[خالد العروي]

تزاحم النجم في عالي سماك الجميل
على انعكاسات نورك كل نجم يحدا

تبقين لون الحياة اللي يداوي العليل
من قبل لـ أبدى مساك القلب عشق ابتدى

القلب لـ أجمل مسافاتك يشد الرحيل
من يومك الأول إلى اليوم لــ ابعد مدى

شربت كل الغلا برضك وربي وكيل
لا جيتك بهم من نسمة هواك يهدى

بشموخك اللي يطاول بالشموخ النخيل
في نهجك المستنير اللي يغيض العدى

تفداك كل الموارد من كتير وقليل
لو تطلبين العمر جيناك قلنا فدى

انتِ لك الله يسرف فيك حتى البخيل
وحتى عديم المشاعر في جمالك شدى

لأنك على الأرض نقطة ضو مالك مثيل
الكون نوره توارى يوم نورك بدا

يا مورد المسلمين الصافي السلسبيل
يا وجه الأرض ومحاسنها يا ريح الندى

يا منبع الطهر عشق في فؤادي نزيل
من كثر ما اطري غلاك القلب شوق ارتدى

تبقين لـ ارواحنا انتِ الذرا والمقيل
الله يصونك من اصحاب الخنا والردى

عسى سماك المخيل وكل وادي يسيل
عساك للحق صرحاً عالياً سرمدى

هذي مشاعر تملك كل واحد نبيل
من قلب يا مملكتنا يا منار الهدى

واللي على موطنه قلبه ثقيل وعليل
لو هو ينادي تبرى منه حتى الصدى

دامه مشى سكة الغاوين ضل السبيل
مع كل وادي إلى سمع المصوت عدى

لاهب ريح الهوى مع كل جانب يميل
ما للنصيحة لعقله درب ضايع جدى

يبي السعد في نهاره لكن ليله طويل
يدور المستحيل وضاع عمره سدى