[سعود الخويطري]

السلام عليكم ورحمة الله وبركاته

بسم الله الرحمن الرحيم

الحمدلله والصلاة والسلام على رسول الله وعلى آله وصحبه أجمعين


هذه القصيدة مرثية قالها :

الشاعر / حمد بن قريان الخويطري العجمي


في رثاء كل من : الشيخ / فيصل بن عجران الخالدي
الاخ / حسين بن دغيم الخالدي
الاخ / منصور بن محمد الخاطر


الله يرحمهم ويغمدهم الجنه , وكل الشكر للشاعر : احمد الخالدي...:


علـم لفانـي فجـر القلـب تفجـيـر = " جو الحفر " ضاقت بعينـي ركونـه

لا عـود الله علـم بعـض المسايـيـر = لا واسفـا قولـة هــلا والمعـونـه

جابو مـن الديـره صـدوق التقاريـر = علـم النكـد جابـوه لــى ينقلـونـه

كنهم خـذوه بسمـر الافـلام تصويـر = نـهـار رابــع عـنـدي يحللـونـه

عـن حـادث قفـا بـروس المناعيـر = من دون "ابو سمـره" يقولـون دونـه

"جفرة نكد " لأ مطر ثراهـا شخاتيـر = جعل الولـي منهـا يصاغـي مزونـه

عوض مطرهـا جعلـه الله معاصيـر = يقـفـاه زلــزال تـهـاوا بطـونـه

بيـن المراكـز مـا تمـر السيايـيـر = عشريـن عــام دربـهـم يخلفـونـه

" جفرة نكد " شـر علينـا بـلا خيـر = فيهـا جـرا الجـاري بكافـه ونونـه

لاوالله الأ مــات فيـهـا مشاهـيـر = "ثلاثـة " سلـم الـوفـاء يدركـونـه

وافيـن فـي عينـي بكـل المعايـيـر = ومـن قـاس بقياسـي تدلـه عيـونـه

كرمـان ظفريـن زحـول مصاطيـر = كـل يلـم المرجلـه فــي زبـونـه

كعـام الضديـد ومرتكـا للمخاسـيـر = فيهـم عـن الباقيـن عنـدي نمـونـه

مركـا لزنـدي لا تـردو المعاثـيـر = أخـوان لا شكـه ولا بـاب خـونـه

صحبه سنيـن مـع طـوال التشابيـر = روحـي بهـم بيـن العبـاد مغبـونـه

الشاهـد الله مابهـم ربــع تقصـيـر = ايشرفـون المجلـس اللـي يجـونـه

لا جيت جوني مـن بعيـد المشاويـر = وأن غبـت عنـي مـن لفـا ينشدونـه

واشفـق لشيفتهـم قبـل شيفـة الغيـر = ولكـل طيـر مثـل مـا قيـل لـونـه

مافيهـم الـلـي يتـقـي بالمعـاذيـر = الـيـا بـدالــي لازم يـدركـونـه

ون جالهـم لازم نـسـوق التباشـيـر = يـدرك بـجـاه الله كــوده وهـونـه

أقفـا بهـم هــدام روس الطوابـيـر = عـزران تمضغهـم نواجـد سنـونـه

وذي قـدرة الله مـن يـرد المقـاديـر = بقعـا رحاهـا للخـلايـق طحـونـه

اقفت " ببن عجران فيصل " علي السير" = وابـن دغيـم " مـا تقضـت شطونـه

" والخاطري منصور " ريف المعاسيـر = غناة مـن رزقـه علـي بـاب شونـه

كسرة عصا راحو كما انجايـة الطيـر = ولـكـل منـهـم لابـتـه يرتجـونـه

خلـو بحلتهـم صـغـار مقاصـيـر = بعـض الحكـي لا واسفـا يجهلونـه

وعجزن تخطيهـن بـروس البواكيـر = لا واسفـا بالوقـت مقـوي طعـونـه

يجبر عزاهن رازق الحوت في الهيـر = من يلتجـي لـه مـا يخيـب ظنونـه

يـا قلـب هـود مـن كثيـر التفاكيـر = حـل القضـا والحبـل جافيـه غونـه

ويالعين وشلـش بالبكـا عينـي خيـر = ماشي براجـع لـو بكيتـي محزونـه

نرجي لهـم رحمـة حسيـن التدابيـر = فـي جـاه مـن يعلـم خفيـات كونـه

تنشـر صحايفهـم مـع الله مغاتـيـر = آ ميـن يامـن يرجـي العبـد عونـه

ترزقهـم الجنـه وحــور غنـاديـر = واللـي بقـا مـن طارفتهـم تصونـه


وســــلامتكم .

الشاعر / حمد بن قريان الخويطري.


الخويطري

[نواف الشمري]

.



اخوي الخويطري



أهلا بك بعد عوده ..



وأهلا بمواضيعك ..



صح لسان الشاعر حمد بن قريان الخويطري العجمي


والله يرحم فيصل بن عجران الخالدي
و حسين بن دغيم الخالدي
و منصور بن محمد الخاطر


ويسكنهم فسيح جناته ...



يـا قلـب هـود مـن كثيـر التفاكيـر = حـل القضـا والحبـل جافيـه غونـه

ويالعين وشلـش بالبكـا عينـي خيـر = ماشي براجـع لـو بكيتـي محزونـه

نرجي لهـم رحمـة حسيـن التدابيـر = فـي جـاه مـن يعلـم خفيـات كونـه

تنشـر صحايفهـم مـع الله مغاتـيـر = آ ميـن يامـن يرجـي العبـد عونـه

ترزقهـم الجنـه وحــور غنـاديـر = واللـي بقـا مـن طارفتهـم تصونـه


اللهم امين ..


شكرا على النقل ياسعود ..


.

[سعود الخويطري]

هــلا بك مليون يانواف الشمري

صح بدنك وولانت والله يحيك


ويامرحبا بك وبردك وتعقيبك ووجودك الطيب , ولاعدمناااك يالغالي

تحياتي

الخويطري

[محمد العريني]

صح لسان الشاعر..



و رحم الله المتوفين..


و اسكنهم فسيح جناته..




لا هنت اخوي سعود..

[سعود الخويطري]

حياك الله يـ محمد الحراب وولاهنت

ويامرحبا بك وبردك وتعقيبك , ووجودك يشرفني

تقبل سلامي

الخويطري

[ساقي الضمايا]

ويالعين وشلـش بالبكـا عينـي خيـر = ماشي براجـع لـو بكيتـي محزونـه

نرجي لهـم رحمـة حسيـن التدابيـر = فـي جـاه مـن يعلـم خفيـات كونـه



صح لسان ال خويطر

ولاهنت

واللهم ارحمنا برحمتك

سلاااااااااااااااامي

[سعود الخويطري]

حياك الله ياساقي الضمايا

ويامرحبا بك وبردك وتعقيبك الطيب , لاهنت يالخوي

تقبل سلامي

الخويطري