[سالم العمراني]

عظيم الكسره
.
.
.

من يقول الوقت طبعه للجروح يخفّي=والله إن بعض الجروح يبان لك من كبره!
تبترم بقعا على راس الشقي وتلفّي=ويتذوق مّر صبره والقهر والعبره
السنين تعلّم اللي مادرس بالصفّي=بين جرحٍ مايطيب وبين شيبة شعره
لين عمره من حياته ينتقص ويكفّي=الطعون بصدر عمره والرماح بظهره
واهني اللي بخالي مبعدٍ ومقفّي=جايبٍ للنفس خير ومسعدٍ في عمره
بدويٍ ماهو عالدنيا كثير الشفّي=كل همه في حياته الجمل والبكره
لاظواه الليل سرّى فالنجوم وهفّي=مرتهن لحظة صفا في شبته بالسمره
هل يساوي العمر دامه هانيٍ ومغفّي=هل يساوي من بليله دمعته منحدره!
يابحور الهم صدري بللّيه وجفّي=مارهق قلبي خلاف أمواجك المنكسره
أتماثل للظمايا بالروّا من كفّي=وأتظاما ماسقاني به قصيدي قطره
كل ماخايلت برقٍ فالشمال يزفّي=قمت أخيل أيام من عمري براس الظهره
كن تكشف لي الطلّول القاصيه وتشفي=قدم عيني وهي على رغم المنازل قفره
واجودي وجد من جاه الخبر متوفّي=العود أبوه بحادثٍ وأمه وكل الأسره
طاح من دون الحقيقه ذاهل ومختفّي=طاح ماله من عضيد أو من يعيل الحسره
أو وجد( يوسف) .. في الغيابه! والخوان إتدفّي=أو وجد أبوه من المفارق وإنقطاع النظره
أو وجد قلبي يوم طاح من الفراق ورفّي=بعد صاحت له ظلوعي .(ياعظيم الكسره)..
طحت .. من عقب المقافا والريّاح إتسفّي=في عيوني وأكدت لي غيبته بالعشره

[محمد الدحيمي]

رائع رائع ياسالم
صح فكرك

[محمد جفال]

من يقول الوقت طبعه للجروح يخفي
والله أن بعض الجروح يبان لك من كبره

صدقت والله ياسالم وأسلوب رائع للابحار
بنا في اعماق البحر ..

يـــابـــحــــور الـــــهـــــم صــــــــــدري بــلــلّـــيـــه وجـــــفّـــــي
مــارهـــق قـلــبــي خــــــلاف أمـــواجـــك الـمـنـكـســره

الله عليك .. كم توقفت كثيرا عند هذه الصورة
الفنية الجميلة التي وافقت بين المعنى والتصوير
بدقة متناهية تنم عن شاعرية فذة لسالم العمراني

شكرا ســــــــــالم