[ناصر الفراعنة]

بسم الله الرحمن الرحيم


بدون مقدمات . اقدم لكم هذه المتواضعة وهي قديمة جدا ولتسمحوا لي بالتغزل في اوصافها من أعلى رأسها إلى أسفل قدميها ...

[poet font="Arial,4,orange,bold,normal" bkcolor="black" bkimage="" border="outset,4,orange" type=0 line=200% align=center use=ex length=0 char="" num="0,black" filter=""]
بسم الله نبدأ
..
..

يا ملّ قلبٍ هوى الغربي كشف مابه = داخل حناياه عبدٍ في يدِهْ طبْلة
ما جابت الورق من زين اللحن جابه = واكبر عذابه ليا طق الحيا وبله
من أزرق الريش عاف الصيد مخلابه = كبده لها حول سبع سنين مندبله
على وليفٍ شربت السمّ بعْذابه = وكنّه على القلب دَرّ اللي رعت ربلة
كنّ الولي بدّ عن خلقه توصّى به = من عودٍ أزرق وغيره من حصا عِبْلة
ما قد رفعت اليدين ألا على بابه = طفلٍ يحرّم على روحي واوجّبْ له
لو شافه اللي تهجّد وسط محرابه = صلّى أمّ الاربع ثلاث وضيّع القِبلة
ولو شافه اللي بني عبسٍ تعزوى به = والله فلا عاد يسأل عن هوى عَبلة
عليه راعي المعمّ يشقّق ثيابه = وش لون أجل مَن عمر عشرين يلعبْ له؟
مجدّلٍ يا حياة الشر يا خضابه = ينقض قرونه على زندي واطبطبْ له
وعينٍ لسلهم بها عن ألف دبّابة = تلعب بالارواح لعب الظبي والشَبلة
والجفن يا لعنبوكم كيف ما آهابه ؟ = من ذلّ سَلْم وحياة الروح تكتبْ له
والرمش لأغضى تشوف الموت بأهدابه = مدري لو الموت ابن عمٍّ يقاربْ له
رمشٍ على طغوة السلطان يدعى به = عليه قلب المعنّى طايرٍ شَبله
لو في شجاعة هدب رمشه معي لابة = الموت في ذمّتي ذمّة ما احسّبْ له
وانّ احكم الأرض من (صيدا) إلى (طابة) = واطهّر القدس من نذلٍ قضب حبله
والخشم سيفٍ يلوح الغيّ بنْصابه = لا سلّه اللي طعامه ما يجي هَبله
وثغرٍ ولا طاوله ثغرٍ ولا شابه = يا قَبلة الله يا ما احلاه من قَبلة
مدري من الخمر والا الخمر بلْعابه = والا من الكوثر المعسول يِِسكبْ له
من ذاق معسوله الخمري ودلّى به = من سكرته ما نلومه لو يموت اَبله
كنْ حدري الشفّه اليا عضّ به نابه = شفّة صغيرٍ بماي التوت منعبله
ولسان إلى من حكى والجابه الجابه = يرتّب الهرج مابه من يرتّب له
صوته ولا صوت (عُودٍ) عند لعّابة = لا دقّّه اللي علوم الفنّ تُنسبْ له
والخدّ ما غطّ نوره لون جلبابه = والله ما شفت انا بعده ولا قبله
ودّه بذبحة حضر نجدٍ مع اعرابه = واشوى, بريقعْه عيّا لا يوجّبْ له
والكفّ حاله وحال سهّيل متشابه = مدري نسابة! أو انّ سهيل ناسبْ له
بإيده ملك موت هلاّبه وحيّابه = قوسٍ تمزّع معاليق الحشا نِبله
وفوق النهد شفت (أخو بدوه) بمشعابه = وحدر النهد شفت انا خيّالة السَبلة
نهدٍ من الثوب الاحمر يفقد اعصابه = يبغى يتنفّس شوي والثوب ناشبْ له
يا ليت من خذْه صبّح به ومسّى به = ناسٍ على خزّة العشاّق منجَبْله
وخصره مسافة مابين اصبعْ وسبّابة = أحيان يخطون فيه ويلبس الدِبْلة
وردفٍ ليا اقبل تقل مقْفي والى اقفى به = تقول مقبل,عسى الله لا يسبّبْ له
لا سار واهتزّت الشطوه حدر كابه = تشبه شجاعٍ سمع غاليه يندبْ له
والساق كنّه لسان الداب لاومى به = أو كفّ (طِفلة) تردّ الفرْد وتْحبْله
واقدام لو فوق قبر الميْت تاطى به = شفته يصوّت قبل يِضحي الضحى لإبله
بعض الأوادم هبال الحسن ما عابه = واليا انهبلت , اكثر العربان منهبْلة
زينٍ بزينه نموت ونوب نحيى به = ما بإيده الا الشقا ونْحبّ نتعبْ له
غلطان عمّه يخالد يوم وصّى به = سوات هذا جميع الناس تقربْ له
يا زين انا وانت سِلْك عْقال وعْصابة = تُومٍ عسى من عقَب للتوم يِعْقبْ له
يا زين كانك وحَشْ ريمٍ فأنا غابة = غدَت ضلوعي على شانك زهَر رِبلة
بيني وبينك ماْ بين الكُمّ واجيابه = وعليّه ابعدى مدى ممّن ورا القِبلة
يا زين قلبي عليكم يدّرج دابه = بين الحصاتين حذف الناس عرقبْ له
مانيب من قال :يابه آه يا يابه = وهمّه بقلبه كبر راس القلم ذِبلة
يا زين موْدعْك قلبي وانته ادرى به = يا طلبته ليه بين الناس تطلبْ له؟
أمّا اسعف القلب يا زين وتَهنّى به = والا فأنا الخبْل يوم اطرد ورا خِبلة
[/poet]