[مسفر الدوسري]

نُحبّ..لتصبح الحياة أجمل،والعمر أطول!
نحب لتصبح الأشجار أكثر أخضرارا،والشمس أبهى نورا!
نحب .. ليصبح الهواء صالحا للتنفس!

	أنا مدري الحياه لولاك لها نفس الطعم.. بيكون.. ونفس اللون؟! وبتكون السنين حلوه.. مثل ماهي معاك؟! وشلون؟! وشلون الحياه ممكن تعطيني .. مثل ماهي معاك الحين.. فرح مجنون؟! ولو تكبر همومي..يوم.. من غيرك واهوّنها هي ظنّك ..عليّ بتهون؟! لو ما انْتي معاي ظنك.. بينبت في فضا قلبي أغاني حب.. وبصوتي..زهر ليمون؟! وبصوت الهوى يسري حزن نايات أصير بعزْفها..مفتون؟! قبل ماحِبّك.. إيديني شجر ميّت بغير جْذور وغصونه خيال غصون! وقبل ما تشرب ايديني من ايدينك كان قلب الشعر ظامي ولا يرجي حنان مزون وكانت خطوتي عميا وكان حتى النهار أعمى بدون عيون! قبل ما تدخليني نور كان قلبي مثل حضن الشتا..مهجور واحساسي مثل عصفور من خلف الضلوع مسجون يمر الليل كل ليله على صدري وتخطف لحظتي خيله ويتركني بعد ما ينثر بجوفي وجع وطعون! وجيتي تشبهين الصبح سكنتي في سما عمري ملَيْتي في ضياك الكون أنا لولاك..مالي قلب.. ولا لي درب ولا كان الغلا بيمون ولو ما انتي معاي .. مدري وشلون الحياه..بتكون؟!