طريقة اعداد الكرشه المحشيه بالصور
السلام عليكم ورحمة الله وبركاته
يالله ان تحييهم كلن باسمه
والله انا مبطينا مشفنا شي جديد من اعضائنا بشعبيات بهاالقسم
وقلت خل هالموضوع غديه يشجع بعض الناس انهم يعطونا من ماعندهم لو شوي
سواء كشته والى سفره والى طبخه
وبمناسبة دخول الوسم عسى الله يرحمنا برحمته ويغيث البلاد والعباد
بسم الله نبداء موضوعنا اليوم وهو طبخه مبتكره نوعا ما
الكروشه الحلوه المحشيه
( بين على اسمها انه للجذب ولفة الانتباه )
وهي في الاصل طبخه لبنانيه بس اجري عليها بعض التعديلات لظروف البيئه
المقادير
1- هرفي يصير توه مقصوب ( اختياري )
2 الكرشه
3 - بصل وطماط ولحم ودارسين وثوم ولومي
4- عظم الساق
طريقة الاعداد
في البدايه نطلع الكرشه ثم نقلبها كم هو موضح بالصوره
نقوم بغسلها وتنظيفها جيدا ( اهم شي الذمه بالغسيل )
نقوم بتقطيع اللحم صغار وايضا البصل والطماط
نقوم بقطع اطراف عظم الساق
بحيث انه يصير مجوف وتشوف الكميره وانت تدربل بالعظم
نجهز الحشوه
نخلطها مع بعض ونحط البهار والملح وشوي ماء
طبعا وظيفه العظم انه يصير بلف تنسيم ونحطه مثل هيك
ونربطه مضبوط بحيث انه ماينطلق والي يطيح
ثم نبرح عاد لها محل بالمله
ندفنها بالجمر ومانخلي الا التنسيم برا ويحط فوقها الجمر
عقب ساعه ونص نبرح لها ونطلعه
بس بحرص بحيث انا نحرص ماتنشق ( وتصير كنك ياابو زيد ماغزيت )
وهذا شكلها عقب الاستخراج
والراس كان معها بالمله بس عاد انه مالحقنا التصوير الى تالي بس انه يبطي يعني يخلا له ساعتين او اكثر
وعز الله ان الدماغ بالدماغ
اثبات نجاح الطبخه او انه الجوع شين
وفي النهايه اشكر جميع من مر من هنا
وعسى ان الموضوع يجوز لكم وترا مدلعين الكرشه عشانكم
والاكيد انا متشوقين وبنتظار مواضيع مبدعينا في شعبيات بمنتدى الرحلات والسياحه
وتحياتي وتقديري للجميع
|