[خالد العروي]

لشعب شعبيات
الشيء الكثير
من الشوق والحنين

هذه القصيدة
هديه للأخ والشاعر الجميل
عبدالحليم علي الجهني
بمناسبة زواجه .

___

مساء الخير ومساءً غير نسنس عطره الفواح
مساء ما يشبه إلا عيد ليلة غيم ممطوره

مساء كل الثواني ترقص تهلي على الأفراح
مساء شمسا عطت نور القمر نوراً على نوره

تطل الشمس هالليله وخلك يا قمر مرتاح
ووفر نورك لباكر أذا باكر وصل دوره

مساء لا جيت أحسبه مختلف جداً عن اللي راح
أبارك للمساء وأحاول اني ارضي اغروره

مساء عبدالحليم الشاعر المتميز اللمّاح
على عذب القوافي يبتدي رجزه ومجروره

مساء عرسه مساء شعره مساء عطره مساء لا فاح
يعطر في مساءاته قوافي الشعر وبحوره

أبارك له عساه من السعادة يكتسي بوشاح
وعسى دربه على طول الليالي ورد منثوره

تعرفني يا صديقي ماني بجو الشعر مداح
لكن بمثلك الاشعار منهيه وماموره

طلبني الشعر واشر لي تفضل وامسك المفتاح
دخلت من اوسع ابوابه طلعت لعالي قصوره

بدأ يسأل عن اخبارك وجاني يطلب الايضاح
عسى مايطول الغيبه بنبرة صوت مقهوره

تطمن ياشعر أصبر شوي وخالق الارواح
يجيك إلى قضى شهر العسل ومضبط أموره

على آخر بيوت الشعر جيت استاذنك ياصاح
تصدق كل ابياتي بهذا اليوم مسروره

ابا وقف هنا لانه على أقصى الضمير اجتاح
على كيف الشعر يلف بي دوره ورا دوره