حاولت أقنع خاطري عنك وأنساك=يامن سكن وسط الكفن باللحودي
لاكن قلبي ماقوى الصبر يسلاك=ابكي ودمع العين جرح خدودي
أبكي لما صابك وموتك وفرقاك =والله عليه من خيار الشهودي
ماغيبتك غيبت سفر واتحراك=غيبتك غيبة غائب ٍ مايعودي
الله يجعل جنة الخلد مأواك=يكتب لك الجنه مقر الخلودي
اقوال من صاحبك حبك وخاواك=وأنت الرفيق اللي بفعلك تجودي
في ماقف ٍ غضب ٍ تقول العرب ذاك=قطع القلوب أبصر بكي الكبودي
الله وهبك العقل والفكر وأعطاك=عطوى جزيله ما عطاها حسودي
مطلق لسان إيطوع القول لرضاك=فوق أجود الحبلين مرقى السنودي
الفكر والتمييز فأغلب مزاياك=بعدك موت القايمين القعودي
ومن لا يعرفك حين بالعين يراك=يقول أسد ومن عيال الأسودي
كسبت ذكر الطيب في ايام دنياك=يذكرك من لاهو بخيل جحودي
مرسي جبل ماحد قدر قال يرقاك =والناس ما تكسر عصاة بعودي
بحر غزير الموج ما ينتهي ماك=واللي سبح به ماعرف له حدودي
فرحة صديق طاب فاله وحياك= لو كان لا حاضر ولا فالوجودي
واليوم وينك مابقي غير ذكراك=إسم انبنى وأصبح جدار مهدودي
مافادنا لو طول الأيام ننعاك =دايم سهارى والخلائق رقودي
الموت قافينا وماشين ممشاك=مابه شجيع ولا مبقي شرودي
الله الله الله
صح لساااااااااااان الشاعر رداد بن عفار
مرثيه من افضل ماقرأت
والشاعر عبدالله المسعودي الله يرحمه
شاعر يعرفه الكثير
بل احد عمالقة الشعراء البارزين بالمملكه
افتقدوه محبيه وافتقدته الساحه الشعبيه
وخاصه فن المحاورات (القلطه )
نسأل الله العلي العظيم
ان يتغمده بواسع رحمته
ويسكنه فسيح جناته
ومشكور ياماجد على
اختيارك لهذه القصيده00
تحياتي00