ام جنيب
الذيب في عرف العرب ماعمره يهرول عبث
والكلب يستذيب ضعافة ..من رداه وقلته
بعض الرجال اردى من ام جنيب واحيل من الشبث
في رزّته يعجبك .. وان تبخصه بانت علّته
لاينفعه كيٍّ .. ولا مليون راقي لو نفث
روابعه متناقضه .. ماتعرف اش هي ملّته
الورث ورث الطيب ياحي الوريث اللي ورث
من بوه عز النفس والفزعه وفرحة طلّته
البعض لامنه تكلم قلت يامال اللوث
والبعض يسحرك بكلامه والعرب ماخلّته
بعض الفكر ودك لو انه من جذوره يجتثث
والله مابغا راعي الفتنة ولا ابغى شلته
واللي تعايب راعي المركاض يومنه لهث
نعذره لأن الركض ماهو له ولا بجبلّته
ماينقد الراعي على من يحرث ارضه لو حرث
كلن على الله مرزقه كلن على الله دلّته
وانا لك الله ماكتبت الشعر من خبث وخبَث
مجرد انسانٍ وكم دمع ٍ عيونه هلّته
العتم عتمٍ خابرينه ياسمي والشث شث
والسوق يجمع شاري الغلّه وبايع غلّته
والشاعر اللي عادته لاهزّه الطاري يبث
من خافي اشواقه فريد الشعر تدمح زلته
من عادته يستسقي البراق لاناض.. ويحث
خطاه في ساقة بروق كاذبه .. مابلّته
اخطي .. ولكن ماوصلت الزندقة والا الرفث
واضحك ولو مرّ الزمن يغصبني اشرب دلّته
لكنّ ماني ملزمٍ في مجلس انسانٍ يغث
والا بنات الدهر ياكم من عزيزٍ ذلّته
محمد الدحيمي