يارخص هالدنيا / بعين اللي عشقك / ويا غلاك
يعيش بعضي في هواك .. / وميتٍ فيك اغلبي
أنا وبارد قهوتي .. / من أمس واحنا في حراك
وهذا الرماد اللي تشوف
شفت الرماد اللي هناك
البارحـة .. كان حطبي
بـأورد مغاتيـر الولـه / عدكّ واقول أطفي ضمـاك
وليا أرتوت / قلت : اررررجعي يمـّه وعلّي وإشررربي
حيـل الله أقـوى / كلّما قفيت ناداني هواك
وان جيت تجفل مثلما / يجفل من الزول الظبي
بلاي يجبرني هواك / اتحملك وادمح خطاك
وأعذرك والاّ اغلب معاذيرك / لها وجهٍ غبي
اشرق بشمسك / خل شمس الكون / يكسفها سناك
ليا شرق نورك .. / تساوى فجرها والمغربي
ان كان لي مقيال .. / مقيالي عيونك ياملاك
وان كان لي مرقاب / في نايف رموشك مرقبي
يامتعب الخطوة عساها بالعمى / عينٍ تراك
ما تذكر الله / ثم تتبعها الصلاة على النبي
كل لقى حظه وانا ../ يا لعنبو حظي معاك
خليتني تالي العمر/ طفل من الشوق يحبي