هب الهوى غرب وأجتاح الضلوع وشعرت
___________إن الليالي الجميلة هب نسناسها
مدري كبر حلمنا ولا بعيني كبرت
___________وإلا هي أوهام ودي يصدق إحساسها
تنساني أيام وتجيني متى ماذكرت
___________إليا متى وأنت روحي حابس أنفاسها
كنت أجمل أحلام عمري بس ليه إنكسرت
___________يازين الأحلام لو ما ينكسر باسها
بيديك مديت لي كاس المحبه وصرت
___________أنا أول اللي يذوق المر من كاسها
من يومها وأنت قدام عيني ولو ما ظهرت
___________دايم وعيني تشوفك بين جلاسها
قدرت ولا على نفسي معك ماقدرت
___________لازاد عنها غيابك زاد وسواسها
لوشفت حال الورق والشعر عقبك عذرت
___________اللي حرق صفحة الماضي وكراسها
ماكنت أصدق يجي يوم ابتسم لانظرت
___________أطلال ركب الليالي مر ..ماداسها
وإلا أنت لوقلت لي نادم وجيت اعتذرت
___________كان اجمل ابيات شعري ينحني راسها
مافيه داعي توصيني تراي اعتبرت
___________فرقاك ذكرى وشعري علق اجراسها
يكفيني البارح إني في عيونك سهرت
___________وقفت بين العيون السود وانعاسها
إن رحت ماأنت اول اللي راح وان حضرت
___________قلت الليال الجميله هب نسناسها
العـذب // متعب التركــي !!!
شكرا ً للمرة الثانيه يالريم
تحياتي مرزوق