صلوا على النبي ..
حنّا بشر فينا من الزين والشين
والكامل اللي بالمخاليق داري
نوّحد الله مثلكم يامسلمين
ماحن يهود ولا عيال لجواري
ماعابنا فقرٍ ولا عابنا دين
فطورنا ( فول ) وغدانا ( بخاري )
نمشي على قانون رب القوانين
ماحن بسلعة بين بايع وشاري
ياشيخ تسلم .. للضعوف المساكين
وتسلم ( يابنك التنمية يالعقاري )
لكن ترى الفتوى سلاحٍ بحدين
الحمد لله ماتجي بالمصاري
(القادسية) تعتبر أم (حطين )
ووريثة ( اليرموك ) ( ذات الصواري )
(الأندلس) راحت وراحت (فلسطين )
والصبح له غبشة .. ولليل ساري
تبغا تجنّنا .. وماحن مجانين !
تبغا تعرّينا .. وماحن عواري!
واذا سكنّا بالحواري من سنين
لاتحسب انّا من عيال الحواري
نصلّي بمكه سواة المصلّين
ومن حازمي بيشة قدعنا الصفاري
ياشيخ حنّا نفهم الشرع والدين
لاملحدين ولا خذتنا الطواري
الله يقاك .. من انسداد الشرايين
والله يقانا .. مـ الردى والمزاري
لاتؤخذ الحجّة بدون البراهين
ومادمت جاري فأنت في حكم جاري
يمّا انها اْخذت رابعتك الشياطين
يمّا سببك (الإحتباس الحراري )
واذا اختلف (بن باز) مع (بن عثيمين )
حنّا على ذمّة ( صحيح البخاري )
..
المقر بما فيه :
الفقير لله ..
محمد الدحيمي