لاصار كل الشعر يعجب جنابك=وش قسم راع الشعر من تِرْك الاعجاب
عطني نصيبي قل تفضّل نصابك=خلْنا نعيش الشعر باحساس الاحباب
كثر انطلاقي كثر غلطة صوابك=اجحف شعورك في مواريث الاصحاب
شح العطايا في جنابك جنى بك=لوكان كيفي لادفن الشعر بتراب
اسرج قصيدي شمعة ٍ في ضبابك=واحيا شعور القلب من بعد ماذاب
لو للوفاء قيمه شملني صبابك=بس الوفاء في تالي الوقت ينعاب
قالوا عذاب الحب هذا عذابك=لاجل العذاب اليوم شرّعت الابواب
اسمع جوابي لا ابا اسمع جوابك=شفت القصايد قلتها دون الاسباب؟
حبل المعاني بالحقيقه تشابك=ماكل شاعر مثل ماقيل كذاب
مدام قلت الشعر واعجب جنابك=وانا خوي الشعر محتاج الاعجاب