السلام عليكم ورحمة الله وبركاته
احبتنا اسعد الله اوقاتكم بكل خير
قصيدة الشهر (8) / لشهر ابريل / 2012م
المنافسه حصرت بين الشعراء الرائعين :
فائز البذّال / محمدالسالم / محمد جفال / محمود ال مخلص / الثامر/ عبدالله شامان / سالم بن لجعان/
عبادي الزهراني / احمد الويمني /ناصر ال مداوي/
غرم البهيشي / فهد الغبين
..
وبأغلبية اصوات لجنة التصويت على قصائد الشهر
وهم الشعراء :
سعيد بن مقبل الأكلبي / سالم بن جلعان / علي التركي
والشاعرات :
نورة العجمي / نجلاء الشريف
والكاتبة المميزة :
الجازي
ومحبكم
محمد الدحيمي
..
استحق المركز الثاني الرائع : سالم بن لجعان
والمركز الثالث الرائع : محمد السالم
..
واستحقت هذه القصيدة ان تكون :
من عام عشرين العمر .. لين اينعت / فيني ثلاثيني
تمخّضت الاعوام واهدتني من الضيقه عشرها الممحله
جردٍ / يحت اوراقها الغصن اليباس .. وتزرعه فيني
لكنّها .. تاتي على موسم حصاده بعد حين وتقتله
عشر خرزات تطيح والقى عقدي الثالث على يديني
في آخره فتحت عيني / مالقيت اني بديت من اوله
راحت علي مثل البروق اللي اخايلها وتغريني
في كل ومضٍ من سحايبها .. اسبّح ربها وآجلله
اثر السنا .. من نورها ماغير (انا) والنفس تغويني
وآسج عن درب الثواب لكل ذنبٍ حرموا وآحلله
أسرح مع لحن الغرايز/ بامر من نفسي وتعميني
منقاد.. في جنح الظلام لغيّها في ضيّها واتوسله
مرتاح لالوان السما السودا .. وهي بالوبل ترميني
كني الوحيد اللي يشدّه ليلها الماطر وهم / وتبلله
انا هنا .. ملك المكان اللي / يضيّعني عناويني
الروح فيني خاضعه لامر الجسد تسجدله وتتامله
في هالمكان.. يروح فكري للفضا مرات .. ويجيني
عاجز عن دروب السوايا.. والخطايا والذنوب تذل له
في هالمكان .. كثير اشيا زخرفتها بس في عيني
لان الحقيقه بانعكاسات المزاج محيره ومضلله
تسمع صدا ضحكاتي الجدران وتردد .. شياطيني
نفس الكلام اللي اقوله كل يوم وبعد بكره اجهله
تبعت / من نفث الدخان وطلعة انفاسي .. توديني
لبعد من حدود الشراب اللي يديني صبته لجل اثمله
أشبه ملامح الف ليل .. وعقلي الضايع يقدّيني
والقلب / فاضت به مشاعر الف بنتٍ غانيه ومدللـه
وانام / ملء الجفن ماترضى طهاراتي ..تغطيني
كن الاجابات العقيمه برئتني قبل طرح الاسئله
سريت.. في غيبوبة الروح وتناست لا تصحيني
لين اصبحت الاعضاء تحت امر الجفون المثقله
ولا صحيت .. الا على صوت الضمير اللي يناديني
لكن بعد ماشالت طيور الشتا / والصيف حب السنبله
وعيت متعجب مابين انقاض ماولّى من .. سنيني
وعيت مستغرب مدى هذا الدمار اللي زمن متحمله
قمت/ انفض غبار الليالي الغابره والهم يكسيني
ومتأمل / بباقي العمر عل السنين المقبله بتجمله
...
للرائع :
عبدالله شامان
..