ابيات طريفه للإستاذ الشاعر/حمد السحيمي صاحب مجموعة النداوي الأدبية ومجاراتي لها
الشيول اللي باعنية المقيطيب = صلحت فيه وباقي فيه سيلات
يقول عبدالله سليم العذاريب = قم دق سلفه وانحر ابه الطويلات
واليوم عاشر يابو احمد وانا أجيب = قطع غياره من جميع المحلات
(اختر ) مجنني بكثر الأكاذيب = والكهربائي يخترع له حيالات
اد يتره فور ويحتاج نوضيب = تلاوح اسلاكه جداد وقديمات
واليوم حمّلته وقدمه على الجيب = وصار الزعل من رابع المستحيلات
ومن شريتي كسبت رجل المواجيب = راع العلوم الطيبات الجزيلات
الشيول اللي باعكيه المقيطيب=راحت سنينه في ضهور التريلات
كم كتْ له وادي وكم سنّد شْعيب=وكم هد له كبري وهدّم بنايات
شوف البكت كنّه بقاله على سيب=طاحت سنونه من حديد العمارات
من فوقه دريخان يفْتل الاشانيب=لااحتر راسه قام يضْرب مقصات
لاقال له عمّه.... دريخان يالذيب=جته الحميّه والسطر والمروّات
طمر من الشيول بدون اي ترتيب=ونشْبت هموله في حديد المرايات
خذا شويٍ فالهوا وضْعه مْريب=وحوّل على راسه وابشرْك... ما مات
لكن خذا شهرين عن وعْيه يْغيب=وقعد ثلاث سنين بين العيادات
باعوا لك الشيول وهو وضْعه صْعيب=والله يعينك ياحمد فالخسارات
من عقْب عصر العولمه والحواسيب=صارت حياتك في ثقيل المعدّات