[ثاني العنزي]

قلت ابارك لك بذكرى عيد ميلاد.. الجريمه
ليلة ٍعدت ولكن.. من عناها.. ماسلمت
حطت بصدري رعدها، وانتشا بالعين غيمه
مت مت الفين مره.. يوم باللي فات..همت
ايه تشكي مثل ما اشكي.. من جروحٍ اليمه
بس انا منك انحرمت وانت وش منه انحرمت
لو طرقك اللي طرق قلبي من البعد وجحيمه
كان والله ماهجرت، ولاجرحت، ولا ظلمت
الصحيح: ان انكساراتي على شانك عظيمه
لاني اعرف من انا ادري ليامن قمت، قمت
تدري اني مرتوي من ساسي لراسي حشيمه
ماخطر في بالك اني من كثر جورك سئمت؟؟
يجزع الجووور البهـيمـه .. اللي وهي البهيمـه
اوتشوف انه ردى لاصنت لك خاطر وسمت؟
كنت اشوفه زود شيمه. كانك تشوفه ذميمه
الذميمه في عيوني ، لو بعهدي .. ما التزمت
ولانها ماترخص العشره سوى الناس..اللائيمه
خضت حرب مفارقك لين انكسرت ومانهزمت
الرجا ياصاحبي .. ماكان من ضعف العزيمه
لا وسود عيونك اني ما انحني ،، لامن جزمت
يوم كانت غيبتي تحسب لعدوانك .. غنيمه
انجبرت بيومها من شان خاطرك .. واقمت
واقف ٍ مابين غيرة عاشق . وغبنه وضيمه
منجرح قلبي عليك . ومنجرح منك بصمت
انصدمت وكان سر الجرح صورتك القديمــه
انصدمت وانصدمت وانصدمت وانصدمت
ومن يقول انه بعد جرحك بقا بالناس شيمه
ومن يقول الجرح مايكبر اذا منك انتقمت؟؟