[الجازي]

إقتباس:

الرسالة الأصلية كتبت بواسطة مسفر الدوسري
الأخت عنود..
- أنا أعتقد عندنا شاعرات رائعات ومبدعات كثير ،بس الشعر النسائي شحيح ويمكن يكون ما فيه!!! يعني لما أقرا كثير من الشعر المكتوب بأقلام نسائيه،ما أشم فيه عطر أنثى ولا أشوف أثر لقلم روج ولا مشاعر خاصة جدا بأنثى إلا ما ندر جدا،كل اللي أقراه في الغالب مشاعر وقضايا تتشابه مع مشاعر وقضايا قلم أبو شنب!! يعني من المؤسف أنك تقرا لنزار شعر نسائي أكثر من اللي كتبوه النساء أنفسهم(من حيث الكم والمضمون)،ومرات أتساءل إذا كانت المسأله عامه في كل المجالات الخاصه بالمرأه ولاّ شنهو الموضوع؟! فمثلا أشهر الطباخين رجال مو نساء،وأشهر أطباء أمراض النساء رجال،وأشهر مصففي الشعر رجال..إلخ.نفسي أقرا فعلا شعر نسائي مكتوب بأحمر الشفايف..طبعا أكيد فيه إستثناءات مثل عابرة سبيل رحمة الله عليها وقله قليله غيرها،لكن أنا أظن إن الغالب تقدر تقول عنه شعر لكن ما تقدر تقول عنه شعر نسائي.














إقتباس:
الرسالة الأصلية كتبت بواسطة مسفر الدوسري
وحده من الخوات الشاعرات قرت اللقاء وكلمتني زعلانه وعتبانه..تقول شلون تقول ما فيه شعر نسائي ،يعني أنت تشكك إن الشاعرات الموجودات يكتب لهم رجال؟!! قلت لها ليش ما تدخلين وتشاركين في الموضوع وتعبّرين عن زعلك وأرد عليك قالت أن هي مهي عضوه بالمنتدى وعشان تدخل لازم تسجّل و..و..قلت خلاص أنا بطرح رأيك هذا وبنفس الوقت يسمحون لي الأخوه والأخوات إدارة المنتدى وأدعو شاعرتنا نيابه عنهم بالتسجيل في أي وقت في المنتدى،ونتشرف بوجودها بين خواتها وأخوانها.
وبخصوص إعتراض أختنا الشاعره وعتبها أوضح..
أنا ما شككت بوجود شاعرات..بالعكس قلت وأأكّد مره ثانيه أن عندنا شاعرات ومنهم في هذا المنتدى يكتبون شعر في غاية الروعه والجمال،وأنا دايما على فكره ضد فكرة التشكيك ولا أحبذها أبدا،أنا أتعامل مع النص وبس ما علي من اللي وراه!! لكن عشان أوضح فكرتي أكثر بجيب أمثله إذا سمحتوا لي:
سيدي طفلي..
تُرى أين قضيت
ليل الأحدِ؟!
مثقلا بالشغلِ؟!
أم بين ذراعي أغيدِ؟!
إلى أن تقول القصيده:
لست غيرى
أنت إن أحببتني
عانق الأرض،ونَم في الفرقدِ
كله حب
فصدري..صدرها
وبها مني لينُ المسندِ
وبها من حُرُقي أروعُها
رعشةُ النار،وحِضنُ الموقد..!

قصيدة ثانيه:
لا تدخلي..
وسدَدت في وجهي الطريق بمرفقيك
وزعمتَ لي
أن الرفاق أتوا إليكْ
أهم الرفاق أتوا إليك؟!
أم أن سيدةً لديك
تحتلّ بعدي ساعديك؟!
القصيدتين شعر نسائي بامتياز،مع إن الأولى لشاعره(لميعه عباس) والثانيه لشاعر(نزار قباني)،لكن هذا ما يعنيني ،أنا يعنيني أن هالقصيدتين شعر نسائي خالص،وانقال على لسان أنثى،فأرجع لوجهة نظري وأقول أن عندنا شاعرات ، وشاعرات رائعات لكن نادرا لما يكتبون بلسانهم وبأحساسيهم وبخصوصيتهم الأنثويه، لهالسبب الشعر النسائي(مو الشاعرات) قليل وجوده في هالكم الهائل اللي ينكتب من الشعر.
والله يارسيس هالموضوع يصلح لك،ويصلح تثيرينه للنقاش لكن أتمنى تكون وجهة نظري واضحه وما فيها لبس.

واخيرا لقيت مدخل جميل نستمتع معك من خلاله الدردشة
والأمتع انه مع شاعر ومثقف وصحفي وله وجهة نظر في كل المجالات ..

أول شي يسرنا دعوة الشاعرة إلى شعبيات .. وأتمنى آن تشاركنا الحوار
لاشك وجودها اضافه لنا وللنقاش المرن الثري الذي يمتاز به الشاعر مسفر الدوسري ..

اسمح لي بمداخله بسيطة ..
بالنسبه لي كقارئه ومتابعة شدّني الأختلاف بينكم ووضحت وجهة نظرك بهذا الخصوص .. لكن الا تعتقد ان الرجال يعانين من الشعر الذكوري الخالص ايضا !
كل القصائد التفعيله والعمودي وحتى لانكون مبالغين اغلبها الرجل يخاطب المحبوبه بـ ( ياحبيبي )
لدرجة ان الأمر يختلط عليك
ولك مقاله تنتقد الرجال تحديدا ..

http://www.aljarida.com/aljarida/Article.aspx?id=94688&searchText=حبيباتنا

هل المسأله ثقافة تقليد ؟
أي ان المرأه تقلد الرجل في الأسلوب حتى أصبح شعرها تقليد سائد ربما غير متعمد او متعمد برأيك ؟
هل لابد للمرأه ان تذكر خصوصيات من مفاتنها او فتنتها أو يكون للغنج مساحة كبيره في التودد حتى تحدد هوية ان الشاعره امرأة ؟
الشعر هو كتلة من المشاعر في الأصل . قد يكون حزن ، غضب ، فراق ، لامجال لذكر اي تفاصيل خاصة
مثل ،، ساحت كحلتي يوم اني بكيت صحت وعليّا راح الميك اب يوم بديت امسح بالمناديل راح الروج
حسب طبيعة الشاعرة وخجلها ومدى جرأتها وهذا له علاقه بشخصيتها
اذكر شاعره جميله من اهلنا اهل الحجاز الله يذكرها بالخير اسمها هتون الشريف كانت تكتب بتجرد كامل بدون
اهتمام برأي الآخرين ، وتعرضت لنقد في قصائدها لكن ترد بوجهة نظرها الخاصة ونحن بدورنا نحترم اراء الآخرين مع كل الحب لهتون الأخت والشاعرة ، مااود قوله هو ماكلٍ يملك شجاعة اختنا هتون .. حتى يثبت الغير انهن أناث يستحقن الحب ايضاً .. والتعبير عنه حسب بيئة وثقافة الفرد اذا كانت في بيئة متحرره آو بيئه متحفظه جدا على حسب بالتأكيد ، خاصة اذا كانت الشاعرة تمثّل أسم قبيلة .. أو أسم صريح اكيد تخجل من التصريح بمشاعرها ايا كانت امام الناس شعريا لأنها محاسبه عليها في مجتمع متحفظ كمجتمعنا ، لكن تمر على احاسيسها وموقفها وانطباعاتها وقراراتها بالخطوط العريضة كما يقولون دون الدخول في تفاصيل محرجه للبعض
والشعر ممكن تقيمه لها بالصور والتشبيهات الجميله التي تبتكرها لا بالدخول في التفاصيل الدقيقه جدا ونحاكمها من خلال ابداعها من خلاله
http://www.sh3byat.com/vb/showthread.php?t=13997

هذا مالدي الآن
مااقوال شاعرنا الرائع دائما وابدا ؟