رسول الله صلى الله عليه وسلم أمر أحد أصحابه وقد كان متزوجاً من عشرة نسوة أن يُمسك أربعةً منهم ويسرح البقية بإحسان

وبالنسبة للغيرة ورأي الزوجة فـ هو معروف ولم يخلو بيت أشرف الخلق صلوات ربي وسلامه عليه منها وذلك في حديثه حينما كسرت أم المؤمنين عائشة رضي الله عنها وعن أبيها الصحن وقد أتاه من إحدى زوجاته فأخذ يجمع الطعام بيديه وهو يقول : (( غارت أمكم ))

والإسلام لم يُوجب تعدد الزوجات بل وقد حرمه على من لا يستطيع العدل ..

هذا ما عندي وأذكر أن الرد في الأمس كان يحتوي على نقاط أخرى لكن لعلها اختفت عن طريق الخطأ بعد تعديلي للرد
شكراً

--------------------------------------------
^
^

أخ ثامر أناطيبه الحمد لله والعيارين يسلموون عليك كثييييييييير السلام ..

ردك رائع ينكتب بماء الذهب

أخ ثامر صحيح يعني تصور الغيره كانت عند أمهات المسلمين فما بالك بغيرة بنات الحين تلاقيها حقد دفين وبغض يزرعونه في قلوب عيالهم بعد !

والأسلام حرم الزواج من ثانيه اذا لم يكن هناك عدل ـ والله أول مره أعرف هالمعلومه ـ بس الي أعرفه ان معظم الزواجات من ثانيه الحييييين خاليه من العدل هل تعتقد انها حرام


مشكلة الناس وأدراكهم المحدود لحكم هذا الدين العظيم ولا يجيك واحد يتتن ولا يصلي وحالته حاله ويقول أنا بعدد تأسياً بالرسول اللهم صلي وسلم عليه !!

أشكر لك مرورك

تحيتي ..

[احلى سوسو]

ثلاس طمرات ...

الحين أنتي بنت ولا ولد -------->>صورة أردني لابس بدله وحاط على راسه شماغ

يا هلا ويا مسهلا يا احلى سوسو .... اعداد ماقال الديك كوكو كوكو .... ياللي من حلاك كل من شافك قال شوفو شوفو

^
^
أشكرك على الكلمات الي تصلح تتلحن وتنكتب بطريقة الراي الجزائريه وتغنيها فله خخخخخخخخخ

ماصارت حرمه ذي عصير سن توب

^
^
ترى سن توب دنمركي !!!

معصي الا الحرمه اللي تمص عافيت الرجال وتمص حلاله وتلعن شكله

^
^
طيب لا تحمس الله يهديك بينط لك عرق ثمن نبلش بك ..

الحرمه هي الي تمتص عافيته وحلالهطيب ما أختلفنا بس ماتقدر تتزوج عليه
هو ومع انه عافيته وحلاله أمتصتهم الأولى رايح يتزوج ثانيه الأخ من وين جاب العافيه والحلال والأولى أمتصتهم ـ كل ما كتبت أمتصتهم تذكرت النحله خخخخخ

الله يذكر غزيل بالخير

^
^
من هذي أخت عبد الله بالخير !!

بس منيب متزوج عليها اذا كبرت لانها كيد كانت عاجبتني طول هالسنين لبى قلبها ولبى ريحة الفكس اللي في ركبتها

^
وبالمره تكون انت بعد شايب يالله حسن الخاتمه تلاقي أحد يقدس ريحة الفكس مثلك ياعيني على الألفه ههههههههه

ثلاث طمرات مدري ليه هاليوزر يذكرني في أبو شكيم الأردنيين ودي أقول شو هاض يازلمه

ألف شكر لك ولردك ..

تحيتي ..