[علي الخطيب]

معزتك بضميري محتضنها مثـل وكـر الطيـر

يجمّعها علـى عـودٍ وعـود ويـذرى عيالـه

وكم تكرم مدينه لاجـل عيـنٍ كحلهـا التقديـر

انا لـولاك يمدينـي قطعـت الوصـل وحبالـه

تعبت من الزمان اللي بسيفه كـل يـوم يغيـر

وانا اقول احتمـل يابـو عزيـّز والله امدالـه

لم يسبقني احد ان يقدّم استاذه او يحتفي به بين اركان هذا المنتدى الشامخ , حسب علمي!

استاذي وشاعري وصديقي المقرّب – حمد البادي – اسمُ قطف من الشعر اجزله , وزرع قوافيه في ارض عنيزه الجميله

حتّى اثمر اسماً لامعاً في ساحة الشعر العنيزاويّة ...

كيف لا وهو ابن شاعر المحاورة المرحوم ( عزيّز البادي ) , لستُ هنا لأذكر مولده ونشأته , فما يهمّ القارئ سوى الشعر ,

وايّ شيءٍ اسمى من الشعر بصوت هذا القصيمي الجميل ...

..

قال ذات شعر :

آه مـن سخريـّة الأقـدار والوقـت وميولـه

كم يورّد من كبـود حيـام ويصـدّر ضوامـي

واعذابي تسبره عينـي ورجلـي مـا تطولـه

مامنعني عنه غير أمر الحلال مـن الحرامـي

بنت روس رجال حرّة والردى ما هيب حولـه

الشرف والعفّة البيضاء على صـدره وسامـي

مابقى إلاّ ذكريـاتٍ منـه بالصـدر مْحمولـه

كل ماتطـري علـيّ تعطيـن دفعـه للأمامـي

وقال ذات مناجاة :

ياربي رحمتك فوق الذنوب ولا انقفل لك باب
يابو بابٍ وسيع اذنوب خلقه ما يسدنه

وعدك المغفره لموحدينك واسمك التوٌاب
ولو انّه حصل منهم ولو انّه ولو انّه

..

وقال حديثاَ :

يالله صباح الخير يالله مسا الخيـر

البارحـه واليـوم مانيـب رايـق

من ضيقتي فكيت طـوق الأزاريـر

ومهما عملت أحسّ ما زلت ضايق

مٌصَاب باحبـاط وتوتـر وتكديـر

كن الفضا مع جبّ الإبـره موايـق

..

وقال:

لاتقول اخاف مـا امـون لابِالله تمـون

من يمون إن كان مامنت يالوجه الرضي

الولع والشوق نوعٍ من انـواع الجنـون
صاحبه مجنون ضايق ومجنون إن رضي

.

.

قال لي ذات ردّيه ( ويا كثر ردّيّاتنا ) :

مير مدري يالخطيب تمون ولاّ ما تموني؟

داخل البستان وعيونك على خوخه وتينه

فكان ردّي لما قال سابقا :

ايه امون انا كان انا ما امون من بالله يموني؟

الشعار اللي من لسانك معاك مطبّقينه!

...

ابو عبدالعزيز ..

شاعر محاورة من الطراز الأوّل , وشارك في الكثير من الفعاليات والمناسبات

وله جماهيريّه عريضه على مستوى منطقة القصيم , سألني في آخر نقاشاتنا الشعريّة :

وين تكتب يا علي دايم ؟ قلت:

ما بعد شعبيّات يالغالي تشوف

فيه القصيد الجزل واهل الذايقه

فقال ..

مشينا لشعبيّات ..

.

اخيراً



والله ان ابو عبدالعزيزعجزت اقدّمه بالطريقة التي تليق به , ولكن هذا الرجل سيقدّمه شعره وليس انا

اتمنّى ان تكون هذه الاحرف تليق بقامة هذا الرجل ومكانته لديّ شخصيّاً

اعرف انّه يستحق المزيد ,,,

واعلم ان شعره هو من يستحقّ الترقّب من هذه اللحظة ,,,

تحياتي ,,,