[عبدالرحمن ال مغني]

يا حزة المغرب شفي صاروا اغراب
قلبي وقلب اللي جبرني اجي لك!

واقف على تلويحة الكف مرتاب
على ذنوب البعثره جيت اخيلك !

يأجمل خيالٍ عاش فيني ولا شاب
رحتي ودرب التيه .. ابسط دليلك!

يعني محال اللقاك والوصل قد ذاب
وانا قليل الحال .. حلمي قليلك ..!

بلملم أشيائي واجملني [غياب]
لان الغروب احيان "ذكرى رحيلك"

واقف [شموخ] وكل زفره لي عتاب
اشوفك بعيني حمل كيف اشيلك؟!

ما كننا عشنا على كلمة [احباب]
وما كني اللي كان قلبي يعيلك !

واليوم خاب الظن وكلي بعد خاب
حسبي عليك الله .. ربي وكيلك ..!

اشوفك بعين التعب .. نبض كذاب
واشوفك بعين السماحه "حليلك"

لوان باقي عمر .. وانك له اسباب
ارفض اعيش العمر .. وانا ذليلك !

بقفي لو ان الدرب موحش وله ناب
منفى الشعور/ ارضاه يبقى بديلك!

عادي نكون اغراب وش يعني اغراب؟
مدام قبحك ممتزج في جميلك ..!!

راضي اكون الممتلي وحشة غياب
معاد ابرضى من كثيرك .. "قليلك"

هذا انا جيتك وانا احلامي اسراب
ما جيت احاول جيت كلي [دخيلك]

ماهو دخيل تجين والقلب قد طاب
لكن دخيل اشلون اقدر .. ازيلك ؟!


عبدالرحمن آل مِغني
@almogni07