[ناصر آل مداوي]

في ام المؤمنين السيدة عائشة رضي الله عنها وارضاها

نامي قريرة عيـن يمّـه وامّ كـلّ المؤمنيـن
يا عايشه يااطهر بنات آدم ويااعظمهن صفات

الله عطاك مْن الشرف عدٍّ قـراحٍ مـا يطيـن
عدٍّ على وضـح النقـا لليـوم ذا والمقبـلات

تارد عليه المؤمنات اللي لهن الاسـلام ديـن
وتخسى يديـن العابثيـن تغثربَـه والعابثـات

دونه سيوف تْسَلّ وِِرْماحٍ تشـلّ وقلـع عيـن
وعواصفٍ تكسر جذوع الشرّ وتبيـد الميـات

والله وهبك مْن العظايم حضن خير المرسليـن
الله ماعظمها هبه تسـوى ملاييـن الهبـات

زوجة رسول الله.. وام المؤمنين بكلّ حيـن:
على اختلاف الشكل والاجناس وبكـل اللغـات

مآثرك يا كثرهـا.. وايجازهـا يبغـى سنيـن
وان جيت افصّلها فلا ظنيت تسعفنـي الحيـاة

ياكمّ احاديثٍ رويتي عـن رسـول العالميـن
ربعٍ نصيبك.. والثلاث ارباع ما بين الـروات

والوحي ينزل دوم في حجرك على البرّ الامين
ولا قد نزل في (يوم زوجه) غيرك مْن الامّهات

وفي بيتك اصبح خير خلق الله واعظمهم دفين
من بعْد ما في حجرك توفِّي عليه افضل صلاة