الليل وعيونك وأنا والثريا = يا ما تسامرنا ويا ما حكينا
أحكي لهم بغيابك اشصار فيا = ويبكون ويقولون بس اكتفينا
وكلما ذكرتك وانت تنطق بحيا = قالت ضلوعي راعي الله فينا
رحنا ورحتوا وانطوى العمر طيا = والشوق نفس الشوق عيا يلينا
شبنا ولا خذنا من الحب شيا = ( يا ليتنا من حجنا سالمينا )
او ليت وان بعض الظروف اتهيا= والقاك مره والعرب غافلينا
لقيا لو ان وجه الزمن به حميا = ما كان خلانا عليها بكينا
لقيا تخيلها / لو الوقت عيا = تخيل انا / لو خيال / التقينا
وآجي لك اجري وانت تجري اليا = وكنا نطير من الفرح لا جرينا
يديك مفتوحه وانا افتح يديا = يلين فوق صدور بعض ارتمينا
ودموع فرحتنا تساقط جنيا = لا اهتزت جذوع الوله في دمينا
ونعصر من الاشواق كأسا ً هنيا = واروى وتروى من بعد ما ضمينا
في وقتها لا ما عليك وعليا = لو قامت الدنيا حبيبي علينا
لحظات من شمس الفراق انتفيا = بظلال حلم ٍ ما تنوشه يدينا
حلم ٍ / وفرقانا تلوّح ابـ هيا = ويا ليتنا من حلمنا ما صحينا
يا ليتنا نبقى حبيبي سويا = حتى نرجع فرحنا اللي نسينا
تبعد واشيلك وسط تيا وتيا = يا مركب ٍ عيني بحر له ومينا
تبعد وتبقى يا حبيبي هنيا = دايم معي حتى ولو ما ( التقينا )