مشاهدة مشاركة بصفحة مستقلة
قديم 01-03-2003, 20:55   #1
عبير بنت أحمد
العضوية الماسية للموقع
 

wa . ..ــــ 10 قصائد فقط ..و.. وداع ــــ.. .


. ..ــــ

سلام ُ الله عليكم

و
إليكم
.
.
.
/... شئ ٌ من الفخر .../
(1)
.
.
.
. ..ــــ أنـتـم الـدولـة ــــ.. .


سنة .. تقفي سنة .. تقفي سنة .. تقفي وراها اعوام

............................... على عهد المودة كل شعب ٍ وانتم الدولة


غرستوا تربيتنا تحت ظل وراية الإسلام

............................... وغرس ٍ كان غرسه من وراكم ؟ حظ محصوله


نعم يمـــه فديتـك كل يوم ٍ وانتي الإلهام

............................... لكل اشعار كتـــّاب القصايد واللي بآقوله


بحضنك يا بعد قلبي سهرنا.. وان بغينا ننام

............................... تلحفـنا حنانك و السـهر لك سحـّـب رجوله


وهذي يا يبه بنتك تسابق ظلــــّـها قــدام

............................... و فخر ٍ مافتخرته لك .. أجل بالله منهو له ؟!


ابوي احس ابوي إن قلتها .. صار الوجود ْهيااااام

............................... وانا خبري من اول مُعجبه .. والحين مهبوووووله!!


مضت عشرين عام ٍ .. كنــّها من عِشتكم .. أيام

............................... ووقت ٍ دونكم ( وان كان لحظة ) .. قلت يا طولــــــه


وانا يا شاعرة .. إسم اني اكتب و الـهــِـم ِ الأقـلام

............................... ولكن .. لا قصيد ٍ عبـــَّر وْ لا جبت مدلوله


عساني ما اخلا منـكم واحقق معكم الأحلام

............................... ودام اليوم عيد ٍ .. كل شعب ٍ وانتم الدولـه

ـــــــــــــــــــــــــ
.
.
.
/... شئ ٌ من الفكر .../
(2)
.
.
.
. ..ــــ كـنـت أفـكـر ــــ.. .


كنت افكر ويش يعني فيك زايد..

............................... عن جميع الناس يوم اني أبيك ؟


قلت اخوي؟ / وصاح بي "صَرفي" يكايد :

............................... لا "أخـوك" ولا "أخـاك" ولا "أخيـك" !!


من وانا طفله وانا قلبي محايد

............................... مادريت اني بابيعه واشتريك !!


كل سهل ٍ دون حبك صار كايد

............................... وكل كايد تزهله لمسة يديـك


ما لبست الا مسابيحك قلايد

............................... ما كحلت الا عيون ٍ تحتويك


ما سكت ّ إلا إذا صمتي فوايد

............................... ماحكيت الا إذا سولفـت فيك


وان ذكرتك ليل / جافيت الوسايد

............................... وان ذكرتك صبح / شبيـّت التريك


واخفي اسمك لا قريته فالجرايد

............................... من كِثِـر مآاغـيـر يا قلبي عليك


والهلال إن هلّ ..محد ٍ به يعايد

............................... يحسبــــونه حاجب ٍ من حاجبيك


قلت لي بآجيك وثيابي جدايد

............................... راحت اعيادي وحـنـّا نحتريك


جيت احبك وابدع بيوت القصايد

............................... قلت يمكن // هالذي جاني يجـيك


ليه افكر ويش هاللي فيك زايد ؟

............................... يكفـْي اللي زايدك ... كوني أبيك

ـــــــــــــــــــــــــ
.
.
.
/... شئ ٌ من الخذلان .../
(3)
.
.
.
. ..ــــ قـد ّ الـمـراجـل ــــ.. .


من قال حنا نبي لك شي يالغالي؟

............................... لا صرت كلْـما تكحلـّها.. بتعميها


حطيت عندك أمانه من ردى فالي

............................... وازريت اقول إن حاميها حراميها


موروث طيبي .. وطهري وانصع اعمالي

............................... ظنوك بانك على ماقيل راعيها


ياكثر ما خاب فيني ظن عذالي

............................... وياكثر هقوات خابت قبل لاهقيها


ما شفت نخل ٍ وجا لي تمرها حالي

............................... الا والاقي دسيس السمّ ساقيها


مدري تثاقلت اشيل الهم بلحالي...؟

............................... مدري كتوفي عليّ اليوم وش فيها ...؟!


طقيت انا كل باب ٍ شفته قبالي

............................... ما غير باب الرذايل قلت مابـيــها


جنـّبت سمعي دروب القيل والقالي

............................... ورفعت نفسي عن اللي هو يماشيها


عند الشدايد أحلّ معقــّد حبالي

............................... واشد روحي على الضيقات وارخيها


والخير.. مهما جفوه الناس .. يبقالي

............................... والناس ما تجفي الا من تردِّيــها


جربت صمتي لقيت الموتة اشوى لي

............................... والموت عيا على صمتي يعـَـدِّيها


وان صرت بنت ٍ فلانيب اصغر عيالي ؟؟

............................... قدّ المراجل ...
.
.
.
وانا ابــــــــــــــــــوها ... واسمّـــيـها !

ـــــــــــــــــــــــــ
.
.
.
/... شئ ٌ من الإنكسار .../
(4)
.
.
.
. ..ــــ مـيـلاد انـتـحـاري ــــ.. .


أدري انه ما يهمك بس جيتك : شوف عينك

............................... منها آسلـّم عليك.. و.. منــّها آرد اعتباري


يوووه لو تدري.. جهاتي الاربعه - بيني و بينك –

............................... كلهم من زود حبك زاحموا فيني يساري !!!


علـّـموك شلون ترفع راسك و تعـْـقـِــد يدينك

............................... ما تشوف إلا عبيد ْوخافـقـك كله جواري !!


إلتهيت انت ْبغرورك قلت اجل " خله رهينك !! "

............................... خفت لا تكسر كلامي، كافي ٍ فيني انكساري؟؟!!


يوووه يا ذيك المحبة. وينها. ويني ..ووينك ؟!

............................... هو صحيح ان المشاعر كل مافيها تجاري !؟؟؟


أنتصر لك فالمحافل لاجل نـقــهـر عاذلــيـنـك

............................... وانت .. قدام العواذل تنسحب .. ما جبت طاري ؟!


ما دريت اني بكيييييييييت ولا بكيت إلا لعينك

............................... والمصيبة وش يهونها علي ّ لاصرت داري ...!!


ويــيييييـــن كنت انت الذي لا شفتني.. يشرق جبينك

............................... ما بقى من ذكرياتك غير تنهيــدة نـهـاري !!


لا تعوّدني صدودك يرحـــم الله والدينك

............................... كيف يتحمل دلال المترفة عيش الصحاري


كان جالك عـِــز ّ مني .. ردّه.. الله لايهينك

............................... نفسي ارجع يوم والقى غير ذلـِّي فانتظاري !!!!


قـلــّي وين ألقى دموع ٍ في حياتي ما تدينك؟

............................... إرتكب جرمك ولكن خل موتي باختياري !!


حِسـْـت ابو التاريخ !! ادوّر عن ولادة ياسمينك

............................... مالقيت الا وداع ٍ فيه ميـــــــــلاد انتحاري !!!


ادري انه ما يهمك بس جيتك : شوف عينك

............................... جيت بآسلـّم عليك.. ورحت من دون اعتباري

ـــــــــــــــــــــــــ
.
.
.
/... شئ ٌ من التوبيخ .../
(5)
.
.
.
. ..ــــ هـز ّ فـنـجـالـك ـــ.. .


إشتاق لك قلبي كثِـر ما جيت في بالك

............................... شف ما إذا بالك تـكـرّم ..وانشغل فيني !!


تنشد وصالي.. والهوى مقطوع بوصالك؟؟

............................... لاوانت من زين الطبايع تسألَه : ويني؟!


أمداك تنسى جيـّــتك يوم انت يرثى لك

............................... وخليت لك عزّ ْايتمــنــّونه سلاطيني !!


ولــْبسْت لي وجْه ٍ بـ لون ٍ أسود ٍ حالك

............................... ولبست لك نور ٍ توهـّج في شراييني !


سبحان ربي .. في الكِذِب يا ضعفها حبالك

............................... وشلون تقوى مثلــها حدّة سكاكيـني !!


انت الذي أحسن خصالي بالوفا جا لك

............................... وانت الذي ما خذت منـْـك إلا ثقل طيني !!


مابيك يا حظي وفال الله ولا فالك

............................... دام الكرامة حطها الله بينك وبيني


رح للغباء اللي سِكنك ونوِّخ ِاْجمالك

............................... لاصرت منتب كفو تسكن بساتيني


إحلم حبيبي بالقمر لامن تهيـّالك

............................... لا طايل ٍ شوفي ولانـتــب مالي ٍ عيني !!


ياخي من التوبيخ تكفى هـِـزّ فنجالك

............................... تدري كريمه عاد لا صبّـيت .. يا شيني !!


لولاي اخاف اللــه ماخليك في حالك

............................... لافضح رداك ومن شعَـلني لاااا يطّـفيني !!


إن كان كـل الرجــال تــشابه افعالك ؟؟

............................... الحـــمـــد لله... خلقني بنت من حيني


ودّعتك المعبود في حلـِّـك وترحالك

............................... لا حاجة ٍ لي بك ولا لك حاجة ٍ فيني

ـــــــــــــــــــــــــ
.
.
.
//... أبـيـات شـاردة ...//
.
.
.
ياللسعادة .. ما بقى شخص خوّان ...

................... دام الخيانة كلها ... تجتمع فيـك

.
.
.
ما عاد دمعي ينحفظ فالمناديل

...............لا صار ما عند المناديل ذمة...!!

.
.
.
لولاك ذوقي ؟ .. ما هويت و تعَـنـّيت

........................... والا الكمــال ؟..اْمكــمّـل اْفـ بنت أحمد...!

.
.
.
___________
.
.
.
/... شئ ٌ من العشق .../
(6)
.
.
.
. ..ــــ لـيـل الـمـجـرة ـــ.. .


الصدّ منـّك ولـَّع انواري السود

............................ ومن ظـَـلمتي وزعْـت ليــل المجـّرة


حرام نفـعك للعدوّيــن مشهود

............................ وانا ( الحبيبه ) .. نلت منـك المضرة !!


امس انتبادل كل الاوقات بالجود

............................ واليوم .. حتى لي سلامك .. أطرّه ؟


انت الذي في كل الايام مفقود

............................ واللي غبنــِّي .. فوق هذا تـشــرّه !!


شهدي وملحي بالحلا اجتمعوا ْضدود

............................ لكن ترى قهوة تجافيـك مـُرّه


عقبك على حالي شِـفــَق ناحل العود

............................ والشــوق بَـخــَّر دمْع عيني بـ حرّه


للهمّ رتم ٍ بين الاصوات معهود

............................ وفـ الصوت بحـّـه كلـّما الحزن جرّه


والحظ .. جزل ٍ فالعطا مير مقرود

............................ والله مدري لو بخل وش يضرّه ؟!


إن صار حيلك من مِـلاقاي مهدود

............................ فانا غيابك هـــــدّنـــي ألف مرّه


وماهوب منــّك تِـبْدل اللـّين بالكود

............................ الله يبارك في عذول ٍ تبرّه


كانه تِـغلــِّي وانت خليته اْصدود ؟

............................ فالله يجير الحب مـمـا يسرّه


والله يسـخـِّر لك تصانيفي بـ زود

............................ والا غلاي ..الــلـه يكفـّـيــك شرّه


عشقك من اول لين هالحيــن موجود

............................ هذا غرامك في ضلوعي مقرّه


مسكنك قلبي تسقي الدم بـ ورود

............................ تملا عروقي عطر...... لله درّه


تعـــال ودِّي تطــْـفـِـي انواري السود..

............................ حتـــّى أصَـبـِّح بك على هالمجرّه !

ـــــــــــــــــــــــــ
.
.
.
/... شئ ٌ من الوفاء .../
(7)
.
.
.
. ..ــــ ثـمـان أيـام ــــ.. .


ثمان ايام يالظـالم .. تمرّ .. ولا لكم شوفة !!

.......................... ثمان ايام معقولة تمرّ ولا لنا سيره ؟!


انا وعيوني وقلبي و يدّ و يدّ مكتوفة

.......................... تحرينالكم انت ولسانك و ْلمعاذيره


تلعثم .. قال انا احبك .. وقام يعدد ظروفه

.......................... توقعته على العادة .. مثل ماعتدت من غيره !


يجيني .. طالب ٍ قربي ..يزبرق ساحر حروفه

.......................... والا من جَد وقت الجـِد .. قال إن ْ توك اْصغيره !


انا ما خفت من هاجس خداعه لكن الخوفه

.......................... لو أتجاهل بنيــّة صافيه ..؟ بامووووت بالحيره


نشدني .. ( - يااااا بعد عمرِي - وراك اليوم ملقوفه ؟!!

.......................... بعد بكره يجيك العلم ... والله يكتب الخِـيـرة )


أعَرف اني وفـِّيـة لو زمنـّا جارت صروفه

.......................... واعَرف انه وعدني والوعد ويـّاه تفسيره


وصاروا عشرة ايامه... سنيـن ٍ تحتري شوفه

.......................... وانا لليوم ما حاولت اجيب لخاتمي سـيـره

ـــــــــــــــــــــــــ
.
.
.
/... شئ ٌ من الطهر .../
(8)
.
.
.
. ..ــــ يـامـا ــــ.. .


ياما وياما قلت لي .." ياما ْوياما قلت لك "
.......................... ياما وياما قلت لك:" ياما وياما قلت لي "

واضح عليك انت الغلا لكن عزيزي مااجملك
.......................... لما يجي خلف الغلا قلب ٍ بحبي ممتلي

لا بو همومك و الزعل لابو حبيب ٍ يزعِـلك
.......................... آآطى على قلبي إذا قلبك همومه تنجلي

حين ٍ تحسّ انك قمر.. حين ٍ تحس انك ملك
.......................... لكن شعور ٍ تجهله : هو قيمتك بالنسبهْ لي

لا تشتكي نار الهوى دام انــّها تـنـشـَبّ لك
.......................... غيرك يموت من الصقيع ْولا حِصَل له مشعلي

تدري وش احلى ما أشوفه فيك كلك؟..مُجملك
.......................... مدري هو احلى ما تشوفه فيّ .. كلي بـ اكملي ؟

مـاستغرب اسراب النحل يوم انها تنشـدّ لك
.......................... العين في لون العسل و الخد ورد ٍ مخملي

أشفـَق على ذيك الجبال اللي تحاول توصلك
.......................... تتطاول بْـ طين ْوحصى وانت ْفـسمائي معتلي

بدري على شمس الكواكب والمعامل و الفلك
.......................... تنجب مثل نور ٍ الى من شعشع اجْـهَر منزلي

يا صِـبْـر شيطانك عليك ْاشلون هُو مستحملك !!
.......................... أكبر عذاريبك خصال الطيـْب يا شيمة هلي

هُـونك على طهري أنا ودي فقط أتأمـلـّك !
.......................... لك نظرة ٍ لا داهَمَت يخجل جميع اللي عليّ !!

جاوِب ولكن كانها كـَلـْمتـْك (إيـه ٍ) .. باسألك :
.......................... تسمح حبيبي كلمِتِك .. بابني بها مستقبلي ؟

أما ولو صارت بـ نفي ٍ كلمتِك ...... لا يشغلك
.......................... لا صار ياما قلت لك:" ياما وياما قلت لي" !!

ـــــــــــــــــــــــــ
.
.
.
/... شئ ٌ من عزة النفس .../
(9)
.
.
.
. ..ــــ الـلـه واكـبـر ــــ.. .

الله واكبر عليك شلون ترضاها

............................... بنت ٍ رخيصه ..وتعزمها على جاهي؟؟


مثل السحابه تصب ولا نفع ماها ..

............................... ثوب الصحاري ../ مدامه بالرمل راهي


الشمس تشرق ولابه من تحراها

............................... والبدر يسهر طوال الليل بي ساهي


العز داري ودون العز مابغاها

............................... والناس تشفق لدار البن والشاهي


وابسط تحية على مخلوق بالقاها

............................... في كل مجلس ..مفاخر بي ومتباهي


يومك تنشـّد عبير القلب وش جـــاها

............................... ما ردّ قلبك : " بلاني عنــّها لاهي " ؟


سامحت صفحات ذنبك دون ماقراها

............................... وارجع والاقي ذنوبك هي على ماهي


وبطيبة ٍ بي تمـنـــّى مين يسواها

............................... حاولت اعَـذرك ..وعذري صار بك واهي


ما كنت اظنــّك مثيل الناس لولاها

............................... ولاكنت اظنــّك تصير المر فشفاهي


خلــّك تدّنى بحبك مثــْـل شرواها

............................... وخل ّ التميــّز يلاقي حب باشباهي


الله واكبر عليك شلون ترضاها

............................... بنت ٍ رخيصة ...تبـدِّيها على جاهي ؟؟!

ـــــــــــــــــــــــــ
.
.
.
/... شئ ٌ من الروحانية .../
(10)
.
.
.
. ..ــــ الـدنـيـا ــــ.. .



غبيه يالقلوب اللي تبي في ضيقها إنسان

............................... إذا الإنسان في حزة رخاه.. اْيخون محبوبه


أدوّر بالنقا روحي ولا ألقى سوى الخذلان

............................... واسّحب حافي رجولي على الأشواك مغصوبه


نعم .. ياااااما انظلمت .. ودعوتي ما عنــّـها بيبان

............................... ولكني تسامحت و جرعت الظلم من كوبه


وش ارجي من ورا دنيا مشى فيها نبي ..وانهان؟

............................... رفعت الرايه البيضا على ذا الوقت وحروبه


انا ما جيت للدنيا رجا مخلوق ايًّا كان

............................... ولا يوم ٍ بقول لطيبتي .. ياطيبتي توبه


ولانيب انتخي دنيا ً دنيـّه في زمن خوّان

............................... مدام ان الله العالي حفظ للحــــــق مسلوبه


عباتي تستر عيوبي و راسي لابس ٍ تيجان

............................... وعزِّي مالي الدنيا بـ ذل ٍ لابس ٍ ثـــــوبه


أبهرب من عبير الورد واترك عطرها الذبلان

............................... عجزت استفرد بْحالي وانا لاحقني اْهروبه ؟!


حبيبي يا إلـــــهي .. أشتكي لك قلبي الشفقان

............................... وذولا كاتبـَينه وانت تدري ويــش قالوا به


سألتك رحمة ٍ تقبض جروح الروح يا رحمان

............................... ومتعة شوفتك غاية مُـنى الخافق ْومطلوبه


على الدنيا السلام إن كانها ما عمـِّرت بايمان

............................... سلامي واعذريني لو رحيلي قصـَّر اسلوبه

.
.
.
أعزائي ...

ونظراً لظروفي التي تجبرني على الغياب ...

من هنا وددت أن أتقدم بشكري لكل القلوب النقية التي حظيت بثقتها

وإلى كافة الزملاء والزميلات اللذين تشرفت بمعرفتهم في شعبيات ...

ومن هنا أيضاً أتوجه إليكم بالاعتذار عن أي تقصير أو خطأ أو سوء فهم غير مقصود ...

ختاماً و إلى أن ألقاكم على خير

أسأل الله أن يجمعنا في مستقر رحمته ...

وغفر الله لي ولكم ما تقدم من ذنب ٍ وما تأخر ...

لا تنسوني من صالح دعائكم ...

و أستودعكم الله الذي لا تضيع ودائعه ...

/... أختكم في الله .../

عبير بنت أحمد

القصيدة السابقة

ــــ.. .

التوقيع: إيه أنا بنتٍ ولا بي نقْص منها أو خساره
.................. دامني بنتٍ لأحمد ، بأفتخِر بإنِّي بنيّه

اخر تعديل كان بواسطة » عبير بنت أحمد في يوم » 04-05-2003 عند الساعة » 19:54.
عبير بنت أحمد غير متواجد حالياً   اضافة رد مع اقتباس