السلام عليكم ورحمة الله وبركاته
اتمنى ان تقبلوا هذه المتواضعه مني
صلوا على النبي
ياناشد العلم عندي تعابيره=من حس واقع يجاذب تصاويره
ماهيب فكرة مؤلّف ويتنبّأ=قصة مكافح خذلْته مقاديره
عاش الطفوله برائه بلا عسره=بيديه طيره وتدْهلْ يدهْ طيره
رامي حموله على بوه ولا امه=خفيف متنه رماها على غيره
يحوش لعبه وظحكه ومستانس=يسابق الليل يعْجل بتبكيره
يطغى حماسه على معرفة غدّه=مجنون طبع المراهق وتبصيره
ماهوب يوحي على وين يتوجّه=راسم طموحات بجمل طباشيره
يكتب على كل صفحه عباراته=ذكرى تزيده عزوم ابمشاويره
يركض يسابق جموع وينافسها=والياس يهمس بإذنه ولا يعيره
متفائل(ن)في حياته على مبدأ=حلمك يحقّق مدامه على خيره
كافح وثابر وزاد بمناضلته=ينفع زمانه ماغير الزمن ضيره
يطرد سراب ابلهفْ يحسبه مروى=والناس حوله تهالك مذاعيره
يومه وصلْ مبتغى كان يرقبله=يقول ياليتني خذة تخديره
من هول صدمه تعاكس هقاويّه=هدّة عزومه ووطت مناظيره
مستقبله بالنوايف في احْلامه=والواقع اجروف عثره لدحديره
ملعون ياحظ طولك على عرضك=تخالف الحلم والذات الاسيره
شنت صواديف بقعا حرايبها=وبواب سعده على الوجه تسكيره
صارة مناته يرجّع سقاويّه=ويعيدها أيام بحلامها اصغيره
واللي مضى صعب يرجع على ليته=والوقت قاسي وينفث معاسيره
حلمه على بنت كانت مشاغيفه=في طبعها رسمها كنّها اميره
هنوف في حبّها هاض بشعوره=رسم لها درب وصبح مساييره
تدفع عزومه على وين ماينوي=من شانها زاد في سرعة انبيره
راحت وهو دونها مختزن دمعه= لحظة مفارق تزيده بتحسيره
هلّت عيونه عباير مواجيعه=من بعْد قفّوا الخلايق بتدبيره
اجروح فالقلب زادة له طعونه=والقلب ماهو يطيق ابمعاثيره
أصبح ظليم الهوا والهوا ظالم=زوّد طعونه طعون ابمشاطيره
يسامرالليل والحزن مكنونه=في ظلمة النور يوقد مذاكيره
يبدا بفرّة شريطه وذكراته= ويشين عمرة بكثرة تساميره
حدّة زمانه على فعلة المنكر=خذا سجاره معى وسكي وبيره
هذا وهو كان صالح ومتوازن=يوزن مزاجه على كوب تحكيره
على اثرها خسرْصحبه وأهله=وزادوا على عج وقته بتغبيره
كف الزمن شح سعده ومدّاته=ورهى كفوفه اسى وزاد تبذيره
يخلف تجاه الدروب ومساراته=ويكسر شموخ المنى دون تجبيره
ويسحب بساط الامل تحت جلاسه=ويفرش لهم صدّمه من محاصيره
نقطة بدايه ترى من بداياته=مرجع نهايه ومعها خوابيره
قفاه باسم لولاّ لنا ظهْره=وجهه عبوس ويحيكه بتكشيره
يهتك عروض القوافي اذا جزله=ويكسر عيون اللحون ومحى الغيره
يجرح بخيبات ويْزيد بوجاعه=وعنده على كل سيّات تبريره
والوقت شارع يعثّر خطاوينا=والمرء يخفي العنا في تفاسيره
والعمر توفيق ولاّ شقى دايم=لله حكمه وهذي تدابيره