طاريك ذا الليل في ذمتك وش جابه
وانا سليت (القزح والقوس ) والوانه
يامستبيح الدحيمي ويش تبغى به
شاعر / منتّف / بسيط .. ويعشق احزانه
وش تستفيد بشقاه وحرقة اعصابة
الحزن ربّع بتنهاته وصمّانه
من صغر سنه وقبل تكمّل انيابه
لاضاق صدره يشلّ الصوت ( يادانه )
يوم اجمل الحب طفلٍ ضحكوا اصحابه -
-عليه.. يومن سرى يشري لك ( لبانه)
ياعشقي الصادق اللي ضعت باسبابه
يوم اعذب الشعر مات الصدق بلسانه
مهبول من يحسب الايام تتشابه
والوقت يومٍ سعد ..وسنين ديّانه
احلام كذّابة و60 كذابة
مليت من العشق من زوره وبهتانه
هيّه كذا .. عادة الأقدار غلاّبه
هيّه كذا ياسمو الشعر والحانه
احدٍ يحس بخيانة .. لاوفا احبابه
واحدٍ ذبحه الوفاء .. في حب خوّانه