[مسفر الدوسري]

إقتباس:
الرسالة الأصلية كتبت بواسطة سمـا خير
سؤالي الآن هو :
بما أنك مثلت منذو صغرك ..وكان تمثيلك يعجب الأساتذه ويستانسون عليه التلاميذ..هل ممكن نشوفك في عمل فني مثلاً ؟
.
.
شكراً لك على رحابة صدرك ..

هلا بك يا سما الخير..
- ومن قال لك إني ما مثّلت؟! يا حليلك...!!
مثّلت كومبارس أقوى كومبارس، في مسلسل خليجي مشهور إسمه "خرج ولم يعد" بطولة سعاد عبدالله وحياة الفهد وغانم الصالح وإبراهيم الصلال!
هذا يا طويلة العمر والسلامه كنا أيام الجامعه نطلع حنا الشله إذا كان فيه وقت طويل بين المحاضرات ونروح كوفي شوب في حدا الفنادق أو نتغدا أحيانا،وكانت الشله تضم صبيان وبنات منهم ناس صاروا مشاهير من ضمنهم الكاتب الغنائي أحمد الشرقاوي،ومنهم فداء العون صارت فنانة تشكيليه معروفه بالكويت ، وعبدالحميد الدعاس رئيس تحرير صحيفه أدّ الدنيا بالكويت،المهم يوم من الأيام كنا قاعدين في كوفي شوب الهوليدي-إن ونتقهوى ونسولف ،وفجأه دخل اللوبي طاقم مسلسل "خرج ولم يعد" معاهم مخرج العمل الأستاذ حمدي فريد الله يرحمه ويبون يصورون مشهد في الكوفي شوب،بعد شوي جانا المخرج وقال حنا بنصور مشهد وودنا تكونون موجودين في المشهد طبعا البنات رفضوا،وحنا الشباب وافقنا وأنا قلت في نفسي بس يا مسفر القدر بيلعب معاك لعبته،إنت بتدخل النجوميه في التمثيل من أوسع أبوابها،وأكيد المخرج بعد ما تأدي الدور بياخذك على جنب وبيحاول يقنعك تدخل مجال التمثيل بعد ما يكتشف موهبتك،وقلت في نفسي لازم أتعزز شوي وأقول له أفكر ومن هالكلام،المهم حنا وافقنا فعلا ، وابتدا التجهيز،شوي ويصيح واحد: كلاكيت أول مره،وتدور الكاميرا ويصورون المشهد.ستوووب !
وجاني فعلا المخرج حمدي فريد الله يرحمه ومدح أدائي في المشهد(والله العظيم هذا اللي حصل) قلت بس يا مسفر مخطط القدر ماشي صح،وقعدت مع الشله وأنا بالي مع طاقم العمل أنطر متى بيجيني أحد منهم يفاتحني بالموضوع،وبعد شوي جمعوا عدّتهم وخذوا أغراضهم ومشوا وأنا عيوني مفتوحه ع الآخر،وأنطر أحد يكلمني،أحد منهم يعبّرني،أحد يلتفت علي ويشوف أحلامي اللي إنمسح فيها البلاط،ما فيه فايده..وبس.
لكن عزائي إني كل ما أشوف هاللقطه من هالمسلسل أقول:ضيعوني وأي فتى أضاعوا!!!