[مسفر الدوسري]

إقتباس:
الرسالة الأصلية كتبت بواسطة عبدالله الكايد

"

ما أن عَلِم بـ أنني في الرياض, حتى

سألني..

كيف حال مسفر؟

صمت بعدها , تنهّد ثم قال:

"اذا حكيت أغرق"

استاذي مسفر / قل كيف حالك؟ و كانك تجيب من سأل .!

وتنهيدته

من سألني عنك هو المتجاوز/ الحميدي الثقفي ...

أخبره يا مسفر عن حالك و انت تعلم (مدى) و (أبعاد) سؤال الحميدي , حيث انك أول من سأل عنه

ولم يكن هناك أحد بعدك.. سوى التنهيدة و "إذا حكيت اغرق"؟!

قدمت استقالتك من العمل نتيجة لتعرض الموظفين الذين يعملون تحت إداراتك لـ مظلمة ما
صحيح هذا الخبر؟

سألني الحميدي أيضاً عن نص "منفوحة" وقال بعض المقاطع ولم تسعفه الذاكرة ,
هل ستسعفك انت, وتأتي بالنص كامل هنا؟

سما خير

كل النصيب لكِ من اسمك

وكل الشكر والتقدير لكِ يا رائعة على هذه الاستضافة

عبدالله الكايد..الله با عبدالله كنت أحبك مع إنك بعيد ما بينا تواصل غير الحرف،وفجأه لما جبت طاري الحميدي..حسيتك بقرب نبض!! حسيت أني أعرفك تمام المعرفه..وحسيتك صديق وأخو وحبيب،وصفه سحريه هالحميدي لهدم الجدران وحرق المسافه!!
الحميدي..أبي أكون بخير أكثر من اللي أنا فيه..أبي أتطمّن عليك!
تكفا يا عبدالله قل له..
والله إني بكون وقتها في أحسن حال وبأسعد حظ.

- بالنسبه لموضوع إستقالتي من العمل إلى حد كبير صحيح،كنت أنا والمسئولين الكبار في العمل في صراع يومي بسبب الموظفين اللي معاي،وبغض النظر عن التفاصيل الممله،هم شافوا إني حجر عثر في طريق إمتهانهم فتحول الضغط والمضايقات علي أنا عشان أرضخ وأصير معاهم ضد الموظفين،وإستمر الوضع فترة طويله،طبعا ما كنت راضي باللي يبون، ولا حبيت أشارك بهذا الظلم الواضح لشباب من أجمل الناس اللي إشتغلت معاهم وأكثرهم تفاني في الشغل،فقدمت إستقالتي وقُبلت طبعا على الفور.وكل ما أفكّر بالموضوع أقول الحمدلله.. صحيح خسرت الوظيفه لكن كسبت هالشباب اللي لحد اليوم على تواصل معاي والتقي وياهم بين وقت ووقت ويكنّون لي محبه صادقه واحترام يسوى عندي الكرسي على الإداره كلها.وعلى فكره هالموضوع مهو أول مره يصير معاي ،سبق وصار معاي لما كنت أشتغل في وحده من شركات سابك ،إسمها شركة"حديد" وكنت وقتها مسئول قسم العلاقات العامه ،وما كان عاجبهم تعاملي مع الموظفين اللي معاي،ويعتبروني متساهل معاهم،وكنت أقول أنتوا عليكم من إنتاجية القسم وحاسبوني عليها،أما شلون أديره فهذا ما يعنيكم ،وكانوا يحاولون يتدخلون مباشره في عقاب الموظفين وكنت أرفض وأحتج وأسوي لهم مشاكل،ومن هالباب بدت المشاكل بيني وبين مديري المباشر ،اللي كنت أقول له أنت لك حق تحاسبني أنا وتعاقبني أنا لكن الموظفين اللي عندي مالك شغل فيهم،إشتكاني لرئيس مجلس الإداره وحاول هذا يضغط علي،ما فيه فايده ،ولما إستمرت المشاكل حوالي سنه أضطريت أقدّم إستقالتي وأترك الشغل.

- وهذا نص منفوحه يا الغالي:
منفوحه..

هذي الأصوات المبحوحه..

هذي النظرات المقروحه..

هذي الجدران المجروحه..

اللي يتسرب منها..

أسرار الناس اللي فـ الخلف

أشكال الناس اللي فـ الخلف

ألوان الناس اللي فـ الخلف

حتى تكتمل اللوحه!!

منفوحه الناس الغلبانه

وبيوت الطين الشقيانه

والصبر المُرّ اللي مْشرّع..

للآهه أوسع بيبانه!

منفوحه..

هذي السكيك الوسخه

هذي الألفاظ الوسخه.. مابين الكل

هذي الشياب اللي تقعد..

تحت الجدران ..

في عز القيظ..

تبحث عن ظل

منفوحه.. السّــل

منفوحه.. مستوصف مليان..

فوضى..

وناس...

وذبّان..

وأولاد الساعه عشره..

نهار السبت..

تلعب كوره..

تسرق دكّان..

وفـ الليل

تفكّر

وتدوّر

وين فيه "زيران"..

أو تسمع آخر أغاني.." مزعل فرحان[1]"!!

منفوحه..

هالدمع المُسرَج

والناس اللي دايم تدعي..

إنها تُفرج

وتلاقي من هالضيق مخرج

منفوحه..

هذي اللغات الكثيره

هذي الأشكال الكثيره

هذي الحيره

هذي اللفتات الشريره

منفوحه ..

هي اللي دايم يسأل:

متي تجي زكاة العيد؟!

هي اللي مقطوع الإيـد

هي الدخان الأزرق

وايام تغرق

واعمار تبيد

منفوحه..

حتى تكتمل اللوحه !!

[1]مطرب شعبي

محبتي لك يا عبدالله ولذاك الحبيب اللي يتلحف كل ورد الطايف بين ضلوعه.