السلام عليكم ورحمة الله وبركاته
كل عام وانتم بخير .. اسمحوا لي بهذه الكلمات عسى ان تنال على شئ من استحسانكم
.
.
.
لا باس من فرقا المحبين لاباس=يا روحي اللي بيّحت كل مكنون
حرب المفارق من زمن قبّ الافراس=تسحق غلا الاثنين وتخيّب اظنون
ما للدهر في كرّها طبول واجراس=للعذل فيها نوق وجمال وضعون
يا صاحبي يا لول يا درّ الالماس=يا عاقلٍ امسيت.. واصبحت مجنون
ليه الجنون وليه تأبين الاعراس=وشلون تعطي طاير البين عربون
العاذل اللي يسكب السم في الكاس=شين القفا وان صار في الوجه.. مزيون
لوّ الرجا هجرك ووصلك هو الياس=ماني لتحقيق الرجاوي بممنون
إلا (حسيبه) كلمةٍ بين الاقواس=هجرٍ صرع سلواي وابكى لي اعيون
ما شفت منه الا المواجع والافلاس=واعراض عينٍ بي ولاني بمعيون
في صدري الضيقه وفي البال وسواس=والحال مرٍ فوق وامرار في دون
دنياي ليل وفيّ للخيفه اوجاس=ما كني الا في بطن حوت ذا النون
والحزن في جاشي جماعات واجناس=قبايلٍ له في الحشا افخوذ وبطون
يا بايعي شاريك متناقض احساس=في الكون اعيش وعايشٍ خارج الكون
عقبك وانا ميّت وفي صدري انفاس=حيٍ مع الاحيا.. وفي القبر مدفون
شفني وانا اصلي عليّه مع الناس=واستقبل اللي جاو فيني يعزون
[/quote]