[سلمان]

طبعا بمشوار الروحه كان تشديد كبير والله على موضوع التصاريح والنقاط اللي على مداخل مكه وكانت تجي من حظ ناس تمشي امورهم وناس تتعقد حسب الزحمه اللي عندهم لكني وجدت انه صدقوني مهما حاولو بكل الطرق انهم يمنعون الحج بدون تصريح والله يبطون كنا نكون واقفين على النقطه .. وقبل النقطه السيارات اللي معها حجاج بدون تصاريح تنزلهم يروحون يكملون مشي من الطرق الفرعية او يعني يبعدون عن الشارع ويكملون مشي على التراب وكذا لين يتعدون النقطه ... بعد كذا السيارة تتعدى النقطه وتلتقي معهم تاخذهم لمكه ... طبعا مستحيل كم واحد من العساكر يقدرو يوقفو ناس بالمئات يمشون مع بعض عشان كذا اقولكم ما فيه امل ابد ابد ابد يعني يقللون شوي ... لكن صدقوني لو الحجاج اللي نازلين بتصاريح ومع حملات وكذا مليون ... بتلقون اللي بدون تصاريح نفس العدد


تاخرنا حبتين لشدة الزحام ... بعدها طلعنا للحرم على طول عشان طواف القدوم والسعي وكذا ... والامور الحمد لله ما كانت هـ الزحمة المتوقعه ... يعني الطواف كان فيه شوي زحام وصعب لكن مشت الامور الحمد لله ... بعدها رحت سعيت وطبعا الصفا والمروه الحين فيه 3 ادوار كمان نفس الطواف يعني الزحام قليل الحمد لله من اروع المشاهد اللي واجهتها وانا اسعى ... حتى اني والله كنت ناوي اصوره فيديو واقعد اسوي معه مقابله واكبر راسه انه بينزل بالتلفزيون السعودي ... شفت واحد فلبيني او مدري وش هو من طقة هالاسيويين .. مخلصين سعي وابوه الظاهر تعبان ... وهو مريح ابوه وقاعد وراه ويسويله مساج قاعد يدلك له ظهره وعضلات رجليه وكذا ... قلت والله انك بطل الله يجزاك كل خير ويعين على بر والدينا بس ومن اطرف المواقف اللي لقيتها لقينا واحد اندونيسي مع زوجته جلدها جلد احنا نناظر ومستغربين وش يسوي هالمجنون وهو مستلمها انواع الفرش شوي يوقف يهاوشها وهي تصيح ويرجع يجلدها لقينا الموضوع اخر شي انها كانت تاركته وضاعت وله فترة يدور عليها يوم لقاها من الفرحة العبرة خنقته ودبغ هـ المسكينه لين قالت بس لو تشوفون شكله يجلدها ويوقف شوي زي اللي يبغى يحضنها اني احبك ووينك وكذا ويرجع يكمل هواش

اتجهنا بعدها لمخيمات الحمله في منى ... قعدنا وريحنا شوي ويوم 8 جاء مطر قوي قوي ما شاء الله وهو نفسه اللي سبب المشاكل اللي جده وقتها وقت المطر قفلو كل مداخل مكه ما احد يدخل ... الدفاع المدني فصل الكهرباء عن منى كلها ... واعلنو للجميع حالة الطوارئ والاستعداد لـ الاخلاء يعني باي لحظه كنت لو ابغى شي اطلع من الخيمه ارجع القى الاحرام كله مووووووووووويه من قوة المطر لين الحمد لله وقف والامور عدت على خير ورجع الوضع لطبيعته والامور تسهلت الحمد لله

طبعا انا كنت خاااااايف وبقوة ودايما اتخيل ان احرامي بيطيح وام الفضايح لكن الحمد لله طلع الموضوع سهل وفيه طريقه كويسه يتبثت فيه ومع الحزام الامور تمشي اصلا يوم جينا نحرم فيه ناس صارو يسالوني كيف نلبس وكيف نسوي حسيت اني كشخه وانا اساعدهم

المهم يوم 9 حركنا لـ عرفه هـ اليوم بالذات الحمد لله دعيت فيه كثييييييير بس عسى ربي يتقبل رحت لـ عرفه كنت فاهم غلط كنت كل سنه اشوف بالتلفزيون الناس بالشوارع وبمسجد نمره والجبل وزحمه وفوق بعض ويمشون ومدري كيف يوم رحنا نزلتنا الحمله بمخيم لها بعرفه رحت للمشرف قلت له ايش هذا ايش نسوي هنا !! قالي نقعد هنا بالمخيم لين غروب الشمس بعدين نطلع مزدلفه انا قلت له بس كذا !! وين اللي كنا نشوفه بالتلفزيون الناس يمشون وبالشارع وكذا قالي لا هذولي اللي جايين بدون تصاريح ما لهم مخيمات هم اللي تلقاهم كذا وتشوفهم بالتلفزيون المهم وقتها ضلينا بالمخيم لين غروب الشمس ... بعدها طبعا لازم تطلع من عرفه تروح مزدلفه

تحركنا لمزدلفه ... الطريق كان فيه زحمه ... وطبعا مكه كلها زحمه ... يعني موضوع الزحمه وقلق السيارات وهذا بكل مشاوريك ... لكن الحمد لله ما طولنا والوقت للوصول لمزدلفه اخذ اقل من اللي توقعناه .. خصوصا هـ السنه عشان الخوف من الانفلونزا وكذا العدد اقل نوعا ما ... فيه ناس كثير يروحون مشي .. طبعا المسافه ما هي طويله لكن زحمة سيارات مو طبيعيه عشان كذا تاخذ وقت

المهم طلعنا لمزدلفه وقعدنا فيها الى الساعه 12 وشوي وحده تقريبا وتوكلنا على الله اتجهنا بعدها للحرم عشان طواف الافاضه وكذا ... بحكم انه كذا يعتبر ان يوم النحر دخل على اساس التحلل من الاحرام .. لان يوم النحر عندك 3 شغلات ... الطواف والحلق ورمي جمرة العقيه الكبرى اذا سويت اي شغلتين من هـ الثلاث يجوز لك التحلل تلقى ناس اجلو طواف الافاضه لاخر يوم مع الوداع ... وفيه ناس طافو الافاضه وحلقو من الحلاقين اللي جنب الحرم ويوم رجعنا الخيمه تحللو انا طبعا من اول مبيت النيه ان احلق على الماكينه صفر يوم رحت هناك شفت اغلب اللي قدامي يحلقون موس انا وراهم واشاور نفسي يا ولد موس اخربها وخلاص خصوصا ان صوت الموس وهو يمشي على راسهم والشعر يطيح وكذا خطيييييييييير خقيت معه اخر شي فجاه طلع لي شكلي وانا حالق موس تخيلته وتخيلت لاني ابيض بعد ما احلق موس يطلع راسي لونه اخضر مثلا قلت يا ولد خلك على مخططاتك ماكينه كويسه وخلاص وتمت الحلاقه بحمد الله الله ينعم عليكم ولقيت ان تقريبا 90% من الحجاج كلهم يحلقون موس ما شاء الله على السنه والبقيه شوي ماكينه وبعدين تلقون اللي خايفين على شعرهم ولهم زمان تعبانين عليه يخففون شوي وخلاص

قبل ما اختم هـ الجزء ... على طاري الحلاقه يوم رجعت اختي الصغيره شافتني قالت لي عبدالرحمن ممكن ابغى المس راسك قلت لها اكييييييد لا تخلي شي بنفسك خذي راحتك يوم لمسته قالت الللللللللله من زمان دايما وانا بالسوق اشوف الناس اللي كذا صلعه ونفسي اروح احسس على راسهم خخخخخخخخخخخخخ قلت لها خلاص امنيتك تحققت الحمد لله


برب ... قربت اخلص تحملونا