|
رد : (((الليله لاتفووووتكم محاورة عالهواء)))
الدحيمي
تعال ياسعيد .. والميدان ميداني
ابغى علومك .. من اولها لتاليها
رمعتها رمعةٍ .. ماهيب تخفاني
مابين شلفا ذياب.. وبين راعيها
الأكلبي
يامرحبا يالدحيمي .. ياكحيلاني
ترحيبةٍ طيبها .. من طيب هاويها
على النقا والمحبه.. ينطق لساني
مانيب يالقرم .. حاميها حراميها
الدحيمي
يوم انت عندي عزيز .. وحسبة اخواني
روّحت ماغير .. ترميها وتخطيها
انا على فطرتي .. ولساني أذّاني
مير انت طبعك .. تكحلها وتعميها
الأكلبي
اللي على القلب.. لو خشْيته يباني
والنيّه الطيّبه.. للي يبدّيها
مادام من تحْتها ..ساسٍ وعمْداني
ماهوب ينْدم عليها.. راس بانيها
الدحيمي
طيب .. مادام انت لا مجني ولاجاني
ماغير لا قيل سريّها .. تسريها
وشلك وللساعة ام فصوص مرجاني
ماتدري ان البلاوي في براغيها
لأكلبي
ياصاحبي قبلكم.. عمّرت لبناني
وزرعت زيتونها.. وارويت ساقيها
والساعه ام الفصوص.. ان الله احياني
لتشوفني بعد بكره.. كاشخٍ فيها
الدحيمي
لوكنت مااعرفك من ربعي وصدقاني
لا اقول هذا .. مخربها ومعطيها
من مبطي الأصفهاني يكتب اغاني
وانته على انشودةٍ وحده تغنيها
الأكلبي
انا على الدرب.. ماشي فيه وحْداني
لكن سكه.. ولا كلٍ بيمْشيها
لو الاصفهاني لقا له.. راس صنياني
كان العرب قدّمت ..لامه تعازيها
الدحيمي
ابغى على هرجتك حجّه وبرهاني
والاّ المقانيص مانجهل مراميها
..
يوم انت راعي جرابيعٍ وظبّاني
وش نقّزك للظبا اللي في مفاليها
الأكلبي
يشْهد على حجْتي.. مضْغوط حمداني
يوم انت من عيزها.. تسْحب علابيها
لو كان لي سلطةٍ.. في بعض الاحياني
علّقت بعض الاوادم.. مع اذانيها
الدحيمي
الّ عليك العوافي مير يا آذاني
ياشريم نفختك هذي لا تثنيها
مانته بمتعافي ولا انته بمرضاني
وعينك تعودت بأصباعك تقذّيها
الأكلبي
من بين روس الثلوج.. تموت برداني
وتموت فالنار.. لافاجاك صاليها
صح الله لساني ..وصح الله ابداني
وعيونك الرُمْد ..عطْنيها واداويها
الدحيمي
اقول حاكيه يادانه وياداني
بعض الأوادم عسى ربك يعافيها
..
يامحزمي محزمي وحصاني حصاني
ياللي شريت الضعيفة ليه تشريها
الأكلبي
وقْفت من دونها ..ياطير حوراني
وانا خويّك على.. المرّه وحاليها
بلواك بلوا عسى ..ربي مايبلاني
الله ربي وربك.. ماتربيها
الدحيمي
اخبرك متهور وموترك ياباني
لا انته براعي حلال ولا انت حاميها
وجعانة القوم تزبن عند وجعاني
وموسمين المكاوي في مقافيها
الأكلبي
هذا بملكيّتي ..ماهوب تايواني
سيّارتي من حلال.. القوم قانيها
مانيب خابرْك ..يابوبدر علْماني
تدْري عن وسومها ..والا انت موحيها
الله الله
لقاء كبار وصفوف نارية والغبار وصلنا 
حاولت أجمعها حتى أعرف أقرأها بعيداً عن غبار المعركة وصفوف سعيد المجرمه 
أبو مقبل أثرك تأوي مجرمين مطلوبين للعدالة 
بصراحة راحت عليّ نومة البارح والا ليتني كنت موجود بس آآآآه 
الدحيمي
شاعر عملاق ويعرف من أين تؤكل الصفوف
بيض الله وجيهكم وننتظركم مرات ومرات ولا أوصيك بخويي ههههههه
|